Read Ntcham Hébreux 7 Bible Online

Hébreux 7 - Ntcham bible

Hébreux 7

¹Ŋyunti ŋun ní Abraam nìn cūtì ki jáń ki pɔ́ɔkiǹ bibɔtiibi ki fàtīi kùnnée, Meelkiiseedeeki di nìn túŋkì-u nsanni ki mēē ki bīiǹ u-pu. Meelkiiseedeeki gbanti di sá Saleem yab bɔtiu, ní ki gíti sá Unimbɔti un bí kutaa fɔ́ŋŋŋee saraaŋaliu.

²Úǹ ní Abraam nìn lēē u-wanti tin u cááyee saalaa kamaa puee kubɔ kubɔ ki tīī. Meelkiiseedeeki taapu sá yii: Ubɔtikpaan un bí deedeeyee, ní boonee u gíti sá Saleem yab bɔtikpaaŋwu, an taapu sá yii ŋgbansɔŋfi bɔtikpaaŋwu[33].

³Meelkiiseedeeki gbantee kaa cáá baa, kaa cáá na, kaa cáá nnyeen. An kaa cáá yii bi màl̄-u, kaa cáá yii u kúù. U bí kii Unimbɔti Jipɔɔnee ní, u làá nīn pée sá usaraaŋal ní kí nīn cá jaanjaan.

⁴Ní kpèè u nín sá ukpaan miŋyee. Ti-naanja Abraam u-ba nìn tīī-u tiwan tin u nìn jáń ki fōō kujaaunee saalaa kamaa puee kubɔ kubɔ ní.

⁵Mara poonee, Leefii naakookun yab bin sá bisaraaŋaliibee baba di nìn cáá nsan kí fōō bi-nabiyaamu mun sá Abraam maaliŋunee cee bi-wanti saalaa kamaa poonee kubɔ kubɔ[34].

⁶Ama Meelkiiseedeeki gbanti kaa sá Leefii naakookun yab ubɔ ní ki fōō Abraam wanti saalaa kamaa puee kubɔ kubɔ, boonee ní ki mēē ki bīiǹ Abraam un Unimbɔti nìn líì dipoondee pu.

⁷Ti-kɔkɔ pée nyí yii un jítiǹ-see di bìintí a-boon.

⁸Juuda yab saraaŋaliibi bin fòol̄ bi-wanti saalaa kamaa pu kubɔ kubɔee sá binib ní, ki kúù, ama ti ká yii Meelkiiseedeeki úǹ pée bí ní kí nīn cá jaanjaan.

⁹Ti ŋūǹ kí lì yii Juuda yab saraaŋaliibi bin bi-jutiibi nìn tìì bi-wanti saalaa kamaa pu kubɔ kubɔee naanja Leefii u-ba dī Abraam pu ki tīī Meelkiiseedeeki u-wanti saalaa kamaa puee kubɔ kubɔ.

¹⁰Ŋyuntee, baa nìn dáá màl̄ Leefii, ama u nìn kā u-naanja Abraam poon ŋyunti ŋun Meelkiiseedeeki nìn túŋkìń-u nsannee.

¹¹Isirayeel nibul marau poonee, Leefii naakookun yab kansikin ní bi nìn lèekī bisaraaŋaliibi. Bi sá bisaraaŋaliibi Aarɔn yamee ní. Ama bi nín sá bisaraaŋaliibi puee kaa sá páaa, yaa sá fám, ba pu ní an bàà gíti bàlifī yii usaraaŋal ubɔ mun ń nīn gíti bí ki náań nì Meelkiiseedeeki? An kaa bàà gíti páb́ deeyaa.

¹²Mimmee, bi yaa kpántì bisaraaŋaliibee, see bí kpántí marab mun.

¹³Ama ti-Dindaan un pu ní tibɔti nee sòon̄ ki dàkèe sá kunaakoou kun yab kaa pée ŋá disaraaŋatundi nsaraafan pu ki ká jaanjaanee ní.

