Read Ntcham Hébreux 11 Bible Online

Hébreux 11 - Ntcham bible

Hébreux 11

¹Á nīn cáá fookiiyee taapu sá yii: á nīn cɔ́tí tiwan tin pu a mákée, ama aa wāĺ-tì ní ki nyí yii tì bí.

²Fookii un Unimbɔti nib dooooyee yab nìn cááyee pu ní bi ká disíndi Unimbɔti cee.

³Fookii un ti cáá Unimbɔti puee di yì-tì ní ti nyí yii an sá nì u-nyɔɔbundi ní u dū ki náań duulinya, di sá duulinya wanti tin kɔkɔ ti wāĺ nee nyánní dinyɔɔbundi din taa wāĺee poon ní[57].

⁴An sá fookii un Abeel nìn cáá Unimbɔti puee di yì-tì saraa un u nìn ŋá ki tīī-uee nìn ŋān̄ ki jítiǹ Kayeen yɔu. U-fookiiu gbanti pu ní u kpántì deedeedaan Unimbɔti cee, kun puee Unimbɔti nìn fōō u-saraau. U-fookiiu puee, nì min kɔkɔ u kpíìyee, u-bɔti bí bi sòoǹ díǹ[58].

⁵Eenɔki fookiiu un u nìn cáá Unimbɔti puee di yì-tì ní waa kpíì. Unimbɔti nìn yōoǹ-u ki cáá-u ki jɔ́miǹ u-cee ubɔ kaa ti ká-u. Unimbɔti gbɔŋku poon lī yii Eenɔki nìn pée fáatì Unimbɔti dooooyee ní ki wāatì u dāa nín yōoǹ-u[59].

⁶Unil yaa kaa fōō Unimbɔti ki kííyee, udaan kpá kí fáatí-u. Di sá yii un là kí sútiń kí pìl̄ Unimbɔtee máaǹ kí nīn nyí yii Unimbɔti bí, ki tìì bin nyàab̀-u nì dipɔbil dibee tipaal.

⁷Fookii un Noowa nìn cáá Unimbɔti puee di yì-tì ní Unimbɔti nín nìn kpáafì-u yii nnyiŋgbeen dòońee, u nìn fōō ki kíí kaa láá ká-mì, ní ki nìn kíĺ ki bíi kpáà meela un poon u nì u-dicaŋku làá kɔ́ kí ŋmátée. U-fookiiu un u nìn cáá Unimbɔti puee di dàkā duulinya yab bɔkpil ní úǹ kpántì deedeedaan Unimbɔti nimbiin[60].

⁸Fookii un Abraam nìn cáá Unimbɔti puee di yì-tì ní ŋyunti ŋun Unimbɔti nìn yíiń-u ki bí ú yīkì u-tiŋkin kí nīn cá kitiŋ kin u làá pòon̄ kí tīī-uee nee, u lafun nìn yíkì míǹ kaa nyí laakin pú ní u nìn túĺ ki cée.

⁹Nì fookii un u nìn cáá Unimbɔti puee ní u bàn̄ kitimpooŋkaayin ki gāā tanti ki kóò kii unicaanee. Míǹ ní Isaaki nì Jaakɔb bin mun nìn yíkì ki tɔ́kɔǹ dipoondi gbanti puee nìn gāā tantib ki kóò.

¹⁰Di sá Abraam nìn kā ki cí kitiŋkpaaŋŋi kin diiŋŋi Unimbɔti u-ba kítì ki máń, ŋi yú ki pɔ̄ɔ̄yee ní.

¹¹Fookii un Saara nìn cáá Unimbɔti puee di yì-tì ní nì min kɔkɔ u nìn púĺ ki jítì mmaal puee, u ŋúń ki màl̄ ki kpántì ditimbundi na, kun puee u nìn fōō ki kíí yii Unimbɔti nín pōoǹ miŋyee, u làá ŋá míǹ[61].

¹²Míǹ ní Abraam unibaanti un púĺ ki jítì mmaal puee màl̄, u-naantiibi būtì ki wīikí kii iŋmalbijaayee, baa ŋūǹ kí kàaǹ-bi, a lì kii bi nín kaa ŋūǹ kí kàaǹ dibul din dɔ̄ tiŋku gbandee puee[62].

¹³Nì fookii poon ní an nibee kɔkɔ dūu kpíì kaa kpáàa fōō tin Unimbɔti nìn pōoǹee. Bi nìn ká tì nín páaǹní ndan ki dòońee, ní bi jáam̀-tì, ní ki bí yii bíǹ sá binicambi ní ki kóò duulinyan[63].

