Read Ntcham Hébreux 3 Bible Online

Hébreux 3 - Ntcham bible

Hébreux 3

¹An puee m-nabiyaamu, nimbi bin Unimbɔti yíiń ni sá u-yabee, ní nīn kpèé Yeesu. Úǹ ní Unimbɔti túnní ú nīn sá ti-saraaŋakpiliu, ní u-pu ní ti fōō ki kíí.

²Di sá yii u yúliǹ Unimbɔti un lēē-u ú tɔ̄ an tundee deedee, kii Mooyiisi nín nìn túń Unimbɔti dicaŋkun ditundi deedee puee[15].

³Bi pàkà un máń kudiiyee ki jítiǹ kudii ku-ba. Míǹ mbaantiim ní Yeesu nyooti jítiǹ Mooyiisi yati.

⁴Kudii kamaa cáá un máń-kuee ní, ní un di māā tikɔkɔee di sá Unimbɔti.

⁵Mooyiisi úŋ̀wuee, u sá utɔntɔnli ní ki túń ditundi nì deedee Unimbɔti dicaŋkun. U-tundee nìn sá kí dàkà tin tin Unimbɔti làá dāá sòoǹ foolboonee ní.

⁶Ama Kriisitoo úǹ sá Unimbɔti Jipɔɔn ní ki yì Unimbɔti dicaŋku. Timbi di sá Unimbɔti dicaŋkuee, ti yaa gbíntì ki máká u-pu, ki cɔ́tí u-pu ki tin kátì-kuee.

⁷An puee, kii Circir Fam nín lī puee, yii: «Ni yaa gbìl̄ Unimbɔti bɔti díǹ,

⁸ní taa ŋá mpɔɔgbifin, a lì kii ni-naanjab nín nìn ŋá mpɔɔgbifin ki cɔ́ŋkì Unimbɔti kuteeun puee.

⁹Kuteeun niin ní ni-naanjab nìn cɔ́ŋkì-mi kí kpèè m nín sá uŋyee, ní m dàkā-bi m nín sá uŋyee, áli abin imuŋku ili.

¹⁰An pu ní m gíí binib gbanti pu diŋuul, ki bí yii: <Binib nee mɔ̀tīi gáatí baabadal ní, baa dī m-sàmbiyaamu.>

¹¹An di yì-tì ní m nìn gíí diŋuul ki pūtì yii baa làá ti kɔ́ mpaan ŋun m bɔ́ntì bí bàà kɔ́ kí kàl̄ kí ŋùŋfèe ni[16]!»

¹²An puee m-nabiyaamu, ní nīn nyíǹ ni-ba, ubɔ ń taa nín̄ cáá dipɔɔkpitil din kaa cáá fookiiyee kí cúú u-ba kí nákatíǹ Unimbɔti un bí dimaŋfalinee.

¹³Ama ní nīn tììmaan tɔb kunyannyaau baabadal ŋyunti nín dáá bí pu nee, án nín làá ŋá pu ikpiti ń taa kīil̀ ubɔ ni-kansikin udaan ń pɔ̄ɔkì u-pɔbilee.

¹⁴Ti nín kíĺ ki cáá dimákal din Kriisitoo puee, ti yaa gbíntì ki ŋúb́ míǹ ki tin kátì-kuee di dàkà yii ti sá Kriisitoo yab.

¹⁵A lì kii Unimbɔti gbɔŋku poon nín lī puee yii: «Ni yaa gbìl̄ Unimbɔti bɔti díǹ, ní taa ŋá mpɔɔgbifin a lì kii ni-naanjab nín nìn ŋá mpɔɔgbifin puee[17].»

¹⁶Bilab di nìn gbìl̄ Unimbɔti bɔti ní ki pɔ́ɔkì bi-pɔbiliŋ ní? An sá bin kɔkɔ Mooyiisi nìn nyántìń Eejipiti tiŋkinee.

¹⁷Bilab pu ní Unimbɔti nìn gíí diŋuul áli abin imuŋku ili? An sá bin nìn ŋá ikpiti ki kpíì kuteeunee.

¹⁸Bilab pu ní Unimbɔti nìn pūtì yii: «Bi kpá kí kɔ́ mpaan ŋun m bɔ́ntì bí bàà kɔ́ kí kàl̄ kí ŋùŋfèe ni ní?» An sá bin nìn ŋá mpɔɔgbifinee ní u nìn lī míǹ[18].

¹⁹Ti lafun ká yii baa nìn ŋúń ki kɔ́ diŋuŋfil laŋki, kun puee baa nìn fōō Unimbɔti ki kíí.