Read Ntcham Hébreux 12 Bible Online

Hébreux 12 - Ntcham bible

Hébreux 12

¹Kii kunipaau kun nìn cáá fookii Unimbɔti puee nín māntì ki tú-ti pu, ki kpèé-ti puee, ní yàntī tí fámaan atuŋkpiti ŋin cāabìń-ti digìńdee nì ikpiti in kaa pɔ̄ɔ̄-ti dicuulee, kí sāǹ nì dipɔ́ɔǹdi ditaatandi din Unimbɔti náká ki yóoǹ-ti tí sāǹee.

²Ti-nimbikpeeŋu ń nīn pée cɔ́ Yeesu pu. Úǹ di nāantí fookii ti-ni kí tin cáá kátí-ku. U kíí ki kpíì ndɔpuntikaa kúm min sá icoo nì kpeefamee, kun puee u nìn nyí dipɔɔpindi din dɔ̄ ki cí-uee. Kɔŋkɔnnee u cūtìi kāl̀ Unimbɔti ŋaŋgiiliŋu pú dibeelin.

³Ní dàkafì u nín kaa mɔ́tì u-ba pu ki gīī digìńdi din binikpitib ŋaanee, an di ŋūǹ kí yàntī ní taa pɔ̄ nsan diwuŋyɔtil ń kɔ́-ni.

⁴Doooo nee, naa láá jáń nì ikpiti áli fatiku nyáń.

⁵Ni súntì isaŋki in Unimbɔti nìn sáŋkì-ni kii ubaati nín sáŋkí u-jipɔmbi pueeee? U nìn bí-ni yii: «M-jipɔɔn, ti-Dindaan yaa bíi dàkà-see, á taa dūú kpèè fám. U yaa dáaĺ a-tafalee, á taa yɔ̀tī a-wunti.

⁶Kun puee un ti-Dindaan néeńee ní u dàkà, ní ki dátí bin kɔkɔ u fōō ki ŋá u-jipɔmbee tafal[73].»

⁷An puee, Unimbɔti yaa bíi sáŋkí-nee, ní pɔ́ɔǹ ni-ba. Ni nín sá u-biyaamuee pu ní u ŋáań-ni míǹ, kun puee kibiki kpá ki-baa kaa sáŋkí-kì.

⁸Ubaati yaa bíi dàkà u-biyaamu ní kaa bíi dàkà nimbee, mimmee waa yì nimbi dee, naa sá u-bimaalkaamu.

⁹Tí kpèè ti-baabi bin màl̄-tee nín dàkà-ti ti tɔ́-bi miŋyee, kin ataa aŋa pu ní taa máaǹ kí nīn tɔ́ Ubaati un yì ŋfamee kí ká dimaŋfal!

¹⁰Ti-baabee, bíǹ dàkà-ti ŋyunti ŋubɔ ní kí tin sāā min bi lèe ní kí gbèen̄, ama Unimbɔti úǹ nín dàkà-tee, an sá ti-ŋanti ní, kun puee u là tí nīn bí circir kii úŋ̀wuee ní.

¹¹Ibaamɔn didàkal kaa mɔ̄, ŋyunti ŋun a bí di-poonee. An wù ní, ama boonee, bin bi dàkēe kpántí binimɔntiibi ní kí páatí dipɔɔsɔŋkil nì deedeebítam.

¹²An puee, nimbi bin ŋalii nì ni-taaŋi yɔ̄tèe, pɔ́ɔm̀maan ni-ba kí ká kunyannyaau,

¹³kí nìkī ni-taatandi kí dī nsan ŋun tèen̄ee[74] pu án nín làá ŋá pu ditaal din wùee ń taa gíí ama dí pɔ̄ɔkèe.

¹⁴Ní pɔ́ɔǹ ni-ba ŋgbansɔŋfi ń nīn bí ni nì báà ŋma kansikin, kí nīn bímaan circir. Kun puee un yaa kaa bí circiree kpá kí ká ti-Dindaan.

¹⁵Ní nīn nyíǹ ni-ba ubɔ ń taa fá diyimɔɔl din Unimbɔti tīī-tee, kí nīn nyíǹ ni-ba ubɔ ń taa kpántí kii kisubiki kin cáá tiloolee kí dū u-lootee kí bīil̀ kunipaau[75].

