Read Ntcham Hébreux 13 Bible Online

Hébreux 13 - Ntcham bible

Hébreux 13

¹Ní nīn néeḿmaan tɔb kii nnabiyaamu nín néeń tɔb puee án taa gbèen̄.

²Ní téetí yii ni máaǹ kí nīn fòol̄ binicambi, kun puee biba nìn fōol̀ binicambi míǹ ní ki dāa kpáàa fōō Unimbɔti tuuŋyi kaa béè[82].

³Ní nīn téetímaan bisarkadambi pu kí jī bi-falaau kii ni nì bi kɔkɔ di kpáfì ki bí sarkanee, kí nīn téetí bin bi sàantée pu kii ni nì bi kɔkɔ ní bi kpáfì ki sàantée.

⁴Ní tīīmaan dinimpucaal àá dicamɔndi tinyool, ní unimpu nì u-cal ń yūlíǹ tɔb deedee, di sá yii Unimbɔti làá dāá dáaĺ bilaakpaadambi nì bijɔkɔndambi tafal.

⁵Ní taa yàntī nnimbineel ń jī ni-pɔbiliŋ poon mpaan, ama ní yàntī án nīn mɔ̄ǹ-ni fiii un ni cááyee pu, kun puee Unimbɔti lī yii: «M kpá kí yàntī-si fám, maa làá dū-si kí fá míǹ jaanjaan[83].»

⁶An pu ní ti cáá dimákal kí lì kí tɔ́kɔń dinyɔɔbundi nee pu yii: «Unimbɔti di jòoń-mi, an puee maa fàŋkí tiba, Ba ní unil làá ŋmā kí ŋá-mi[84]?»

⁷Téetímaan ni-kpilib bin nìn dàkā-ni Unimbɔti bɔtee pu, kí dàkafì kí kpèè min ní bi nìn nóó Unimbɔti ki dāa kpíìyee, ki mun ń bīfì bi-fookiiu un bi cáá Unimbɔti puee.

⁸Kun puee Yeesu Kriisitoo kaa kpántí. U nín nìn pée bí puee, míǹ ní u gbíntì ki bí díǹ, ki làá nīn pée bí míǹ kí nīn cá jaanjaan.

⁹Binib nyántì tibɔpɔn tin nyáń ti-bee ki dàkà, ní taa yàntī bí dū an bɔtee kí dàkà-ni ní gáatí. An ŋān̄ yii diyimɔɔl din Unimbɔti pú-tee pu ní tí nīn kāntí mpɔn, án taa nín̄ sá marab bin binib ŋúb̀ ki kòó tijin tibee pu. Bin ŋúb̀ an marab gbantee kaa ká ipaati iba poon[85].

¹⁰Timbi saraafaŋŋu ŋun ti cááyee, Juuda yab saraaŋaliibi kaa ŋūǹ kí jī nsaraafan gbanti pu jinti.

¹¹Di sá Juuda yab saraaŋakpiliu nìn kù tiwaŋkuti ní kí lēē fatiku kí kɔ́ǹ circir páaa laŋki kí ŋá saraa binib kpitii pu, ní kí yòon̄ tiwaŋkutee kí nyāntí kitiŋ kpaanceetiŋu kí dūú wà ŋŋmi[86].

¹²Míǹ mbaantiim ní bi ŋá Yeesu, bi nyántì-u kitiŋ kpaanceetiŋu[87] ní ki kūū-u. An ŋá míǹ u-fatikuu ń fíntí binib kpitii.

¹³An puee ti mun ń nyā kitiŋ kpaanceetiŋu kí cù u-cee bí bèel̀-ti kii bi nín bēel̀-u puee.

¹⁴Kun puee duulinya kaa sá-ti kitiŋ kin làá nīn bí ki cá jaanjaanee, an pu ní ti bí ki nyàab̀ yilpu tiŋki kin làá nīn bí jaanjaanee.

¹⁵Yeesu puee ti-nyɔŋkii ń nīn sá saraa ti tìì Unimbɔti múlmul, an dàkà yii tí nīn pàkà u-yindi kí taa gbèen̄.

¹⁶Ní taa súntí tiŋan diŋál pu, kí nīn tútúǹ tɔb, míǹ di sá saraabi bin ŋān̄ Unimbɔti ceeyee.

¹⁷Ní nīn tɔ́ bin kpòotī-nee kí sìntī ni-ba taapu kí tīī-bi. Bíǹ di mɔ́tí ni-nammu pu, kun puee bi dāa cáá kí sòoǹ bi-nyɔkɔpu yai Unimbɔti nimbiin. An puee, ni yaa tɔ́-bee, bi mun tūǹ bi-tundi nín sá puee nì dipɔɔpindi ní, ama bi yaa tūǹ ni-pu ditundi bi-pɔbiliŋ kaa sɔ̀m̀ee, nimbi ní an gīintí boon.

¹⁸Ní nīn gbíntì ki mèé ti-pu. Ti nyí ti-pɔbiliŋ poon yii ti ŋá tin máaǹ tí ŋée. Ti là ŋyunti kɔkɔ poonee tí nīn ŋáań min bí deedeeyee ní.

¹⁹M là ní baasii mèè m-pu, Unimbɔti ń pɔ̄-mi nsan ḿ ŋmā kí gítiń ni-cee malaa.

²⁰Unimbɔti di tìì-ti ŋgbansɔŋfi. U fīkitì ti-Dindaan Yeesu un di sá upikpaakpilee ditaŋkpiilin. U-saraau fatikuu di náań dipoompɔndi din kaa kúntée ki tīī-ti.

²¹Unimbɔti gbanti ń tīī-ni ŋŋmam ní nīn pée ŋáań tin ŋān̄ee nì tin u lèe. Yeesu Kriisitoo puee, ú dī ti-pu kí ŋá min fáatiǹ-uee. Úǹ Yeesu Kriisitoo ní bí nīn pée tìì tinyool kí nīn cáa cá jaanjaan! Ameeni.

²²Nnabiyaamu, tibɔti tin m ŋmàn̄-ni nee kaa fɔ̀kɔ̀, m mèé-ni ní jī kimɔtii kí pīlifì m-saŋkii gbanti.

²³M là ní kpáàa béé yii bi líì ti-nabiki Tiimootee[88] sarkan. U yaa bāań ti-cee malaayee, man nì u di làá táá kí dāá màntì ni-pu.

²⁴Ní jāam̀ ni-kpootiliibi bin kpòotī-ni nnimbɔtisan poonee nì bin kɔkɔ nóó Unimbɔtee. Ti-nabiyaamu mun bí Italii tiŋkinee jáaḿ-ni.

²⁵Unimbɔti ŋanti ń nīn bí ni-kɔkɔ pu!