Read Ntcham Jacques 1 Bible Online

Jacques 1 - Ntcham bible

Jacques 1

¹Man Yakubu[1] un sá Unimbɔti nì ti-Dindaan Yeesu Kriisitoo tɔntɔnliuee di ŋmàn̄ kugbɔŋu nee. M jáaḿ nimbi tinaakɔti saalaa nì tili tin yàl̄ ki kɔ́ duulinya jaŋŋi kɔkɔnee.

²M-nabiyaamu, dinimbinaamandi nín bí puee nì di-nyɔkɔm yaa bāań ni-puee, ní yàntī án nīn mɔ̄ǹ-ni tikpil.

³Di sá ni nyí yii dinimbinaamandi gbanti yaa bāań ki cɔ́ŋkì ni-fookiiu ní ni yaa gbíntì ki yú kaa lítèe, kimɔtii ní an cāabìń-ni.

⁴Ama ní nīn cáá kimɔtii míǹ kí tin kátí-ku, án nín làá ŋá pu ní kpántí biniŋmambi bimɔntiibi ni-bimbim poon, tiba nì tiba ń taa lóó-nee.

⁵Míǹ puee, ni-kansikin ubɔ yaa lóò iciinee, udaan ń mèè Unimbɔti[2] un mɔ̄ ki pūǹ báà ŋma nì dipɔbil diba, kaa wòoǹee, u làá tīī-u.

⁶Tin bée di sá yii udaan ń nīn máká yii u làá fōō kun u bíi mèéyee kí taa gùgufì, kun puee un mèé ki gùgufēe náań nì kii dimɔɔl nyim min kubuŋu téekí ki cáǹ ajan kɔkɔ púee ní.

⁷An niliuee ń taa dàkafì yii u làá ŋmā kí fōō tiba ti-Dindaan cee,

⁸kun puee u cáá ilandɔkɔ ili ili, kaa dìŋfī nsambaanti.

⁹Án nīn mɔ̄ǹ kinabiki kin di sá usoodaanee, kun puee Unimbɔti yōoǹ-u yilpu.

¹⁰Míǹ ní án nīn mɔ̄ǹ kinabiki kin di sá ugaajee, kun puee Unimbɔti sīntiǹ-u taapu: di sá yii u làá dāá gbátí kí lítí kii mpumpukumee ní.

¹¹Ŋwìiń yaa nyáń ki píĺ sínsiŋee, ní mpumpukum ń kpā ní kí gbátí kí lítí, ní mi-nyaaŋku ń wāŋkì[3]. Míǹ mbaantiim ní ugaaja dāa bí u-tuuŋŋi poon ní kí kpáàa wāŋkì.

¹²Án nīn mɔ̄ǹ sii un di yaa bí dinimbinaamandin ní ki pɔ̄ɔntí ki ŋmèéyee. Di sá yii a yaa ŋmēē míǹ ki tin kátì-kuee, Unimbɔti làá pà-si tipaal tin sá dimaŋfal din kaa kúntí u pōoǹ ki yóoǹ bin néeń-uee.

¹³Sii un yaa bí dinimbinaamandinee ń taa lì yii: «Unimbɔti di bíi cɔ́ŋkí-mi.» Kun puee tiba kaa ŋūǹ kí yàntī Unimbɔti ń ŋá tikpitil, ní úǹ u-ba mun kaa yàntī ubɔ ń ŋá tikpitil.

¹⁴Ama an sá unil nimbitaataam di kíiĺ-u ki téekí-u ki cáǹ ikpitin.

¹⁵Nnimbitaataam yaa kɔ́ unilee, ní mí màal̀ ikpiti, ní ikpiti yaa wíiǹee ní í cáań ŋkúm.

¹⁶M-nabineeŋkaamu, ní taa ŋmàtim̀maan ni-ba.

¹⁷Tiwannyaandi nì tiwammɔntiil tin kɔkɔ ti fòol̄ faalaayee nyēeń yilpu ní. Ti-Baa Unimbɔti iwalfi in bí yilpuee náanliu cee ní an nyēeń. Úǹ kaa kpántáaa, kaa fàtī ki ŋmíntí dijandi diba, din kíǹee dɔ̄ dibɔmbɔndin.

¹⁸Úǹ di là ní ki dī dinyɔɔbundi din sá ibaamɔnee pu ki tīī-ti dimaŋfal, án nín làá ŋá pu timbi ń nīn līī tiwan tin kɔkɔ u náańee nyɔkɔpuee.

¹⁹M-nabineeŋkaamu, ní nīn nyímaan tin bí nee: báà ŋma ń kpòon̄ u-tafal malaa kí pīlifì u-juti, kí taa nín̄ jìkì disoondi pu, kí taa nín̄ fòol̄ diŋuul malaa malaa[4].

²⁰Di sá yii sii un yaa fōō diŋuulee, tin a ŋáańee kaa kítì Unimbɔti cee.

²¹Míǹ puee, ní fámaan tin kɔkɔ bíiĺ unilee nì atuŋkpiti kɔkɔ, kí sìntīǹ ni-ba kí fōō dinyɔɔbundi din Unimbɔti dū ki búĺ ni-pɔbiliŋinee, kun puee díǹ di ŋūǹ kí fīī-ni.

²²Nín̄ ŋáaḿmaan dinyɔɔbundee nín bí yii ní ŋá puee. Sii un yaa pílifí Unimbɔti bɔti, kaa ŋáań tì nín lī puee, kíiĺ a-ba ní.

²³Sii un pílifí dinyɔɔbundee fám, ní kaa ŋáań min dì lì yii á ŋée, náań nì un kpèé digitil ki wāĺ u-nimbiinee ní.

²⁴U nín kpēē ki dóò ki búntèe, ní ú kpáàa súntí u nín bàà kpēē digitil poon ki bí miŋyee kɔkɔ.

²⁵Ama sii un di yaa kpèé bimaramɔntiibi bin tìì dibatɔlee tiŋan ní ki yaa cáá a-ba ki tìì-bi, kaa pílifí fám boonee kí súntí, ama ki ŋáań min marabee bí yii á ŋée, Unimbɔti làá bìin̄ a-boon a-tuuŋŋi poon.

²⁶Sii un yaa nyí yii a sá unimbɔtinool, ní kaa ŋúb́ a-nyɔkɔee, kíiĺ a-ba ní, a-nimbɔtinoolee sá fám ní.

²⁷Dinimbɔtinool din ŋān̄ ki bí circir ti-Baa Unimbɔti ceeyee di sá: á kpèè ataŋkpiibil nì bikpiipoobi bin bí falaa poonee[5], kí nīn nyí nì a-ba kí taa jēetí duulinya kpitii poon.