¹⁶Ní nīn nyíǹ ni-ba ubɔ ń taa ŋá tilaakpaal, kí taa kpèè Unimbɔti fám, kii Eesayuu nín nìn ŋá pu, tijin puee u dū u-kpiti ki nyáfèe.

¹⁷Kéè, ni nyí yii boonee, u nín dāa nyàab̄ kí fōō difakal din ujipɔŋkpil fòol̄ee, waa ti káa! Nì min kɔkɔ u dū nnyinnyim ki nyàab̄ u nín làá dī pu kí kpántí min u nìn lēe, waa ká[76].

¹⁸An kaa sá dijool kii Siinaayi joolee ní ni sútìń ki pìl̄: laakin ŋŋmi wù, dibɔmbɔndi dɔ́miń, kubuŋkpaaŋŋu jítì,

¹⁹ní dikantándi búń ki pɔ̄ɔ̄ kpaŋkpam, ní nneen ŋubɔ sòon̄ee. Isirayeel yab nín gbìl̄ nneenee puee ní bi gbāam̀ yii ŋú taa ti sòoǹ[77].

²⁰Di sá yii bi nìn fāŋkì Unimbɔti nín sòon̄ yii: «Un yaa gbēē dijool neeyee, báà an yaa sá kuwaŋkuluuaaa, bí yāŋkì-ku ataŋkpee kí kpɔ̀ee.»

²¹An nìn cáá dipɔɔbiildi kaa bí ŋkpèé, áli Mooyiisi u-ba bí yii: «M fāŋkì yɔ́kɔ́ yɔkɔ.»

²²Ama nimbi dɔ́miń Siiyɔn jool taapu nì Unimbɔti un bí dimaŋfalinee dumpu Jeerusaleem un bí yilpuee, laakin ituun cutimaanyi kpátì ki bí mmɔnnee ní.

²³Nimbi dɔ́miń laakin bin sá Unimbɔti biyaamu mun u péé péé ki màl̄ bi-yiŋŋi ŋmàn̄ yilpuee kpáfée ní. Ni dɔ́miń Unimbɔti u-ba cee ní, úǹ di sòoǹ binib kɔkɔ bɔti nì binib bin bí deedee Unimbɔti yāntì bi-nammu kpántì mmɔntiimu baa kāntí mu-pu tikpitil tibee.

²⁴Nimbi dɔ́miń Yeesu un cáań-ti dipoompɔndi ki dū u-ba ki tīī u-fatikuu fíntì-tee cee ní, u-fatikuuee sòoǹ tiŋan ki jítiǹ Abeel[78] yɔu.

²⁵An puee ní nīn nyíǹ ni-ba kí taa yíí un bí ki sòoǹ nì ni nee nyɔkɔ[79]. Bin nìn yíì kaa fōō un nìn bí bi-cee taapu doo ki sòoǹ nì bee nyɔkɔee, bi nìn dáaĺ bi-tafal ní, kin ataa aŋa ní ti yaa yíì kaa fōō un nyánní yilpu ki sòon̄ nì tee nyɔkɔee, taa kāntí ditafadaaldi!

²⁶U nín nìn sòon̄ dijool puee, kitiŋ nìn cīŋkì ní, ama kɔŋkɔnnee u pōoǹ yii u làá dāá gíti cìŋkì kitiŋ. Niinee an kaa dāa sá kitiŋ ŋmaniŋma, u làá dāá cìŋkì kí kpáaǹ yilpu mun[80].

²⁷Anyɔɔbun ŋin sá yii «u làá gíti cìŋkèe» dàkà yii tin kɔkɔ u náańee, ní tin kaa bá ki pɔ̄ɔ̄yee ń lítí kí wāŋkì kí kíń tin bá ki pɔ̄ɔ̄yee.

²⁸Kii Unimbɔti nín kāaǹ-ti Dibeel din bá ki pɔ̄ɔ̄yee poon puee, tí jāam̀-u u-ŋanti gbanti pu kí nīn ŋáań min fáatì-uee kí nīn tɔ́-u nì tifaandi poon kí dàkà-u yii ti nyí tiŋan tin u ŋá ki tīī-tee.

²⁹Di sá yii ti-Nimbɔtiu sá ŋŋmi ŋun wù ki céetée ní[81].