Read Ntcham 2 Timothée 3 Bible Online

2 Timothée 3 - Ntcham bible

2 Timothée 3

¹Á nīn nyí yii iyuntijoolkaa poonee, án làá dāá nīn pɔ̄ɔ̄.

²Di sá yii binib dāa kíǹ ki cáá ikummunti, ní ki néeń animbil, ní ki gà bi-biŋŋi, ki cáá alambil, ki sòoǹ ki bíiĺ Unimbɔti, kaa tɔ́ bi-baabi nì bi-nab, kaa dāa nyí tiŋan, kaa tɔ́ tin bí circiree.

³Baa dāa cáá dineendi, kaa dāa sūǹ binib saai, ki dāa kúŋfí binib boon, kaa dāa ŋūǹ kí cúú bi-ba, ki dāa sá bitɔŋfitiibi, ki dāa ná tin ŋān̄ee.

⁴Bi dāa sá bin nyēē binib boon ki nyáfí-bee. Bi dāa sá binib bin an yòontée, ki dāa néeń timɔn, ki dāa néeń tin fáatiǹ-bee ki jítiǹ Unimbɔti.

⁵Bi dāa ŋúb̀ nnimbɔtisan bɔti ní kí yíí kaa là mbaamɔn pɔŋŋu ŋun bí tibɔti gbanti poonee. Á fá an nibee.

⁶Bi-kansikin biba kóò binimpoobi bin landɔkɔi pátì bi ŋáań ikpiti ki cáá kɔdeebi kupaauee dumpui ní ki yàntī bi fòol̄ tin bi sòoǹee ki kíikí.

⁷An nimpoobee pílifí tibɔti ní baabadal, ama doooo kii nee, baa ŋūǹ kí béé ibaamɔn.

⁸Kii Jaaneesi nì Jambiree[8] nín kaa nìn là Mooyiisi bɔti puee, míǹ mbaantiim ní an nibee kaa là ibaamɔn. An sá binib bin landɔkɔi gábitèe, baa nóó Unimbɔti.

⁹Ama baa làá nīn bí kí cù ndan, kun puee báà ŋma làá dāá béé bi-pu yii bi sá bigbaambi, a lì kii Jaaneesi nì Jambiree cee nín nìn jítì puee.

¹⁰Ama sii ká m-dàkatam nì m-bimbim nì m-landɔkɔi nì m-fookiiu nì m-mɔtiiki nì m-neendi nì m-pɔ́ɔǹtam

¹¹nì bi nín páb́-mi puee, nì m-falaau. A nyí tin nìn jítì m-pu Antiyɔɔsi nì Ikooniyum nì Liistiree. Falaa ulɔu ní maa jíń niin? Ama ti-Dindaan nyántì-mi tikɔkɔ poon[9].

¹²Di sá yii bin di yaa fōō Yeesu Kriisitoo ki kíí ki là kí nīn yú deedee Unimbɔti nimbiinee, see bidambi ń ká digìńdi.

¹³Ama bitɔŋfitiibi nì bikiililiibee làá nīn mɔ̀tīi múl̀ ki kóò tin kaa ŋān̄ee poon ní baabadal. Bi wáŋkì, ní ki bíi kíiĺ bi-jutiibi mun ń wāŋkì.

¹⁴Míǹ puee, sii ń ŋúb́ tibɔti tin a bífì ki fōō ki kíí tiŋanee, kun puee sii nyí bin di dàkā-si an bɔtee.

¹⁵Doooo a-biyatin ní a pée nyí Unimbɔti gbɔŋku poon bɔti. An di ŋūǹ kí tīī-si iciin in cáǹ unil difiilinee nì fookii un a cáá Yeesu Kriisitoo puee.

¹⁶Unimbɔti di yāntì bi ŋmàn̄ tibɔti gbanti kɔkɔ, ki sá bí dūú dàkà binib ń béé ibaamɔn, kí dàkà unil yìntitam, kí kpòotī-u, kí dàkà unil ú nīn cáá deedee bimbim,

¹⁷án nín làá ŋá pu kí bɔ́ntí Unimbɔti niliu mmɔntiimin ú kítí kí tɔ̄ atummɔnti kɔkɔee.