Read Ntcham Hébreux 5 Bible Online

Hébreux 5 - Ntcham bible

Hébreux 5

¹Binib kansikin ní bi lèekī ubɔ ú nīn sá usaraaŋakpil kí nīn ŋáań bin kɔkɔ kíǹee yil pu saraabi Unimbɔti nimbiin, ní u ŋáań saraabi binib kpitii pu.

²Usaraaŋakpil gbanti nyí kí jī bin kaa nyí tibee nì bin yīntèe pu kimɔtii, kun puee úǹ u-ba sá unil ní ki cáá u-wɔfii.

³Kii u mun nín cáá u-wɔfiiyee puee, an sá yii ú ŋá u-kpitii pu saraa ní kí nín ŋá bin kíǹee kpitii pu saraau[24].

⁴Ubɔ kaa ŋūǹ kí gāā u-bindi yii u làá ŋá disaraaŋatundi. Unimbɔti di lèekī kii u nín nìn lēē Aarɔn puee.

⁵Míǹ mbaantiim an kaa sá Kriisitoo u-ba di gāā u-bindi ki là jilma ní ki kpántì usaraaŋakpil. Un tīī-uee di sá un bí-u yii: «Sii di sá man Jipɔɔn, báà ŋma ń béé díǹ yii man di sá a-Baa.»

⁶An gíti lī laaba mun yii: «Bi lēē-si á nīn sá usaraaŋakpil kii Meelkiiseedeeki nín nìn sá puee kí nīn cá jaanjaan[25].»

⁷Yeesu nín nìn dáá bí duulinyanee, u nìn mēē Unimbɔti un ŋūǹ kí fīī-u ŋkúminee ki gbāam̀-u nì ikuŋkuunti nì nnyinnyim[26]. Unimbɔti nìn pílifiǹ-u, kun puee u nìn sīntiǹ u-ba taapu.

⁸Nì min kɔkɔ Yeesu sá Unimbɔti Jipɔɔnee, u bífì kí nīn tɔ́ Unimbɔti falaabi bin kɔkɔ u jíńee poon.

⁹An pu ní u sá uniŋman umɔnti un pu baa kāntí tikpitil tibee, ki kpántì un tìì difiil din kaa cáá dikúntilee ki tīī bin kɔkɔ tɔ́-uee.

¹⁰Unimbɔti di lēē-u ú nīn sá usaraaŋakpil kii Meelkiiseedeeki nín nìn sá puee.

¹¹Ti bàà cáá tibɔti tikpil kí sòoǹ nì ni an pu, ama ní an pɔ̄ɔ̄ tí bɔ́bití taapu kí tùkù-ni, kun puee ni sá binib bin sɔ̀m̀ kí gbìl̄ tibɔti taapu malaayee ní.

¹²Ni bàà máaǹ ki kpántì doooo nee bin dàkà bin kíǹee Unimbɔti bɔtee, ama nimbi di gíti bí ki nyàab̀ bí dàkà-ni Unimbɔti bɔti tin bi péetí kí dàkà bin fōō ki kíí mpɔmee. An nín bàà sá ní nīn jīǹ binicikitikaabi jintee, ní ni dū mbiim ki ŋá ni-jinti kii mbiyaamu mun ŋáaḿee.

¹³Un ní mbiim sá-u tijinee, udaan dáá sá kii kibiki kin ŋáaḿee dee, waa ŋūǹ kí béé min ŋān̄ Unimbɔti nimbiinee[27].

¹⁴Ama tijin tin nyìm̀ee sá ki tīī binicikitikaabi bin cáá nlandɔkɔ ki dàkafī ki nyí ki gàntī tin sá tiŋanee nì tin sá tikpitilee ní.