Read Ntcham Tite 3 Bible Online

Tite 3 - Ntcham bible

Tite 3

¹Á téetí-bi yii bi máaǹ kí sìntīǹ bi-ba kí tīī bikpilib bin sá gɔmina nì biyidambee[4]. Bí nīn tɔ́-bi, ki yáb̀ atummɔnti kɔkɔ pu.

²Bí taa nín̄ sòoǹ ki bíiĺ binib, kí nīn sá ŋgbansɔŋfi nib, kí nīn ŋáań tiŋan, kí nīn mɔ̄ báà ŋma cee.

³Kun puee, dooooyee ti mun nìn sá bin kaa nyí tibee, ní kaa nìn tɔ́ Unimbɔti, ki yìntī, ní ti-nimbitaataam nì min ti fáatèe nìn cúú-ti kuyuŋu. Ti nìn cáá ntoom nì inimbidiki, ki ná ti-jutiibi ní bi mun ná-ti.

⁴Ama Unimbɔti ti-Fiiliu dàkā-ti tiŋan nì dineendi din u cáá timbi binib puee,

⁵ki fīī-ti. An kaa sá yii ti túń atunnyaan aba, an sá isaa ní u súń ti-pu. Bi nín fùul̀-ti Unimbɔti nyim puee di dàkà min Circir Fam fātìi màl̄-ti mpɔm ki tīī-ti dimaŋfapɔndi diŋyee[5].

⁶Yeesu Kriisitoo ti-Fiiliu puee, Unimbɔti tīiń-ti u-Fam tikpil tikpil,

⁷tí ŋmā kí kpántí deedeedambi Unimbɔti nimbiin u-ŋanti pu, kí fōō dimaŋfal din pu ti máká, dàa cáá dikúntilee.

⁸Tibɔti tin m sòoǹ nee sá ibaamɔn ní. M là á nīn cɔ́ tibɔtee pu tikpil, án nín làá ŋá pu bin fōō Unimbɔti ki kííyee ń dū bi-ba kí tīī atummɔnti tɔ̄tamee. Tin ŋān̄ ki kèetī binibee dee.

⁹Ama bí taa nín̄ kpákà tibɔfan pu ki kàaǹ bi-naanjab yiŋŋi[6] an kaa kúntí, kí taa nín̄ kpákà ki jáà Juuda yab marab pu. Tíǹ sá tibɔfan ní kaa kèetī.

¹⁰Á kpāafì un cāabìń ni-kansikin diyakatilee mili pu[7], boonee, u yaa kaa gbìl̄ee, á nyāntí-u.

¹¹Di sá yii a nyí yii an niliuee fá nsammɔnti ki ŋá unikpiti, ní u-kpitiiyee dàkà yii u gáatì.

¹²M yaa láa dū Ariteemasi àá Tiisiiki[8] ki túnní a-cee u bāań-see, á pɔ́ɔǹ a-ba kí kíntiń-mi Niikoopoolii, kun puee niin ní m là kí dāá nīn bí kuseeun.

¹³Á pɔ́ɔǹ a-ba kí tūtuǹ Seenaa un sá umaranyilee nì Apooloosi[9], án nín làá ŋá pu tiba ń taa lóó-bi bi-saŋkindi poonee.

¹⁴An máaǹ ti-yab mun ń dū bi-ba kí tīī atummɔnti tɔ̄tam, án nín làá ŋá pu tiba yaa bāań ki páb́ee, bí ŋmā kí tūtuǹee. Bí taa nín̄ kā, kaa kèetī diba.

¹⁵Man nì bin kɔkɔ bí dooyee jáaḿ-si. Á jāam̀ bin fōō Yeesu ki kíí ki néeń-tee. Kriisitoo ŋanti ń nīn bí ni-kɔkɔ pu.