Read Ntcham Hébreux 8 Bible Online

Hébreux 8 - Ntcham bible

Hébreux 8

¹Tibɔti tin kɔkɔ ti sòon̄ nee, dibɔyil di sá yii, an saraaŋakpiliu juti ní ti cáá u kā yilpu Unimbɔti Mpɔŋkpaandaan ŋaŋgiiliŋu pú[38], dibeelin, tinyool laŋki.

²Úǹ sá usaraaŋakpil un tūǹ ditundi laakin ti-Dindaan Unimbɔti u-ba máń an sá circiree ní, an kaa sá tanti un binib gāāyee poon kii bisaraaŋaliibi bin kíǹee nín ŋáań puee.

³Bi kāaǹ bisaraaŋakpilib bí nīn ŋáań saraabi ki jáaḿ Unimbɔti ní kí nīn ŋáań saraabi binib kpitii pu. An puee u máaǹ kí nīn cáá tin tin u làá dūú ŋá saraayee.

⁴U yaa bàà bí duulinyan doo, waa bàà ŋūǹ kí nīn sá usaraaŋal kpaŋkpam. Di sá yii bisaraaŋaliibi bí ki ŋáań saraabi kii Juuda yab marab nín lī yii bí nīn ŋáań miŋyee.

⁵Saraabi bin bisaraaŋaliibi ŋáańee sá tin bí yilpuee naŋku ní, a lì kii Unimbɔti nín nìn dū yilpu diiku bítam kɔkɔ ki dàkā Mooyiisi u gāā-u tanti taapu doo puee ní. Unimbɔti bí-u yii: «Á kpèè kí gāā-mi tanti ú nīn bí kii un m nìn dàkā-si dijool puee deedee[39].»

⁶Ama kɔŋkɔnnee ditundi din Kriisitoo bí yilpu ki tūǹee jítiǹ Juuda yab saraaŋaliibi nín tūǹ ŋiŋyee, di sá Kriisitoo kúm di yì-tì ní Unimbɔti pōoǹ-ti dipoondi din sá dimɔntiil ki jítiǹ dikpikilee.

⁷Dipoompeepeekaal[40] din Unimbɔti nìn pōoǹ ti-naanjabee yaa nìn sá dimɔntiilee, an kaa bàà gíti bàlifī yii bí kpántí diba.

⁸An pu ní Unimbɔti nìn bíi wòoǹ-bi ki tùkù-bi yii: «Man ni-Dindaan di lī yii iwiin bí ki dòoń in poon m làá fàtīí pòon̄ Isirayeel yab nì Juuda yab dipoompɔndee.

⁹Dipoondi gbanti kaa dāa sá kii din m nìn pōoǹ bi-naanjab daliŋkin m nìn nyántìń-bi Eejipiti tiŋkinee. Boonee baa dū dipoondee ki túń ditundi, ní ma mun kaa ti fātìi tɔ́ bi-bɔti.

¹⁰Ti-Dindaan bí yii: M nín làá dāá líí Isirayeel yab dipoondi diŋyee sèé: Ŋyunti gbantee, m làá dāá ŋmà m-marab kí ŋá bi-landɔkɔyin bí ŋmā kí nīn nyí min m lèe, ní kí dūú ŋmà bi-pɔbiliŋin bí ŋmā kí nīn ŋúb́-bi kí taa ti súntí. Míǹ ní m dāa sá bi-Nimbɔtiu ní bi mun dāa sá man samaau.

¹¹Ubɔ kaa dāa gíti dàkà u-kɔŋkɔnnaatɔ àá u-nabiki yii ú nīn nyí ti-Dindaan. Kí yòon̄ bi-kansikin mbiyaawaamu kí tin cáá sāā bikpaambi, báà ŋma làá dāá béé-mi.

¹²Kun puee m làá dāá sɔ̄ bi-saai kí dū bi-kpitii kí pɔ̄-bi, kaa làá ti pée téetí bi-kpitii gbanti pu[41].»

¹³Unimbɔti nín sòon̄ dipoompɔndi bɔtee, mimmee din béeyee ŋá dikpikil dee. Tiwan yaa ŋá tikpikilee ti púĺ dee, ki làá kúntí mun.