Read Ntcham Hébreux 9 Bible Online

Hébreux 9 - Ntcham bible

Hébreux 9

¹Ŋyunti ŋun Unimbɔti nìn pōoǹ dipoompeepeekaalee, u nìn yóoǹ marab bin binib làá dī kí jāam̀-uee nì tanti un poon bi làá nīn jáaḿ-uee.

²Bi nìn gāā tanti ní, ní ki dū sata ki pītì poon adiin ali, ní ki yíì kudipeepeekaauee circir laŋki. Niin ní fitilab tɔ́kɔŋkaati nìn bí, ní teebil yú ní bi cāabìń kpɔnɔb bin bi ŋáań Unimbɔti saraayee ki pāantí.

³Sataliliiti boonee, kudii kubɔ mun dee, niin ní bi yíì circir páaa laŋki.

⁴Niin ní sindaariya saraafaŋŋu nìn yú ní bi tùutī talaalub an pu, ní dipoondi dakaau yú bi dū sindaariya ki nyūntì u-kɔkɔ. Dakaayee poonee, kibaŋŋi kiba yú ki sá sindaariya ŋma. Ki-poon ní tijin tin bi yíì maanee nìn kā. Dakaa ubaantee poon ní Aarɔn kpandɔŋu ŋun nìn púkuḿ nsupumpukumee nì ataŋkpee ŋin pu Unimbɔti nìn ŋmàn̄ dipoondi marabee kā.

⁵Ní bi dū sindaariya ki mɔ́ɔ́ keerubimbi bin sá Unimbɔti nyootee bili ki tɔ́kɔǹ dakaayee pu kí dàkà yii Unimbɔti u-ba bí niin. Keerubimbee nìn kpátì bi-feeŋyi ki bīiǹ laakin bi yaa ŋá ikpiti saraau bi cáá fatiku ki yàantée pu. Taa ŋūǹ kí sòoǹ dakaa gbanti bɔti nì u-tuuŋŋi nín sá puee kɔŋkɔnnee[42].

⁶Bi nìn ŋá míǹ kɔkɔ ki dóòyee, kudipeepeekaauee poon ní bisaraaŋaliibi kóò baabadal ki ŋáań bi-saraatuuŋŋi.

⁷Ama poon diiku laakin bi yíì yii circir páaa laŋkee, usaraaŋakpil baba di kóò niin dibindi poonee diba ja kí cáá tiwaŋkuti tin u kūū úǹ u-ba kpitii puee fatikuu nì tin bi kūū samaa kɔkɔ nín ŋá ikpiti in kaa nyée fatikuu kí kɔ́ǹ kí ŋá Unimbɔti saraa[43].

⁸Circir Fam nìn dàkà yii, ŋyunti ŋun ní nsan pú diiku dáá bée, nsan nìn kpá unil ń jītí kí kɔ́ circir páaa laŋki.

⁹An saraabee cántí tibɔti taapu ní ki dàkà timbi díǹ: an dàkà yii saraabi bin binib nìn ŋáań ki jáaḿ Unimbɔti nì bin bi nìn ŋáań bi-kpitii puee kɔkɔ kaa nìn ŋūǹ kí lēē bin ŋáań saraabi gbantee pɔbiliŋin ikpiti bí kpántí deedeedambi Unimbɔti nimbiin.

¹⁰An sá marab bin bi yóoǹ bi sá tijin nì tinyɔkaal nì tiwun difíntilee bɔti ní. An marabee kɔkɔ sá tiwun pu marab ní kí tin sāā ŋyunti ŋun Unimbɔti làá dāá cáań tipɔnee.

¹¹Kriisitoo dɔ́miń ki sá-ti usaraaŋakpil un cáań-ti tiŋan tin poon ti bí nee. Úǹ di kɔ́ kusaraadimɔntiiu kun sá kukpaaŋŋu kaa sá binib di máńee, an dàkà yii kuaa sá duulinya doo diiku.

¹²U kɔ́ diba ja Circir páaa laŋki Unimbɔti nimbiin. An kaa sá nì iŋɔjaa nì anabil fatikuu ní u cáa kɔ́ǹ, ama úǹ u-ba fatikuu. Míǹ ní u ŋá ní ki cáań-ti difiil din kaa cáá dikúntilee.

¹³Dikoobil di nìn sá puee di sá bi nìn dū iŋɔjaa nì inajaa fatikuu nì unasal un bi nìn wù ŋŋmi[44] kɔkɔee fantam kí yàaǹ bin ŋá ikpitee pu ní. Bi yaa nìn ŋá mimmee, an lēē ikpiti bi-wunti pu bi kpántì circirdambi dee.

