Read Ntcham Jacques 5 Bible Online

Jacques 5 - Ntcham bible

Jacques 5

¹Nimbi bigaajabee, ní pīlifìmaan tibɔti nee: Ní sɔ̄ kí yāliŋkìmaan nnaabu ŋun làá bàń ni-puee.

²Ni-gaajawanti sūū, ní akɔtuu mɔ́ ni-wampeeŋkaati.

³Ni-sindaariyab nì ni-nimbiliŋ dámintì[17], ní an nín dámintì puee di làá dāá lēē mmɔ́ɔn yii ni nín ŋá miŋyee kaa ŋān̄, ní kí dāá wà ni-wunti kii ŋŋmee. Di sá yii ni báá tigaajati ŋyuntijoolkaa nee poon ní.

⁴Bipaadambi bin kùn̄ ni-sati naa pàn̄-bee[18], pīlifìmaan, bíǹ di tíminsée. Bin cáń ni-jikaatee biilii bàn̄ Unimbɔti Mpɔŋkɔdaan cee.

⁵Ni kāl̀ duulinya poon ki jíń mmɔn ki ŋá min fáatì-nee, ní ki jíń ki ŋá ŋkpam ki cíitì ŋwiin ŋun bi làá cáá-ni kí kpɔ̀ee.

⁶Ni túǹ bin kaa ŋá tibee pu abɔgaan ki kūū-bi, baa kpákáǹ-ni.

⁷Míǹ puee, nnabiyaamu, nín̄ cáámaan kimɔtii kí nīn cí ti-Dindaan gítintam. Kpèèmaan ukpaal nín jīǹ kimɔtii pu ki cīití u-wambɔlkaati ń bī puee. U jīǹ kimɔtii ní ki cīití utaapeekaa ń nì, ní utaajoolkaa mun ń dāá nì, ní ú nín cā u-jimmɔntiiti[19].

⁸Ni mun ń nīn cáámaan an mɔtiiki juti, kí nīn pɔ̄ɔntí kun puee ti-Dindaan tóob́ kí bàń.

⁹Nnabiyaamu, taa nín̄ gbùkum̄maan tɔb pu, án nín làá ŋá pu Unimbɔti ń taa yíiń-ni ibɔsoonee. Úǹ ubɔsoonlee kaa dátiǹ-ti, u yú kipunyɔkɔpu ki làá kíĺ ibɔsoon.

¹⁰Nnabiyaamu, téetímaan Unimbɔti bɔnaatiliibi bin nìn sòon̄ u-puee falaabi nì bi-mɔtiiki pu, kí nīn bímaan míǹ.

¹¹Ti pàkà-bi kun puee bi yúl̀ deedee. Ni gbìl̄ bi sòon̄ Yoob mɔtiiki pu, ki nyí u nín jíń kimɔtii ki kátì, ti-Dindaan ŋá-u miŋyee, kun puee ti-Dindaan sá usaasɔl ní ki ŋān̄[20].

¹²M-nabiyaamu, tin kaa pée máaǹ ní ŋée di sá ní taa pùtī. Ní taa pùtī yilpu kí taa pùtī taapu, kí taa pùtī báà tiba nì tiba poon. An yaa sá Iiiŋyee, kíímaan «Iiin,» an yaa tí sá Aayeeyaaa, kíímaan «Aayee,» án nín làá ŋá pu ní taa kɔ́ Unimbɔti bɔtinee[21].

¹³Ni-kansikin ubɔ yaa bí falaa poonee, ú nīn mèé Unimbɔti. Ubɔ yaa tí bí ni-kansikin dipɔɔpindi poonaaa, ú nīn gà ilan ki nyɔ́ŋkí Unimbɔti.

¹⁴Ubɔ yaa tí bí ni-kansikin ki būǹee, ú tɔ̄ bí yíiń Kriisitoo nikitil kpilib ń dāan̄ kí dū ŋkpam kí jōō u-yil pu kí yíiń ti-Dindaan yindi kí mèè kí tīī-u[22].

¹⁵Bi yaa máká Unimbɔti pu ki mēē-u, see ubunlee ń ŋmátí. Ti-Dindaan làá tīī-u ŋgbampɔn. Báà u yaa ŋá ikpiti iba, Unimbɔti làá dūú pɔ̄-u.

¹⁶An puee, nín̄ bìitī ni-kpitii pu ki tùkùmaan tɔb, kí nīn mèé ki tììmaan tɔb, kí ŋmā kí nīn kāntí dicáaǹdi. Di sá yii unil un yú deedee Unimbɔti nimbiinee yaa dū u-pɔbil kɔkɔ ki mēē-uee, an tūǹ atuŋkpaan ní.

¹⁷Eelii mun nìn pée tí sá unifutifoo kii ti nín bí pu nan ní, ní ki nìn mēē Unimbɔti nì u-pɔbil kɔkɔ, yii utaa ń taa ti nì, ní utaa kaa lafun gíti jōō kitiŋ pu áli abin ata nì dijandi.

¹⁸Boonee ní u fātìi tí mēē, ní utaa nìn̄, ní kitiŋ lòon̄ tijikaal[23].

¹⁹M-nabiyaamu, ni-kansikin ubɔ ŋūǹ kí dū Unimbɔti saŋŋu ki fá ní ubɔ mun ŋūǹ kí fàtīí gíiǹní-u.

²⁰Too, ni máaǹ kí béé yii un di yaa nyántìń unil nsaŋkpitin ki gíiǹní-u nsammɔnti poonee, udaan fīī u-nabiki gbanti naŋki ki nyántì ŋkúm ŋaan dee. Udaan nín ŋá mimmee puee, Unimbɔti làá dūú pɔ̄-u[24].