Read Ntcham Jacques 2 Bible Online

Jacques 2 - Ntcham bible

Jacques 2

¹M-nabiyaamu, kii ni nín bí ti-Dindaan Yeesu Kriisitoo tinyooldaan saŋŋun puee, an kaa máaǹ ní nīn cáá dinigàntil[6].

²Tí lì yii ni-kpafil poon ní ugaaja ubɔ yaa kóoń ki fúuń sindaariya bɔmbiki ki pēē dibɔkutinyaandi, ní usoodaan ubɔ mun kóoń ki pēē ikpalcati,

³ní ni yaa tīī ugaaja un pēē tiwammɔntiilee jilma ki bí-u yii: «Sii dāá kàl̄ mpaammɔnti nee pu.» Ama ní ki bí usoodaanee yii: «Sii nín̄ yú, a yaa tí làaa, dāá kàl̄ kitiŋ m-taaŋi caŋin yéè.»

⁴Mimmee, naa gāntì-bi deeee? Ilandɔkɔkpiti ní ni dākafì ní ki ŋá míǹ.

⁵M-nabineeŋkaamu, ní pīlifìmaan: Unimbɔti lútì duulinya nee poon bisoodambi bí fōō Yeesu Kriisitoo kí kíí, ní kí ká tigaajamɔntiil kí kɔ́ Unimbɔti Beel din u pōoǹ ki yóoǹ bin néeń-uee ni.

⁶Ama ní nimbi kpèé bisoodambi fám. An kaa sá bigaajab di sàantí-ni ki cútí-ni ki cáǹ ibɔsoonaaa?

⁷Bíǹ di kaa bíiĺ Yeesu Kriisitoo yinnyaandi din u pú-neeee?

⁸Tiŋman, ni yaa nóó Unimbɔti Beel marau kii an nín ŋmàn̄ puee, yii: «Á nīn néeń a-juti kii sii a-bee,» mimmee, ni ŋáań min ŋān̄ee dee.

⁹Ama ni yaa kpèé ki gàntī binibee, an sá ikpiti ní ni ŋáań, maree cúú-ni, kun puee ni yīntiǹ-u.

¹⁰Di sá yii, a yaa ŋúb́ marab kɔkɔ ní ki yaa yīntiǹ ubambaanti bi-kansikinee, a yīntì bi-kɔkɔ dee,

¹¹kun puee Unimbɔti un lī yii: «Á taa ŋá tilaakpaalee», úǹ ubaantee di tí lī yii: «Á taa kpɔ̀ unil[7].» Míǹ puee, a yaa kaa ŋá tilaakpaal, ama ní ki yaa kūū unilee, a yīntì mara dee.

¹²Míǹ puee, ni-bɔsooŋyi nì ni-ŋáaǹtam kɔkɔnee, ní nīn ŋáań ki nyí yii ni sá binib bin Unimbɔti làá dū mara un cāabìń dibatɔlee ní kí sòoǹ ni-bɔtee.

¹³Sii un kaa súń a-jutiibi saayee, ibɔsoon dalee, Unimbɔti kaa làá dāá sɔ̄ si mun a-saai. A nín súń binib saayee di làá yàntī Unimbɔti ń dāá sɔ̄ si mun saai.

¹⁴M-nabiyaamu, an kaa ŋān̄ unil ń bí yii úǹ fōō Yeesu ki kíí, ama ní kaa bíi tūǹ atummɔnti, an fookiiuee ŋūǹ kí fīī-uaaa?

¹⁵Kii ti-nabiki kiba, uninja àá unimpu, di yaa bí, kaa cáá tiwampeeŋkaalaaa, kaa cáá tijikaal baabadal kí jī,

¹⁶ní ni-kansikin ubɔ yaa tùkū udaan yii: «Án ŋá kí kūtì, á nīn bí tiŋan! Taa yàntī tiwool ń cúú-si, á nīn jīǹ tijin ki díkì!», ama ní kaa tīī-u ú jī, kaa tīī-u ú pèen̄ kí ŋmátée, an ŋān̄ lapu?

¹⁷Míǹ mbaantiim ní un yaa fōō Yeesu ki kíí ŋmaniŋma, ní kaa ŋáań fookii tundi nín sá puee, mimmee udaan fookiiu kpíì dee.

¹⁸Ubɔ ŋūǹ kí lì yii: «Sii cáá fookii, ama ní man tūǹ atummɔnti. Too, dàkà-mi a nín fōō ki kíí min min, kaa tūǹ atummɔntee, ní ma mun ń dàkà-si m-tummɔntiŋ a béé yii m fōō ki kíí.

¹⁹A nín fōō ki kíí yii Unimbɔtibaanti di bée, an ŋān̄: ama míǹ ní arasiniibi mun fōō ki kíí, ní ki fàŋkí yɔ́kɔ́ yɔkɔ[8].

²⁰Ugbaan, aa là kí béé yii a yaa fōō ki kíí ní kaa tūǹ atummɔntee, a-fookiiu sá fámaaa?

²¹An ŋá mana ní ti-naanja Abraam dāa kpántì deedeedaan Unimbɔti nimbiin ní? An sá ditundi din u túńee pu, an dàkà yii u nín nìn dū u-jipɔɔn Isaaki ki páaǹ nsaraafan pu ki làá ŋá saraa kí tīī Unimbɔtee[9].

²²A káa! U fōō ki kíí ní ki túń ditundi mun, u-fookiiu nì u-tuuŋŋi nín kpáfì mbaantiim ki táá tɔb puee ní u-fookiiu kpántì umɔnti.

²³An ŋá kii Unimbɔti gbɔŋku poon nín lī puee dee, yii: «Abraam fōō Unimbɔti ki kíí, ní Unimbɔti ká u-fookiiu un u cáá u-puee ní ki yíiń-u deedeedaan,» ní ki kíǹ ki yíì-u u-bɔɔ mun[10].

²⁴Ni káa! Unil tuuŋŋi pu ní u kpántí deedeedaan Unimbɔti cee, an kaa sá fookii un u cááyee ŋmaniŋma pu.

²⁵Míǹ mbaantiim ní an nìn tí jítì Raab kinimpulaakpaayee cee. U mun nín nìn túń atuun ŋin ki kpántì deedeedaan Unimbɔti ceeyee di sá u nín fōō binib bin Juuda yab nìn túee ki dàkā-bi nsan ŋubɔ bi dī ki ŋmátèe[11].

²⁶Kii ŋfam yaa nyáń tiwun nín kpántí utaŋkpiil puee, míǹ ní unil yaa fōō ki kíí ní kaa tūǹ atummɔntee, u-fookiiu kúù.