¹⁴An yaa nìn ŋūǹ kí ŋá míǹ, kin ataa aŋa pu ní Kriisitoo un Circir Fam tútúǹ u dū u-ba ki ŋá saraamɔnti ki tīī Unimbɔtee fatikuu kaa ŋūǹ kí fíntí atuŋkpiti ti-pɔbiliŋ poon tí ŋmā kí nóó Unimbɔti un bí dimaŋfalinee.

¹⁵Kriisitoo di cáań-ti dipoompɔndi, án nín làá ŋá pu ní bin Unimbɔti fīīyee ń ŋmā kí fōō tigaajawan tin Unimbɔti pōoǹ tàa cáá dikúntilee. Kun pu bi làá ŋmā kí fōō tigaajawan gbantee di sá Kriisitoo kpíì ki nyántì-bi bi nín nìn bí dipooŋkpikil poon ki ŋáań ikpiti iŋyee ni.

¹⁶Unil yaa bí yii a làá jī u-fakalee, u yaa kaa láá kpíì, saa yòontí tiba.

¹⁷Daliŋkin u sòon̄ ki tùkū-si yii sii di làá jī u-fakalee, tibɔtee kaa láá tūǹ ditundi, see u yaa láa kpíìyee ní á nín yīkì kí tɔ́kɔń difakalee pu kii u nín nìn pée tùkū-si puee.

¹⁸An pu ní tiwaŋkuti fatikuu nìn nyáń ki wāatì ní dipoompeepeekaal nín ŋúń ki túń ditundi.

¹⁹Di sá Mooyiisi nín kàan̄ marab bin kɔkɔ Unimbɔti ŋmàn̄ee ki tùkū samaa kɔkɔ ki dóòyee, ní u yōoǹ anabil, nì iŋɔjaa fatikuu ki dū nnyim ki ŋmālim̀ ní ki dū tipikuti tin bi mántèe nì isɔpi faapibiti ki cáa sèetī fatiku poon ki yàantí kugbɔŋu kun poon bi ŋmàn̄ marabee nì samaa kɔkɔ pu.

²⁰U nìn lī yii: «Fatiku nee di sá dipoondi din Unimbɔti líì-nee daaŋku[45].»

²¹U ŋá mimmee ní ki yāaǹ Unimbɔti tantiu un bi gāāyee nì tiwan tin bi cáa ŋáań saraabee kɔkɔ pu.

²²Kii mara nín lī puee, fatiku ní bi ŋman nìn pée cáa yàantí tiwan kɔkɔ pu ní tí kpántí circir. An puee fatiku yaa kaa nyáńee, unil kaa kāntí u-kpitii pɔ̄tam[46].

²³Bi yaa nìn máaǹ kí ŋá tiwan tin sá yilpu wanti naŋku circir mimmee, an bàlifī yii bí ŋá saraabi bin jítiǹ míǹ kpataaayee yilpu wanti pu.

²⁴Kun puee an kaa sá yii Kriisitoo kɔ́ kudii kun binib máń ki nántiǹ yilpu yɔkɔee poon ní ki ŋá saraa. Ama yilpu, Unimbɔti cee ní u kɔ́, ki bí Unimbɔti nimbiin kɔŋkɔnnee ki gbàam̄ ti-pu.

²⁵Kí kūtèe, dibindi sá kamaayee, usaraaŋakpil nìn kóò circir páaa laŋki nì tiwaŋkuti fatikuu ní kí ŋá saraabi. Ama Kriisitoo úǹ kaa kɔ́ ŋfunyɔm kupaau kí dū u-ba kí ŋá saraa.

²⁶An yaa sá mimmee, doooo duulinya nín kíĺ ki dāa sāā díǹee, u bàà làá jī falaabi ŋfunyɔm kupaau ní. Ama duulinya nín tóob́ dikúntil pu nee ní u dɔ́miń ki dū u-ba ki ŋá saraa diba pu kí kúntí ikpiti.

²⁷An pée sá yii báà ŋma ń kpú diba ja ní, ní ŋkúm boonee, Unimbɔti ń sòoǹ báà ŋma bɔti.

²⁸Míǹ mbaantiim ní Kriisitoo mun dū u-ba ki ŋá saraa diba ja ki nyántì binib tikpil ikpiti poon[47]. U làá dāan̄ nliliitiim, kaa sá kí dāá nyāntí binib ikpiti poon, ama u dāa dòoń kí fīī bin kíǹ ki kā ki cí-uee ní.