¹⁴Bi nín sòoǹ miŋyee dàkà ki cántí-ti yii bi bíi nyàab̀ kitiŋ ní kí nīn kóò.

¹⁵An yaa nìn sá kitiŋ kin poon bi nìn yíkèe pu ní bi yaa nìn bíi yáliŋkée, bi bàà nìn ŋūǹ kí fàtīí nīn gítí niinaa!

¹⁶Ama ibaamɔnee, bi nìn baasii nyàab̀ kitimmɔntii ní, an dàkà yii yilpu tiŋki. An pu ní bi nín yíì Unimbɔti yii bi-Nimbɔtiuee, an kaa cáá-u icoo, kun puee u bɔ́ntì-bi kitiŋ ki yóoǹ yilpu.

¹⁷Fookii un Abraam nìn cáá Unimbɔti puee di yì-tì ŋyunti ŋun Unimbɔti nìn cɔ́ŋkì-u ki bí yii ú dū u-jipɔmbaabil Isaaki kí ŋá-u saraayee, waa nìn ŋmɔ́ mmɔ́ɔn, nì min kɔkɔ Unimbɔti nìn líì-u dipoondee.

¹⁸Unimbɔti nìn pōoǹ-u yii: «Isaaki di làá bùtī a-maaliŋu ŋun làá dāá fōō a-yindee[64].»

¹⁹Ama Abraam nìn fōō ki kíí yii u yaa dū u-biki ki ŋá saraa ki tīī Unimbɔtee, Unimbɔti làá fàtīí fìkitī-kì, míǹ ní an lafun ŋá kii u fīkitì-kèe. Unimbɔti gíiǹ u-biki ki tīī-u, kun puee Abraam ŋman nìn pée kūū-kì ní.

²⁰Fookii un Isaaki nìn cáá Unimbɔti puee di yì-tì ní u nìn mēē ki bīiǹ Jaakɔb nì Eesayuu pu tin làá dāá bàń bi-pu foolboonee.

²¹Fookii un Jaakɔb nìn cáá Unimbɔti puee di yì-tì u nín púĺ ki cīkiǹ ŋkúmee, u nìn mēē Unimbɔti ki bīiǹ Jooseefi biyaamu liitil pu ki nyīī u-kpandɔŋu pu ki nyɔ́ŋkí Unimbɔti[65].

²²Jooseefi nìn fōō Unimbɔti ki kíí. An di yì-tì ní ŋyunti ŋun u tóob́ ŋkúmee, u nìn sòon̄ Unimbɔti nín làá dāá nyāntí Isirayeel yab Eejipiti tiŋkinee. An puee ní u nìn tīī-bi mara ki dàkā-bi bi nín làá dāá ŋá u-kpabiŋ puee[66].

²³Fookii un Mooyiisi baa nì u-na nìn cáá Unimbɔti puee di yì-tì ní bi nín màl̄ Mooyiisee, bi dū-u ki bál̀ áli iŋmal ita. Bi nín ká kibiki nín ŋān̄ miŋyee, baa ti fāŋkì ubɔti marau un u yóoǹ yii bí kpɔ̀ mbiyaamuee.

²⁴Fookii un Mooyiisi nìn cáá Unimbɔti puee di yì-tì ní u nín wíiǹee, u nìn yíì yii waa là kí nīn sá ubɔti Faaroo bisal jipɔɔn[67],

²⁵ki là kí nīn bí Unimbɔti nikitilin bí kpāfì bi-kɔkɔ kí sàaǹ. Míǹ nìn mɔ̄ǹ-u ki jítiǹ ú nīn bí ikpitin ki jīǹ mmɔn ŋun kaa làá yúntée.

²⁶U nìn ká yii, ú jī falaa kii Meesiya nín làá dāá jī uŋyee ŋān̄ ki jítiǹ Eejipiti gaajawanti kɔkɔ, kun puee u nìn wāĺ tipaal tin bí nyɔkɔpuee ní.

²⁷Fookii un Mooyiisi nìn cáá Unimbɔti puee di yì-tì ní u nìn yíkì Eejipiti tiŋkin, kaa fāŋkì diŋuul din ubɔti fōōyee pu, ní ki ŋúb́ Unimbɔti un baa wāĺee bɔti an píkí gbīŋgbim kii u wāĺ-uee.

²⁸Fookii un u nìn cáá Unimbɔti puee di yì-tì u nìn fōō Unimbɔti nyɔkɔ ki jíń Dilákatil jiŋaaliu, ki nìn yāntì bi dū ipiiyee fatikuu ki ŋmītì mpunyɔmu pu, án nín làá ŋá pu ntuun ŋun làá kpɔ̀ Eejipiti yab jipɔŋkpilibee ń taa gbēē Isirayeel yab báà ubɔee.

