Read Ntcham Philémon 1 Bible Online

Philémon 1 - Ntcham bible

Philémon 1

¹Man Pɔɔl un sá usarkadaan Yeesu Kriisitoo puee nì ti-nabiki Tiimootee di ŋmàń kugbɔŋu nee. Ti ŋmàn̄-ku kí tīī sii Fiileemɔn ti-tɔntɔnjuti un ti néeńee,

²nì ti-niisal Apiya nì Arisiipi[1] ti-janjajuti, nì Kriisitoo nikitil din kpáfí a-diikunee ní.

³Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

⁴Baabadal, m yaa bí ki mèé m-Nimbɔtiuee, m téetí a-pu ki jáaḿ-u a-pu,

⁵kun puee m gbìl̀ bi sòoǹ a-fookiiu un a cáá ti-Dindaan Yeesu puee nì dineendi din a cáá Unimbɔti yab kɔkɔ mun puee pu.

⁶M mèé-u yii fookii un yāntì ti nì si ŋá ubaantee ń mɔ̀tīí yàntī á béé tiŋan tin kɔkɔ Unimbɔti ŋáań-ti Kriisitoo puee.

⁷M-nabiki, a-neendi din a cáá nnabiyaamu puee mɔ́ɔkiǹ-mi ki tīī-mi kunyannyaau tikpil, kun puee a tīī Unimbɔti yab kunyannyaau.

⁸Míǹ puee, nì min kɔkɔ ti nì Kriisitoo ŋá ubaantee, m bàà ŋūǹ kí dàkà-si min sá á ŋée,

⁹ama man kaa làá dī míǹ pu. Nì dineendi puee, man Pɔɔl un sá utikpil ki gíti tí sá usarkadaan Yeesu Kriisitoo puee làá gbàam̀-si ní.

¹⁰M gbàam̄-si m-biki Ɔneesiim pu. Sarkan dooyee, man di kpántì u-baa nnimbɔtisan poon.

¹¹Dooooyee, waa nìn kèetī-si, ama kɔŋkɔnnee u kèetī man, ki làá kèetī si mun.

¹²Kɔŋkɔnnee, u kpántì kii man m-ba wunti jandi dibee ní, ama m dū-u ki gíiǹ ki tīiń-si ú nīn bí a-cee.

¹³Kii Tibɔmɔntiil sòontam nín yāntì m bí sarkan puee, m bàà là yii ú fōō a-yil kí nīn bí m-cee kí tūtuǹ-mi kii sii nín bàà làá nīn tútúǹ-mi puee.

¹⁴Ama maa là kí ŋá míǹ kaa bālifì-si, kaa tí là kí páb́-si yii á ŋá tiŋan nee kí tīī-mi. M là yii á ŋá min a-pɔbil lèe ní.

¹⁵An yaa yíì, Ɔneesiim yíkì a-cee ŋyunti ŋubɔ fiii, án nín làá ŋá pu, u yaa láa fātì ki gítìńee, si nì u ń ŋmā kí nīn kíǹ ki bí jaanjaanee.

¹⁶Kun puee waa ti sá uyumbufantanti. Kɔŋkɔnnee u jítì uyumbu pu, u kíǹ ki sá kinabineeŋkaai ní. Man néeń-u tiŋan, ama sii làá nīn gíti néeń-u tikpil, kun puee u sá sii yumbuu ní, ní ki sá a-nabiki mun ti-Dindaan pu.

¹⁷Míǹ puee, a yaa nyí yii m sá a-bɔɔyee, á fōō-u kii a nín bàà làá fōō man puee.

¹⁸U yaa bíil̀-si tibaaa, u yaa tí jíń-si dipɔndaaa, man fōō ki ŋá m-ba.

¹⁹Man Pɔɔl m-ba di dū m-ŋal ki ŋmàn̄ní-si tibɔti nee yii, man di làá pà-si u-pɔndi din u yaa jíń-see. An taa nín̄ sá yii a nín sá m-pɔnliu, kun puee a ká difiil man puee pu ní m tɔ̀n̄-si.

²⁰Míǹ puee, m-nabiki, m cíkitì-si kifuulii. Ti-Dindaan puee á fōō m-gbaamii gbanti kí yàntī m-pɔbil ń sɔ̀ŋkì, ti nín ŋá ubaanti nì Kriisitooyee pu.

²¹M nyí m-pɔbilin yii tin m bíi ŋmà-si yii á ŋá kí tīī-mi nee, a làá ŋá án jītí míǹ pu gba.

²²Á kpáàa bɔ́ntí-mi kudii kubɔ, kun puee m nyí yii Unimbɔti làá fōō ni-wimmeem ḿ ŋmā kí fàtīí gítiń ni-cee.

²³Eepafrasi[2] man nì un bí sarkan Yeesu Kriisitoo puee jáaḿ-si.

²⁴M-tɔntɔnjutiibi Maarki nì Ariistaarki nì Deemasi nì Luuki mun jáamiń-si[3].

²⁵Ti-Dindaan Yeesu Kriisitoo ŋanti ń nīn bí ni-pu.