Read Ntcham 1 Pierre 1 Bible Online

1 Pierre 1 - Ntcham bible

1 Pierre 1

¹Man Peetroo un sá Yeesu Kriisitoo kpambalee di jáaḿ-ni. M ŋmàn̄ kugbɔŋu nee kí tīī nimbi bin Unimbɔti lútì ni yàl̄ ki bíń kunicaŋu Pɔnti nì Galaati nì Kapadoosi nì Asii nì Bitinii timmunee ní.

²Ti-Baa Unimbɔti lútì-ni ní nīn sá u-yab u-Fam pu. U nìn pée lī míǹ ki yóoǹ dooooyee ní. Kun puee u là ní nīn tɔ́ Yeesu Kriisitoo u-fatikuu ń fíntí-ni ní nyā. Unimbɔti ń ŋá-ni tiŋan kí tīī-ni ŋgbansɔŋfi tikpil.

³Tí nyɔ̄ŋkì Unimbɔti ti-Dindaan Yeesu Kriisitoo Baa, kun puee u súń ti-saai tikpil. U nín fīkitì Yeesu Kriisitoo ditaŋkpiilinee ní u pú-ti nsan tí kɔ́ dimaŋfapɔndin. Kɔŋkɔnnee ti cáá dimákal tiŋman pu yal.

⁴An pu ní ti cí ú tīī-ti difakal din u yóoǹ kí dāá tīī bin sá u-yabee. Difakal gbantee kaa bíiĺ, kaa jòontí, kaa dóotí. Unimbɔti dū-dì ki kpáafì yilpu ki yóoǹ nimbi ní.

⁵Ni nín fōō Unimbɔti bɔti ki kííyee ní u ŋúb́-ni taapu doo nì u-pɔŋŋu, án nín làá ŋá pu ŋwindalee, ú dāá tīī-ni difiil din u bɔ́ntì ki yóoǹee, báà ŋma ń dāá wāl̀.

⁶Míǹ puee ní yàntī án nīn mɔ̄ǹ-ni báà ŋyunti fiii ŋun poon ti bí nee gba ní icɔŋki nín bí puee nì i-nyɔkɔm yaa cāabìń-ni kunimbaau.

⁷An falaabee sá kí cɔ̄ŋkì kí kpèè yii ni-fookiiu pɔ̄ɔ̄yaaa, waa pɔ̄ɔ̄ ní. Kpèèmaan, sindaariya un bí ki làá wāŋkì ŋwindalee. Bi ŋáań-u ŋŋmin ní kí kpèè yii u sá umɔntaaa, waa sá. Míǹ mbaantiimin ní falaa sá kí cɔ̄ŋkì ni-fookiiu un jítiǹ sindaariya pu kpataaayee kí kpèè yii u pɔ̄ɔ̄yaaa, waa pɔ̄ɔ̄. Ni-fookiiuee cáá kudapɔɔu ki jítiǹ sindaariya pu kpataaa. Ni yaa jáń ki nyáń icɔŋki poonee ní Yeesu Kriisitoo ń dāá pàkà-ni kí tīī-ni tinyool nì jilma u-gítintam dal.

⁸Yeesu Kriisitoo gbantee, naa ká-u nì ni-nimbiliŋ, ama ni néeń-u. Ni fōō-u ki kíí kaa wāĺ-u[1], ki fàal̀ nì dipɔɔpiŋkpaandi din baa ŋūǹ kí māafèe.

⁹Kun puee ni làá dāá fōō ni-fookiiu paati tin sá ni-nammu fīitamee.

¹⁰Bibɔnaatiliibi nìn nyàab̄ mmɔntiim kí béé difiil bɔti tiŋan. Bi nìn sòon̄ dipɔl din ni làá fōō nee pu ki síiǹ.

¹¹Kriisitoo Fam di nìn bí bi-ni ní ki dàkā-bi falaa un u làá dāá jēe nì tinyool tin làá dāá páanní falaayee boonee[2]. Unimbɔti bɔnaatiliibi nìn nyàab̄ kí béé ŋyunti nì min ní tíǹ gbanti kɔkɔ làá bàńee.

