Read Ntcham Hébreux 10 Bible Online

Hébreux 10 - Ntcham bible

Hébreux 10

¹Mooyiisi marab kaa nìn baasii dàkà tiŋan tin Yeesu làá cáań-tee mbaamɔmin, an nìn pée sá kunaŋu ní. Di sá yii bi nìn pée ŋáań saraabi gbanti míǹ ní dibintil sá kamaa an kaa kúntí, ama ní an kaa ŋūǹ kí yàntī bí kpántí bimɔntiibi páaa kí sútí kí pìl̄ Unimbɔti.

²Bin bin nìn ŋáań tiwaŋkuti saraabi ki tìì Unimbɔtee yaa nìn ŋá saraa míǹ diba pu bi-kpitii lēēyee, kɔnampu bi bàà nìn gbēeǹ disaraaŋal dooooyee, kun puee baa bàà gíti gbìl̀ bi-ban yii bi cáá ikpiti.

³Ibaamɔnee, an saraabee sá kí nīn téetí binib dibindi kamaa bi-kpitii pu ní.

⁴Kun puee inajaa nì iŋɔjaa fatikuu kaa ŋūǹ kí lēē ikpiti jaanjaan.

⁵An pu ní ŋyunti ŋun Kriisitoo làá nīn dòoń duulinyanee, u bí Unimbɔti yii: «Aa là kuwaŋkuluu saraabi àá tijimpin saraabi. Man ní a tīī tiwun ḿ dū-tì kí ŋá saraa kí tīī-si.

⁶Bisaraawɔkaabi nì ikpiti pɔ̄tam saraabi kaa fáatì-si.

⁷An pu ní m bí yii: Unimbɔti, m sèé, m làá cùú ŋá min làá fáatíǹ-see, kii an nín pée ŋmàn̄ m-pu min ki yóoǹ a-gbɔŋkunee[48].»

⁸Yeesu dá láá péé ki lī yii: «Aa fáatì tiwaŋkuti saraabi nì tijimpin saraabi nì bisaraawɔkaabi nì ikpiti pɔ̄tam saraabi.» U nìn lī míǹ, nì min kɔkɔ mara di pú nsan yii bí nīn ŋáań saraabi gbanti kɔkɔee.

⁹Boonee ní ki dāa lī yii: «An pu ní man bí yii: M sèé, Unimbɔti, m làá cù kí ŋá min fáatì-see.» Ní u lafun dɔ́miń ki kpītì nsaŋkpiki ŋun binib nìn dī ki nóó Unimbɔtee ní ki náań mpɔɔn.

¹⁰Yeesu Kriisitoo dɔ́miń ki ŋá min fáatiǹ Unimbɔtee. U dū u-ba ki ŋá saraa diba pu ki kúntì saraabi, ní u-saraauee fíntì ti-kpitii.

¹¹Baabadalee, usaraaŋal yú u-tundi laŋki ní, ní ki ŋáań bisaraabaantiibi múlmul, ama ní an saraabee kaa ŋūǹ kí lēē unil kpitii[49].

¹²Ní Kriisitoo úǹ dū u-ba ki ŋá saraa un bí kí nīn cá jaanjaanee diba pu timbi kpitii pu. Boonee ní ki cūtìi kāl̀ Unimbɔti ŋaŋgiil pú.

¹³U kā niin ki cí ŋyunti ŋun Unimbɔti làá dāá dū u-nannanliibi kí ŋá u-taaŋi taapu ú tāāyee[50].

¹⁴Di sá yii saraabambaanti ní u ŋá ní an fíntì binib kpitii ní saraa gbantee cáá mpɔn kí nīn cá, kí gàntī-bi kí yóoń bí nīn ŋān̄ Unimbɔti nimbiin.

¹⁵Unimbɔti Fam lī yii míǹ ní an lafun sá. Mpeekaamee, mì bí yii:

¹⁶«Ti-Dindaan bí yii dipoondi din m làá dāá líí-bi mpèé ń nīn bí man nì bi kansikin ŋyunti gbantee sèé: M làá dāá dū m-marab kí ŋá bi-pɔbiliŋin ní bí ŋmā kí nīn nyí min m lèe, ní kí tí ŋmà marab gbanti bi-landɔkɔyin bí ŋmā kí nīn ŋúb́-bi kí taa súntí.»

¹⁷Ní nliliitiimee mì gíti bí yii: «Maa làá dāá gíti téetí bi-kpitii nì bi-yìntitam pu dalba dalba[51].»

¹⁸Di sá bi yaa dū unil kpitii ki pú-uee, an kaa ti cáá saraa ubɔ ú gíti ŋá ikpitee pu.

¹⁹An puee nnabiyaamu, Yeesu nín kpíì u-fatikuu nyáńee ní nsan dōoǹ tí jītí kí kɔ́ circir páaa laŋki laakin Unimbɔti bée.

