Read Ntcham Hébreux 2 Bible Online

Hébreux 2 - Ntcham bible

Hébreux 2

¹An puee, an máaǹ yii tí ŋúb́ ibaamɔn bɔti tin ti gbìl̄ee tiŋan án nín làá ŋá pu tí taa wāŋkèe.

²Kun puee Unimbɔti nín nìn yāntì ituun sòon̄ tibɔti tiŋyee[8], bi ká ti-baamɔŋyi. Di sá yii bin nìn yīntì kaa tɔ́ ituunee nín lī puee nìn ká ditafadaaldi din máaǹ-bee.

³Ti mun yaa yíì kaa fōō difiil dikpaandi din bí neeyee, mana ní ti làá ŋá kí ŋmátí kí nyā ditafadaaldin? Ti-Dindaan Yeesu di péé ki sòon̄ difiil gbanti bɔti ní bin gbìl̄-tèe tùkū-ti tì nín sá ibaamɔn miŋyee.

⁴Ní Unimbɔti ŋáaǹ tidaandi nì maamaacib[9] ki dū u-pɔŋŋu ki túń atuun kupaau kí dàkà yii tin bi sòon̄ee sá mbaamɔn, ní ki yākatì u-Fam pɔŋŋu min fáatì-uee ki tīī binib.

⁵Di sá duulinya un bí ki dòoń ti bí ki sòoǹ u-pu nee, an kaa sá ituun di làá dāá nīn kpòotī-u.

⁶Ubɔ lī Unimbɔti gbɔŋku poon laaba yii: «Unil sá ba ní a téetí u-pu ní? Nisaal bí tilatin ní a kpèé-u ní?

⁷A sīntiǹ-u taapu ŋyunti ŋubɔ fiii ituun ń jītíǹ-u. Ama kɔŋkɔnnee a tīī-u tinyool nì kupampakau poon,

⁸ní ki tīī-u mpɔn tiwan kɔkɔwoooo pu[10].» Unimbɔti nín tīī-u mpɔn tikɔkɔ puee dàkā yii tiba kaa kíǹ kaa bí u-taapu. Nì míǹ kɔkɔee, taa láá wāĺ tiwan kɔkɔ nín bí u-taapu kɔŋkɔnnee puee.

⁹Ama tin ti dáań ki kée di sá yii Yeesu un ní Unimbɔti sīntiǹ taapu ituun jítiǹ-u ŋyunti ŋubɔ poon fiiiyee, kɔŋkɔnnee ti wāĺ-u tinyool nì kupampakau poon ní. Ŋkúm min u jíń falaa ki kpíìyee pu ní Unimbɔti yōoǹ-u yilpu míǹ. Unimbɔti ŋanti pu ní Yeesu kpíì an kúm binib kɔkɔ pu.

¹⁰Unimbɔti di náań tikɔkɔ nì tikɔkɔ ní u-pu ní tikɔkɔ bí. U là inibool tikpil ń kpántí u-biyaamu kí kɔ́ u-nyootin. Di sá yii Yeesu di fìil̄-bi, míǹ puee an kítì yii Unimbɔti ń dī u-falaabi bin u jíńee pu kí yàntī ú kpántí mmɔm.

¹¹Un kpántí binib circiree nì bin kpántì circiree kɔkɔ Baa sá ubaanti ní, an pu ní an kaa cáá Yeesu icoo ú yíiń-bi u-naalib.

¹²U lī yii: «Unimbɔti, m làá sòoǹ nì m-naalib a nín sá uŋyee, kí gāā ilan kí pàkà-si kunipaau kansikin[11].»

¹³Ní ki gíti lī yii: «Sii pu ní m làá nīn pée máká.» Ní ki gíti kūbitì ki lī yii: «Kpèè, man nì mbiyaamu mun Unimbɔti tīī-mee sèé[12].»

¹⁴Mbiyaamu gbantee nín sá binib tiwun nì fatiku puee ní Yeesu gíiǹ u-ba tiwun nì fatiku kii bíǹ nín bí puee. U ŋá míǹ kí ŋmā kí kpú, u-kúmee ń nàan̄ Sitaan un ŋúb́ ŋkúm pɔŋŋuee,

¹⁵kí nyāntí bi nín pée màl̄ bin bi bí kuyuŋu poon kun puee bi fàŋkí ŋkúmee.

¹⁶Di sá yii an kaa sá ituun ní u dɔ́miń ki tútúǹ, ama an sá Abraam biyaamu ní u dɔ́miń ki tútúǹ[13].

¹⁷An pu ní an sá yii ú dū u-ba kí nántíǹ u-naalib tikɔkɔ poon kí ŋmā kí nīn sá bi-saraaŋakpiliu ki cáá disaasɔl ki tūǹ u-tundi deedee Unimbɔti nimbiin, án nín làá ŋá pu bí ká bi-kpitii pɔ̄tamee[14].

¹⁸U nín jíń falaa icɔŋki poon ki kée di yì-tì ní u ŋūǹ kí jòò bin bí icɔŋkinee.