Read Ntcham Hébreux 1 Bible Online

Hébreux 1 - Ntcham bible

Hébreux 1

¹Dooooyee, Unimbɔti nìn dī u-bɔnaatiliibi pu nì nsàmbiyaamu tikpil pu ki sòon̄ nì ti-naanjab ŋfunyɔm tikpil.

²Ama iyunti in sá ijoolkaa nee poonee, u dī u-Jipɔɔn pu ní ki sòon̄ nì ti. Unimbɔti dī u-Jipɔɔn gbanti pu ní ki náań duulinya[1] nì tin kɔkɔ bí duulinyanee. Úǹ ní Unimbɔti lēē ní ki dū tikɔkɔ ki ŋá u-ŋaan.

³U-pu ní ti kāntí Unimbɔti nyooti nín jìl̀ miŋyee. Úǹ di sá Unimbɔti naŋku, ní ki cáá u-nyɔɔbundi din sá mpɔnee ki ŋúb́ duulinya kɔkɔ. U fíntì ti-kpitii. Boonee ní u nín jɔ́ḿ yilpu ki cūtìi kāl̀ Unimbɔti Mpɔŋkpaandaan ŋaŋgiil pú[2].

⁴Kii Unimbɔti Jipɔɔn nín jítiǹ ituun puee, míǹ ní u-yindi mun tí jítiǹ ituun yaŋ.

⁵Di sá yii Unimbɔti kaa lī ntuun ŋubɔ dalba yii: «A sá m-Jipɔɔn, kí yòon̄ díǹ kí nīn cée, man di sá a-Baa.» Waa láá sòon̄ ntuun ŋubɔ pu yii: «Man di làá nīn sá ŋu-Baa ní ŋú nīn sá man Jipɔɔn[3].»

⁶Ŋyunti ŋun u dū u-Jipɔŋkpiliu gbanti ki túnní duulinya poonee, ní u bí yii: «Unimbɔti tuuŋyi kɔkɔ ń gbàan̄ kí nyɔ̄ŋkì-u.»

⁷Kpèè Unimbɔti nín sòon̄ ituun pu yii i sá kuŋyee sèé, yii: «Ituun yáb̀ kii kubuŋuee, ní ki tūǹ úǹ tundi, ní ki tùm̀ kpaŋkpam kii ŋŋmee ki tūǹ u-tundi[4].»

⁸Kpèè u nín sòon̄ u-Jipɔɔn pu miŋyee sèé, yii: «Unimbɔti, a-beejal pée bí ní kí nīn cá jaanjaan. A làá jī a-beel nì deedee ní.

⁹A néeń tin bí deedeeyee ní ki ná tin kaa ŋān̄ee. An pu ní Unimbɔti, a-Nimbɔtiu, lútì-si, ki bātì dipɔɔpindi kpam ki sītì a-yil pu. U kāaǹ-si tinyool kakaaŋu, a jítiǹ a-jutiibi kɔkɔ[5].»

¹⁰Ní Unimbɔti gíti bí yii: «Ŋkilkaaminee, sii ti-Dindaan di nìn náań kitiŋ, a-ŋalii ní a dūu náań kutagbɔŋu.

¹¹Tíǹ kɔkɔ làá dāá púĺ ní kí sátí kii dibɔkutilee ní kí kpú, ama sii làá nīn pée bí ní.

¹²A làá dāá kpáb́ yilpu nì taapu kii kukampeeuee, ní kí cáań tipɔn kí kpántí tikpikil kii bi nín kpántí dibɔkutil pu kí dū dipɔndi kí pèen̄ puee ní. Ama sii làá nīn pée gbíntì ki bí min a bée ní, aa làá púĺ jaanjaan[6].»

¹³Unimbɔti kaa láá lī ntuun ŋubɔ dalba dalba yii: «Kàl̄ m-ŋaŋgiiliŋu pú yéè kí nīn cí ŋyunti ŋun m làá dū a-nannanliibi kí bíĺ a-taapu á tāā-bee[7].»

¹⁴Unimbɔti tuuŋyi di kaa sá bin kɔkɔ sá ŋfam ki bí ki tūǹ Unimbɔti tundeeee? U tūnní-bi ní bi dòoń ki tútúǹ bin làá ká difiilee.