²⁰An sá nsampɔɔn ŋun tìì dimaŋfalee ní Yeesu pīitì-ti ki dī ŋŋaabu ŋun nìn pītì circir laŋki nì circir páaa laŋkee. Ŋŋaabuee di sá u-wunti.

²¹Ti nín cáá usaraaŋakpil un Unimbɔti kāaǹ u-dicaŋku puee,

²²tí sútí kí pìl̄ Unimbɔti nì dipɔbil diba nì dimákabaamɔndi, kí fíntí ti-pɔbiliŋ poon ilandɔkɔkpiti án nyā dándan, kí dū nnyim min ŋān̄ circiree kí fàl̀ ti-wunti ń nyā[52].

²³Tí nīn gbíntì ki ŋúb́ ti-mákal din ti lì yii ti cááyee gbīŋgbim, kun puee u nín pōoǹ yii u làá ŋá miŋyee, u làá lafun ŋá míǹ ní.

²⁴Tí nīn ŋúb́maan tɔb tiŋan kí nīn nyàatī tɔb, ti-neendi ń mɔ̀tīí nīn wīintí, kí nīn tūǹ atummɔnti,

²⁵kí taa fàtī ti-boon kí tīī Kriisitoo nikitiŋ kooŋyi kii an nín kpántì biba bimbim baa ti dòoń puee. Ama nín̄ tììmaan tɔb kunyannyaau, kun puee nimbi ni-ba nyí yii ti-Dindaan wiiŋŋu tóobiń.

²⁶Ti yaa béè ibaamɔn ní ki fōō-i, ní boonee ti gbíntì ki nìkì ki ŋáań ikpiti ti nín là puee, tí béé yii saraa ubɔ gíti kpá bí ŋá án lēē ti-kpitii.

²⁷Ama tin kíǹ tí nīn cée di sá ditafadaakpaandi din sá ŋŋmi ki gà lìblib ki làá wà Unimbɔti nannanliibee[53].

²⁸Un yaa nìn yīntiǹ Mooyiisi marab, ní binib bili kii bita yaa lēē seera yii bi ká u nín yīntì puee, bi nìn kù-u ní baa sūǹ u-saai[54].

²⁹Ní kpèè ditafadaaldi dilal ní un kpēē Unimbɔti Jipɔɔn fám kaa dū fatiku un Unimbɔti dū ki líì-ti dipoondee ki yíiń tibee máaǹ? Ama fatikuee ní bi dūu fíntì u-kpitii, ní boonee u kíǹ ki kɔ̄ntí Unimbɔti Fam min min pú-u an yimɔɔlee diŋuul.

³⁰Ti nyí Unimbɔti un di lī yii: «An sá man Unimbɔti di làá dāá tɔ̀ ipɔntoon, man di làá dāá pà tipaal,» ní ki gíti bí yii: «Man di làá dāá sòoǹ m-samaau bɔti[55].»

³¹Sii un yaa kɔ́ Unimbɔti un bí nee bɔtinee, an dóò sii pu dee!

³²Téetímaan ŋkpikim ni nín nìn fōō Kriisitoo ki kíí ki ká ŋwalifi ŋuŋyee, nì falaabi bin ní ni nìn jíń tikpil kaa fātìi tɔ́ee.

³³Iyunti ibee, bi sìí-ni, iyunti ibee, bi cáǹ-ni diniwul nimbiin ki sàantí, iyunti ibee, ni bí ki sūǹ bin bi sàantée saai.

³⁴Míǹ ní ni nì bisarkadambi yākatì bi-falaau. Bi yaa nìn cúú ni-wanti ki fōōyee, an kaa nìn páb́-ni, ni-pɔbiliŋ nìn sɔ̀m̀, kun puee ni nyí yii ni cáá tigaajamɔntiil tin làá nīn bí jaanjaanee an dɔ̄ yilpu.

³⁵An puee ní taa páatí ni-mákal, ipaatikpaan dɔ̄ ki cí-ni.

³⁶An máaǹ ní nīn cáá dipɔ́ɔǹdi ní kí ŋmā kí ŋá min Unimbɔti lèe kí wàatī ní kí nín ká tin u pōoǹee.

³⁷An bí kii an nín ŋmàn̄ Unimbɔti gbɔŋku poon puee yii: «An kíǹ ŋyunti fiii nàanyɔkɔ ní un làá dāan̄ee ń bàń, an kaa làá ti yúntí.

³⁸Un bí deedee m-nimbiinee fookiiu pu ní u làá ŋmátí, ama u yaa gítì u-boonee, ubɔti kaa dāa gíti fáatiǹ-mi[56].»

³⁹Timbee, taa sá bin gítí bi-boon ki wáŋkée, ama ti sá bin fōō ki kíí ki cáá dimaŋfalee ní.