²⁹Fookii un Isirayeel yab nìn cáá Unimbɔti puee di yì-tì ní bi nìn dūtì Tikati mɔɔl kii kitiŋkuliŋŋee, ama Eejipiti yab mun nìn mākaǹ kí dùtī ní dimɔɔl dū-bi ki náĺ[68].

³⁰Fookii un Isirayeel yab nìn cáá Unimbɔti puee di yì-tì bi nìn cūtì ki cōom̀ ki māntì Jeeriikoo tiŋki. Iwiin iluli dalee, agun nìn cúu kpīkitì ki lítì.

³¹Fookii un Raab kinimpulaakpaayee nìn cáá Unimbɔti puee di yì-tì ní baa nìn kūū-u ki kpáaǹ binikpitib, kun puee u nìn ŋá tiniti ki fōō binib bin bi nìn tú bí cù kí cɔ̄ŋkì kitiŋee[69].

³²M làá gíti lì yii ba? Mpaan kaa bí-mi ḿ sòoǹ Geedeeyɔn nì Baraaki nì Samsɔn nì Jeefita nì Daafiidi nì Samiyeel nì Unimbɔti bɔnaatiliibi pu[70].

³³Bi fookiiu un bi nìn cáá Unimbɔti puee di yì-tì ní bi nìn jáà ki pɔ́ɔkiǹ bibɔtiibi bin kíǹee nì bi-timmu. Biba mun fookiiu pu ní bi nìn yāntì binib ŋáań tin bí deedeeyee, ní biba mun fookiiu pu ní bi nìn fōō tin Unimbɔti pōoǹ-bee. Bi nìn cúú biba ki tɔ́ laakin bi kpàá gbikintibee ní baa nìn ŋúń ki tábitì bi-nyɔmmu ní kaa nín ŋúń ki ŋá-bi tiba bi-fookiiu pu.

³⁴Ŋŋmi gà lìblib bi téé biba ki tɔ́ poon, an kaa ŋá-bi tiba bi-fookiiu pu. An bàà nìn sá bí kpɔ̀ biba nì ntàataajimu, ama fookii un bi nìn cáá Unimbɔti puee puee, bi nìn ŋmátì. Biba nìn būǹ ki pɔ́ɔkì. Biba nìn sá ŋwɔsɔfimu, bi-fookiiu puee, bi kpántì bibaatandambi. Biba fookiiu puee, bi nìn cúú bi-nannanliibi.

³⁵Binimpoobi fookiiu un bi nìn cáá Unimbɔti puee di yì-tì bi fīkitì bi-yab bin kpíìyee ki tīī-bi[71]. Biba fookiiu puee, bi nìn sāaǹ-bi kí kpɔ̀-bi, ama bi nìn yíì yii bí taa fīī-bi, kun puee bi nyí yii bi làá dāá fìkitī kí nīn kíǹ ki bí dimaŋfal din kaa cáá dikúntilee ni.

³⁶Bi nìn bēel̀ biba ki gbáń-bi anaalab, ki nìn gúĺ biba nì ikusaka ki cáa tɔ́ sarka.

³⁷Biba fookiiu un bi nìn cáá Unimbɔti puee, bi nìn yáŋkì-bi ataŋkpee ki kūū, ki nìn sēekìi nābitì biba agin ali, ki nìn dū ntàataajimu ki kūū biba. Biba kaa nìn cáá tiba kí pèen̄, see ipii nì iŋoobu gbaŋyi ní bi nìn pèentí. Biba mun nìn sá bisoodambi, ní bi nìn páb́ biba ki sàantí-bi ní bi sáń ki póotí ajan kɔkɔ[72].

³⁸Binib gbanti circiriu puee, baa bàà nìn máaǹ kí kàl̄ duulinyan doo. Bi nìn yíkí ní ki cá kuteeun nì ajoon pu, ki kóò itaŋkpalɔkɔn nì afaginni.

³⁹Unimbɔti u-ba ká yii an nibee kɔkɔ nìn lafun fōō-u ki kíí, ama nì míǹ kɔkɔee, baa nìn fōō tin Unimbɔti nìn pōoǹee.

⁴⁰Kun puee Unimbɔti bɔ́ntì tin sá timɔntiilee ki yóoǹ, kaa dá láá dūu tīī-bi ki cíitì ti-kɔkɔ yaa kpáfèe, ú dūú yàkatī-ti.