¹⁴Báà ŋma nyí u-pu yii u sá Juuda naakookun ní[35]. Mooyiisi kaa nìn tīī kunaakoou gbanti disaraaŋatundi báà fiii.

¹⁵Tin bí nee gíti dàkà ki cántí tibɔti taapu, di sá usaraaŋal ubɔ gíti nyáń ki náań nì Meelkiiseedeeki.

¹⁶Úǹ saraaŋátam nyáń u-ba, kun puee an kaa sá marab bin binib ŋmàn̄ ki yóoǹee pu ní u dī ki kpántì usaraaŋal, ama u nín cáá mpɔn kí nīn bí jaanjaanee pu ní u kpántì usaraaŋal.

¹⁷Di sá yii Unimbɔti gbɔŋku sòon̄ u-pu yii: «Sii di làá nīn pée sá usaraaŋal kí nīn cáa cá jaanjaan, Meelkiiseedeeki yam[36].»

¹⁸Mpeepeekaamee, bimarakpikib kpītì, kun puee baa pɔ̄ɔ̄ kaa tútúǹ binib.

¹⁹Nliliitiimee, marabee kaa ŋúń ki kítì-ti tí kpántí biniŋmambi bimɔntiibi bin pu baa kāntí ikpiti ibee. Ama Kriisitoo sá-ti dimákabaamɔndi din pu ti ŋūǹ kí dī kí sútí kí pìl̄ Unimbɔtee.

²⁰Kí wàatēe, Unimbɔti baasii pūtì ní ki bí yii Kriisitoo ń nīn sá usaraaŋal. Bisaraaŋaliibi bin kíǹee, waa pūtì ki lēē ubɔ míǹ.

²¹Ama Yeesu pu ní u pūtì ki lī yii: «Man ni-Dindaan di pūtì yii sii di làá nīn sá usaraaŋal kí nīn pée cáa cá jaanjaan, m kpá kí kɔ́ntí m-nyɔkɔ[37].»

²²An puee Yeesu di sá dipoommɔntiilee daaŋku kun dàkà yii án làá lafun ŋá mimmee.

²³Tin gíti nyáń u-ba nì Yeesu saraaŋátam nì bin kíǹee yamee di sá binib tikpil nìn túń disaraaŋatundi, kun puee bi nìn púl̀ ní ki kúù ní biba fòol̄.

²⁴Ama Yeesu úǹ pée bí ní jaanjaan, an puee ubɔ kaa fòol̄ u-saraaŋatundi.

²⁵An pu ní u ŋūǹ kí fīī bin dì u-pu ki nyàab̀ Unimbɔtee an kɔkɔ pu, kun puee u pée bí ní. Waa sá un kúùyee, ní ki mèé Unimbɔti bi-pu.

²⁶Usaraaŋakpil un ti máaǹee dee. U bí circir, kaa ŋá ikpiti iba, ikpiti iba kaa bí u-pu. Unimbɔti cúú-u ki lēē bikpitib kansikin ki jɔ́m̀ yilpu fɔ́ŋŋŋ.

²⁷Waa bí kii bisaraaŋakpilib bin kíǹee nín bí puee, ki ŋáań bi-yil pu kpitii saraau baabadal kí wàatī kí nín ŋá samaa yɔuee. Ŋyunti ŋun u dū u-ba ki ŋá saraayee ní u kúntì saraabi ŋátam kɔkɔ.

²⁸Mooyiisi marab nín yóoǹ bin bí nīn sá bisaraaŋakpilibee nìn sá binib ní. Baa cáá mpɔn bi-ba, ama ní boonee ní Unimbɔti sòon̄ ki pūtì ki lēē u-Jipɔɔn ki kāaǹ ú nīn sá usaraaŋakpil un sá uniŋman umɔnti un pu ikpiti iba kpée, kí nīn pée cáa cá jaanjaan.