Read Ntcham 2 Timothée 4 Bible Online

2 Timothée 4 - Ntcham bible

2 Timothée 4

¹M bíi kpáafí-si tibɔti nee Unimbɔti nimbiin nì Yeesu Kriisitoo un làá dāá sòoǹ binifoobi nì bitaŋkpiibi bɔtee nimbiin, úǹ un làá dāá dāan̄ kii ubɔtee:

²Á sòoǹ Unimbɔti bɔti. Báà ŋyunti yaa pɔ̄ɔ̄yaaa, ŋu yaa pɔ̀fàaa, á nīn pée cɔ́ tibɔti gbanti pu, kí dàkà binib bi-yìntitam kí wòoǹ-bi bi-kpitii pu, kí tīī-bi kunyannyaau. Á nīn cáá kimɔtii tikpil a-dàkatam poon.

³Kun puee iyunti iba dòoń binib kaa dāa gíti là kí pīlifì ibaamɔn dàkatam. Ama bi dāa nōotí bíǹ bi-ba nín fáatì miŋyee ní ki dāa kpáfí bidakaliibi kupaau bi-cee, ní bíǹ dàkà-bi tin bi là kí nīn pílifée.

⁴Baa dāa gíti là kí pīlifì ibaamɔn, see bitiŋkpikib nín nìn ŋáań tiŋyee ní bi dāa néeń ki pílifí.

⁵Ama sii ń ŋúb́ a-ba an kɔkɔ poon, ní kí ŋmèè falaa kí tɔ̄ a-tundi din sá Tibɔmɔntiil sòontamee. Tɔ̄ ditundi din sá Unimbɔti tɔntɔnliu tundee.

⁶Ama an yaa kíǹ mamee, ŋyunti bāań ḿ dū m-ba kí ŋá saraa, man kúm yuntiŋu bāań.

⁷M jáń kujamɔntiiu, m sáǹ ki bàn̄ ditaatandi kúntilaŋki ki gbíntìi ŋúb́ m-fookiiu.

⁸Kɔŋkɔnnee dijajil paati di dɔ̄ ki cí-mi. Tíǹ di sá difiil beefuuliiki kin Yeesu un sá ibaamɔn bɔsoonliuee làá dāá tīī-mi ŋwindalee. An kaa dāa sá man baba ní u làá tīī, ama bin bin kɔkɔ néeń ki cí u-gítintamee.

⁹Á pɔ́ɔǹ kí dāan̄ m-cee malaa,

¹⁰di sá yii Deemasi dū-mi ki fá ki búntì Teesalooniiki, kun puee u néeń duulinya un poon ti bí nee tikpil. Kriiseensi búntì Galaati, ní Tiiti mun búntì Dalmatii[10].

¹¹Luuki baba di pée kíǹ m-cee. A yaa dòońee, á kpáaǹní-mi Maarki, kun puee u ŋūǹ kí dāá tūtuǹ-mi m-tundi poon[11].

¹²M dū Tiisiiki ki tú Eefeesi[12].

¹³A yaa dòońee, á taa súntí kí kpáaǹní-mi m-bɔkutifɔkɔl din m nìn yāntìń Troowaasi tiŋkin Kaarpusi ceeyee, kí kpáaǹní-mi m-gbɔnti, cilinjee tigbɔn tin sá igbanee[13].

¹⁴Ucaa Aleekisandir ŋá-mi inikpiti tikpil. Ti-Dindaan làá dāá pà-u atuun ŋin u túńee paati[14].

¹⁵A mun ń nīn nyíǹ-u, kun puee u nìn yíì kpataaa kaa là tibɔti tin ti sòoǹee.

¹⁶Bi nín péé péé ki cúú-mi ki cáá ibɔsoonee, báà ubɔ kaa yúl̀ m-boon. Bi-kɔkɔ dū-mi ki fá ní. Unimbɔti ń taa dūú ŋá-bi tibɔti.

¹⁷Ama ti-Dindaan yúl̀ m-boon ki tīī-mi mpɔn m ŋúń ki sòon̄ Unimbɔti bɔti mmɔntiimin ki yāntì bin kaa sá Juuda yabee kɔkɔ gbìl̄ tibɔti gbanti, ní m nyáń gbikinti nyɔkɔn.

¹⁸Ti-Dindaan làá nīn pée nyāntí-mi tibɔkpitil kamaa poon míǹ ní kí dāá cáá-mi kí kɔ́ǹ yilpu Beelin nì alaafiya. Úǹ di sá tinyooldaan kí nīn pée cá jaanjaan! Ameeni.

¹⁹Á jāam̀ Priisiil nì Akiilasi, ní kí jāam̀ Ɔneesiifɔɔr dicaŋkun yab[15].

²⁰Eeraasiti gbíntì Kɔranti ní Troofiim būǹ. M yāntì u gbíntì Miilee[16].

²¹Á pɔ́ɔǹ a-ba kí bàń-mi kí wàatī tiwool yuntiŋu ń nín bàń. Eebulusi nì Pudansi nì Liinusi nì Kloodiya nì nnabiyaamu kɔkɔ jáaḿ-si.

²²Ti-Dindaan ń nīn bí a-cee. Unimbɔti ŋanti ń nīn bí ni-pu.