Read Ntcham Jacques 3 Bible Online

Jacques 3 - Ntcham bible

Jacques 3

¹M-nabiyaamu, ni-kɔkɔ ń taa yīkì bìliku yii ni là kí nīn dàkà Unimbɔti bɔti, kun puee ni nyí yii timbi bidakaliibee bɔsooŋyi dāa pɔ̄ɔ̄ ki jítiǹ bin kíǹee yai.

²Ti-kɔkɔ yìntī ajan tikpil poon, ama sii un yaa kaa yìntī a-bɔsooŋyi poonee di sá uniŋman ki ŋūǹ kí cúú a-ba kɔkɔ.

³Ti kpàl̀ itaamu nyɔmmu tikúti í nīn tɔ́-ti ní ki kpáàa kpòotī i-wunti kɔkɔ.

⁴Kpèèmaan, meelab mun nín sá bikpaambi miŋyee, ama báà kubuŋu yaa yāntì ki téekí-bi min kamaa, kipimbiwaŋwaai ní un ŋàal̀ee cáa kpòotī-bi ki cáǹ laakin u lèe.

⁵Míǹ mbaantiim ní unil wunti puee, dilimbil sá kijaŋwaai ní, ní ki ŋáań tibɔkpaandi. Kéè, ni nyí yii kiŋmibilii fiii yéè di gbátí kí wà kupɔɔuaa!

⁶Dilimbil sá kii ŋŋmee ní. Duulinya bɔkpitii kɔkɔ bí dilimbilin ní dì kā ti-wunti pu ki bíiĺ tiwun kɔkɔ, ní kí cáań Sitaan ŋmiŋu kí tɔ̄ ti-pu.

⁷Unil ŋūǹ kí kpàà ipeel nì inoon nì tin fù ti-pooŋi puee, nì ijɔm kɔkɔ, í ŋá u nín là puee, ní binib lafun ŋúb̀-i míǹ.

⁸Ama doooo nee, ubɔ kaa láá ŋúń ki ŋúb́ dilimbil: dì sá kuwaŋkpitiu kun baa ŋūǹ kí cúúyee, ki gbí tilool tin cáá ŋkúmee ŋmaniŋma.

⁹Díǹ ní ti cáa jáaḿ ti-Baa Unimbɔti, díǹ ní ti tí cáa bíiĺ binib bin Unimbɔti náań ki nántiǹ u-bee[12].

¹⁰Kinyɔkɔn ní ijaam nyēē, kíǹ kibaantii poon ní mbusu tí nyēē. M-nabiyaamu, an kaa máaǹ kí nīn bí míǹ.

¹¹Nnyimbul ŋubɔ kaa bí ki nyēē inyiŋfi ili: min tūee nì min mɔ̄ee dicilpu.

¹²M-nabiyaamu, kɔŋki subu kaa lòoǹ tikpasampiil, ní nunufi mun kaa lòoǹ kɔŋki. Míǹ mbaantiim, nnyimbul ŋun nyēē nnyim min tūee kaa nyēē min mɔ̄ee.

¹³Ni-kansikin ubɔ bí ki cáá iciin ki nyáaa? Ú nīn sìntīǹ u-ba taapu kí nīn tūǹ atummɔnti ŋin làá dàkà yii u lafun cáá iciinee.

¹⁴Ama a yaa ná a-jutiibi, a-poon tū, ki sá unil un mɔ̀ kí nīn jítiǹ báà ŋmee, á taa nín̄ gà a-bindi yii a tɔ́kɔ́ ibaamɔn pu, kí taa mɔ̄ntì a-ba.

¹⁵An ciiŋyee kaa nyēeń yilpu, i sá taapu doo ní, nniyaamin, i nyēeń Sitaan cee ní.

¹⁶Kun puee laakin ní binib ná tɔb ní ki mɔ̀ kí nīn jítiǹ tɔbee, niin ní ni kāntí tin kaa kítèe nì tibɔkpiil kɔkɔ nì ti-bulifi.

¹⁷Ama iciin in nyēeń yilpuee, mpeepeekaamee i bí circir, ní boonee i cāabìń ŋgbansɔŋfi binib kansikin, ní ki mɔ̄, ki bí soooo, ní ki cáá tiniti tikpil, ki tūǹ atummɔnti, ní kaa gàntī binib, kaa cáá mpoonnyoon.

¹⁸Bin cāabìń ŋgbansɔŋfi bi-jutiibi kansikinee būul̀ nsɔŋfin dee, ní kí dāá kìtī abil ŋin sá yii bi bí deedee Unimbɔti nimbiinee.