Read Ntcham Hébreux 6 Bible Online

Hébreux 6 - Ntcham bible

Hébreux 6

¹An puee tí jītímaan tibɔpeepeekaal tin unil yaa fōō Kriisitoo ki kíí mpɔm bi dàkà-uee pu, kí nyàab̀ kí kpántí binicikitikaabi. An kaa máaǹ tí gbíntíǹ tibɔpeepeekaal tin un fōō ki kíí mpɔmee nyée pu, tin sá unil ń fá atuun ŋin kaa cáá ipaatee nì unil ń fōō Unimbɔti kí kííyee,

²nì bi nín dàkà Unimbɔti nyiŋfàltam bɔti puee, nì bi nín pāantí iŋal binib pu ki mèé ki tìì-bee, nì bitaŋkpiibi fìkititam, nì ditafadaaldi din kaa cáá dikúntilee nín dɔ̄ ki cí binikpitib puee.

³An puee tí yàntīmaan tíǹ, Unimbɔti yaa lèe, tí póotí tipɔn.

⁴Di sá bin fōō Tibɔmɔntiil ki kíí ki wál̀ ibaamɔn, ki dáká diyimɔɔl din bí yilpuee mɔŋŋu, ki fōō Unimbɔti Fam,

⁵ki gbìl̄ Tibɔmɔntiilee taapu ki béè Unimbɔti pɔŋyi in bí ki dòońee,

⁶ní boonee bidambi lítèe, baa ti ŋūǹ kí fàtīí gíiǹní-bi nsammɔnti poon. Di sá yii bidambi fātìi bí ki kpáà Unimbɔti Jipɔɔn ndɔpuntikaa pu nliliitiim, ki bí ki bíiĺ-u kunipaau kansikin dee[28].

⁷Kitiŋ yaa bí ní ki fòol̄ ntaanyim múlmul ní ki lòoǹ tijin tin bi kùn̄ ki-puee, Unimbɔti bìintí ki-pu ní.

⁸Ama kitiŋ gbanti yaa nyēē ikuŋkum nì abɔjanaakunee, mimmee bi ká-kì yii kàa bí tiban dee. Mbusu kaa pɔ̄ɔ̄ an tiŋkee dikɔl, kun puee ŋŋmi di dāa dòoń kí wà-kì[29].

⁹Nnabineeŋkaamu, nì min kɔkɔ ti bí ki sòoǹ nì ni míǹ nee, ti cáá ni-pu dimákal yii naa bí míǹ, ni tɔ́kɔ́ difiil saŋŋu pu.

¹⁰Di sá yii Unimbɔti sá deedeedaan ní. Waa làá súntí dineendi din ni dàkà binib u-puee nì atummɔnti ŋin ni túń nì ŋin ni gbíntì ki nìkì ki tūǹ ki tìì bin sá u-yabee pu.

¹¹Tin ti nyàab̀ee di sá báà ŋma ń dàkà difaŋgiil míǹ kí tin kátí-ku, án nín làá ŋá pu ní dāá fōō kun pu ni máká ki tūǹ an tuuŋŋee.

¹²An puee ní taa bàtī ni-faŋgiil pu, ama ní táá bin dū bi-fookiiu nì bi-mɔtiiki ki fōō tin Unimbɔti pōoǹee tabɔbiliŋ.

¹³Ŋyunti ŋun Unimbɔti làá nìn pòon̄ Abraam dipoondee, kí dàkà-u yii u làá lafun ŋá min u pōoǹ-uee, Unimbɔti nìn pūtì ní. Tiba kaa nìn bí ki jítiǹ-u ú yíiń kudɔŋu yindi kí pùtēe puee, ní Unimbɔti dūu pūtì u-ba.

¹⁴U bí Abraam yii: «M pūtì m-ba yii m làá bìin̄ a-boon kí bùtī a-maaliŋu[30].»

¹⁵Abraam nín gbìl̄ mimmee, u jíń kimɔtii ní ki cíitì áli ŋyunti dāa bāań ní u fōō tin Unimbɔti pūtì ki pōoǹ yii u làá tīī-uee.

¹⁶Binib bili yaa kpákèe, un jítiǹ-bi bi fàŋkée ní bi pùtī. Bi nín pūtì mimmee ní bi-nikpɔŋkpɔkɔkuee ń kúntí.

¹⁷Míǹ mbaantiim ní Unimbɔti nín là kí dàkà u-yab yii u-poondee kaa bí kí kpántí jaanjaanee pu ní u pūtì.

¹⁸U tīī-ti tiwan tili tí ŋmā kí nīn máká ti-pu, dipoondi nì dipùtil. Tiwan tili gbanti puee, Unimbɔti kpá kí kpántí u-nyɔkɔ. U kpá kí mɔ̄ntì-ti[31], an puee timbi bin sáǹ ki dɔ́miń ki kɔ́-uee, tí kámaan kunyannyaau kí mɔ̀tīí dū ti-mákal kí báań tin u pōoǹ-tee pu tiŋan.

¹⁹Dimákal din ti cáá yii ti làá dāá ká tin Unimbɔti pōoǹee di yì-tì ti bá ki yú ki ŋúb́ an pɔ̄ɔ̄. Dimákalee di jītí yilpu punyɔkɔki kí kɔ́ circir páaa laŋki[32].

²⁰Niin ní Yeesu līntì ti-nyɔkɔpu ki dī ki kɔ́ ki kpántì usaraaŋakpil kii Meelkiiseedeekee, ki gbàam̄ ti-pu kí nīn cá jaanjaan.