¹²Unimbɔti nìn lēē ki dàkā u-bɔnaatiliibi yii tibɔti tin bi bí ki sòoǹee, bíǹ kaa làá ká ti-poon tiba, ama nimbi di dāa yì. Kɔŋkɔnnee bin sòoǹ Kriisitoo Bɔmɔntiitee sòon̄ nì ni tibɔbaantiil gbanti ní, kun puee Unimbɔti Fam min nyánní yilpuee di dàkā-bi. Áli gba Unimbɔti tuuŋyi mun bàà là kí béé min ní an bɔtee làá jītée.

¹³Míǹ puee, ní bɔ́ntí ni-ba ni-nimbiliŋ ń nīn cɔ́ tiŋan tin pu ni máká yii Yeesu Kriisitoo yaa láa gítìń ni làá dāá fōōyee pu, kí nīn ŋúb́ ni-ba.

¹⁴Ní nīn tɔ́ Unimbɔti, kí taa nín̄ gíti nóó ni-bimbikpitim min naa nìn dáá nyí ki ŋáańee.

¹⁵Ní nīn bí circir ni-bimbim kɔkɔ poon kii Unimbɔti un yíiń-nee nín bí circir puee.

¹⁶A lì kii Unimbɔti nín lī u-gbɔŋku poon puee yii: «Nín̄ bímaan circir kun puee man bí circir ní[3].»

¹⁷Ni-wimmeem poonee ni yíì Unimbɔti yii ni-Baa. Ama ní téetí yii úǹ di sòoǹ báà ŋma bɔti ki nóó nì min udaan ŋée, kaa gàntī, an puee iyunti in kíǹ ní dū kí kàl̄ duulinyanee, dàkàmaan-u ni-bimbim poon ni nín tɔ́-u puee.

¹⁸Nimbi ni-ba nyí Unimbɔti nín dī min ki nyántìń-ni ni-naanjab saŋyi in ni nìn nóó fám tiba kpá poonee. An kaa sá tiwan tin bíiĺ kii animbilee àá kii sindaariyee ní u dū ki nyántì-ni.

¹⁹Ama an sá nì Kriisitoo fatikuu un jítiǹ tikɔkɔ nì tikɔkɔee ní u dū ki nyántì-ni. Kriisitoo di sá kii dipibimɔntiil din pu baa kāntí tikpitil tiba nì tibee.

²⁰Unimbɔti lēē Kriisitoo ki wāatì ní ki nín náań duulinya. Ni-puee ní u nyántì-u ŋyuntijoolkaa nee poon.

²¹U-pu ní ni fōō Unimbɔti un fīkitì-u ditaŋkpiilin ki tīī-u tinyoolee ki kíí, án nín làá ŋá pu ni-fookiiu nì ni-mákal ń nīn cɔ́ Unimbɔti puee.

²²Ni nín nóó mbaamɔn saŋŋuee ní ni kpántì circirdambi, ní ki néeń ni-nabiyaamu bin mun fōō ki kííyee mbaamɔmin. Míǹ puee nín̄ gbíntì ki néeḿmaan tɔb tikpil nì dipɔbil diba.

²³Di sá yii Unimbɔti di tīī-ni dimaŋfapɔndi. Dinyɔɔbundi gbantee kaa sá kii ŋwambool ŋun kúùyee cee. Dinyɔɔbundee kaa kúù, di bí ní ki cá jaanjaan.

²⁴Kii Unimbɔti gbɔŋku poon nín lī puee yii: «Binib kɔkɔ bí kii kumoouee ní, ní bi-nyooti bí kii mpumpukumee, kumoou kōō ní mpumpukum ń gbátí.

²⁵Ama ti-Dindaan bɔti tíǹ pée bí ní kí nīn cá jaanjaan[4].» Tibɔti gbanti di sá Kriisitoo Bɔmɔntiiti tin bi cáań ki sòon̄ nì ni nee.