Read Ntcham Hébreux 4 Bible Online

Hébreux 4 - Ntcham bible

Hébreux 4

¹Kii dipoondi din sá tí kɔ́ Unimbɔti ŋuŋfilinee nín dáá bí pu nee, tí fàŋkìmaan, ni-kansikin ubɔ ń taa ŋá u-ba kí dāá gbíntí boon.

²Kun puee bi sòon̄ Tibɔmɔntiil ti gbìl̄ kii bi nín nìn pée tí sòon̄ nì ti-naanjab bi mun gbìl̄ puee ní. Di sá bi nìn gbìl̄ tibɔtee kɔkɔ, ama ní kaa fōotìi yīkiǹ, kun puee bi nín nìn gbìl̄-tèe, baa nìn fōō-tì ki kíí.

³Timbi bin fōō ki kííyee, ti làá kɔ́ diŋuŋfil laŋki, laakin ní Unimbɔti lī yii: «M nìn gíí diŋuul ki pūtì yii mpaan ŋun m bɔ́ntì bí bàà kɔ́ kí kàl̄ kí ŋùŋfèe nee, bi kpá kí kɔ́[19]!» U nìn lī míǹ, nì min kɔkɔ u nìn bɔ́ntì u-tundi ki síiǹ ki wāatì ní ki nín náań duulinyee.

⁴Di sá Unimbɔti gbɔŋku poon sòon̄ ŋwinluluúti pu yii: «Unimbɔti ŋūŋfì u-tuuŋŋi kɔkɔ pu ŋwinluluúti dal[20].»

⁵Ní an dāa nín sòon̄ doo yii: «Unimbɔti bí yii: <Bi kpá kí kɔ́ mpaan ŋun m bɔ́ntì binib ń kɔ́ kí ŋùŋfèe ni[21].>»

⁶Bin bi nìn péé péé ki sòon̄ Tibɔmɔntiilee ki tīīyee nìn ŋá mpɔɔgbifin, an puee baa nìn ŋúń ki kɔ́ diŋuŋfil gbanti poon, ama dipoondee dáá gbíntìi bí, biba làá ŋmā kí kɔ́.

⁷Kun puee Unimbɔti gíti yóoǹ ŋwimpɔɔn ŋun binib làá kɔ́ u-ŋuŋfil laŋkee. Ŋúǹ di sá «díǹ». Di sá yii abin kupaau boonee, u nìn gíti yāntì ubɔti Daafiidi sòon̄ an pu, kii ti nín dáá kàan̄ní-tì pu nee yii: «Ni yaa gbìl̄ Unimbɔti bɔti díǹ, ní taa ŋá mpɔɔgbifin[22].»

⁸Di sá yii laakin Joosuwa nìn cáá Isirayeel yab ki cūnnèe di yaan nìn sá diŋuŋfil laŋki[23], laakin Unimbɔti bée, Unimbɔti kaa bàà nìn gíti sòoǹ diŋuŋfil diba mun pu.

⁹An puee, ŋwiŋŋuŋfikaa mmɔnti ŋubɔ gíti bí nyɔkɔpu ki cí bin sá Unimbɔti yabee.

¹⁰Un yaa kɔ́ laakin Unimbɔti kā ki ŋùŋfēe mun ŋùŋfī ní. Kii Unimbɔti u-ba nín náań duulinya ki dóò ki kā ki ŋùŋfī puee, míǹ ní udaan mun yàntī u-tuuŋŋi kí ŋùŋfì.

¹¹An puee, timbi ń pɔ́ɔǹ ti-ba kí kɔ́ diŋuŋfil gbanti poon, kí taa fōō ti-naanjab yaŋyam kí lántí-dì.

¹²Di sá yii Unimbɔti bɔtee, tì cáá dimaŋfal ní, ní ki tūǹ ditundi ki jītí ki jítiǹ bɔlfi un jītí ajan liitil puee, ki gífí malaa, kí cúú kinaŋ nì ŋfam kí yàkatī tɔbin, ki kóò dikpabilin ki bà ncoom, ki béetí unil nín màkà kí ŋá puee nì u-pɔbil poon landɔkɔi.

¹³Tiwannáaŋkaal tiba kaa bí Unimbɔti kaa wāĺ-tì. Tin kɔkɔ pée bí duulinyanee dɔ̄ mpaampiin pu ní úǹ cee. U-nimbiin ní ti làá dāá sòoǹ ti-nyɔkɔpu yai.

¹⁴Yeesu, Unimbɔti Jipɔɔn di sá usaraaŋakpil un sá ukpaan ki jɔ́m̀ doooo yilpu fɔ́ŋŋŋ kí nīn tútúǹ-tee. An puee tí mɔ̀tīí nīn ŋúb́ fookii un ti cáá u-puee gbīŋgbim.

¹⁵Kun puee timbi saraaŋakpiliuee sá un nyí ti-wɔfii ki sūǹ ti-saayee. Di sá yii u gíiǹ u-ba kii timbee ní, nniyaamin, ní ki béè iwɔsɔfi, ní Sitaan cɔ́ŋkì-u ama waa lítì ikpitin.

¹⁶Míǹ puee, kámaan kunyannyaau kí sútiń kí pìl̄maan Unimbɔti beejal nì dimákal. Niin ní u-ŋanti bí. Niin ní u làá dàkà-ti u-ŋanti kí dū ti-kpitii kí pɔ̄-ti ní kí tūtuǹ-ti ŋyunti ŋun an máaǹee.