Read Ntcham 1 Pierre 2 Bible Online

1 Pierre 2 - Ntcham bible

1 Pierre 2

¹Míǹ puee, ní fá tibɔkpitil kɔkɔ nì inyimɔn kɔkɔ nì mpoonnyoon nì ipoompoon nì tibɔfan disoondi.

²Ní nīn néeń Unimbɔti bɔti kii mbipɔmu nín néeń mbiim puee kí ŋmā kí cù nyɔkɔpu Unimbɔti saŋŋu poon kí tin kátí-ku.

³An bí kii Unimbɔti gbɔŋku poon nín lī puee yii: «Ni dáká ki ká ti-Dindaan nín mɔ̄ puee[5].»

⁴Sútiń kí pìl̄maan ti-Dindaan Yeesu un tìì dimaŋfalee. U sá kii ditaŋkpal din bí dimaŋfalin ní binib dūu fée, ama Unimbɔti ká yii dì cáá kudapɔɔuee ní u lēē-dì.

⁵Nimbi bin mun ká u-cee dimaŋfalee, sútiḿmaan kí nīn sá kii ataŋkpeeyee Unimbɔti ń dūú mā u-kɔŋkooŋŋu. Ní yàntī Unimbɔti Fam ń dū-ni kí kpántí bisaraaŋaliibi bin bí circiree, kí dū ni-ba kí tīī Unimbɔti. Yeesu Kriisitoo puee ní nīn sá saraa un fáatì-uee.

⁶Kpèèmaan Unimbɔti nín lī u-gbɔŋku poon puee yii: «M lēē ditaŋkpal din cáá kudapɔɔuee ki dū-dì ki tíĺ kii ditampinjalee m-diiku kun bí Siiyɔn jool puee. Un kamaa di yaa fōō-dì ki kííyee, icoo kpá kí jī udaan.»

⁷Dipoondi gbantee sá ki tīī nimbi bin fōō ki kííyee ní, nimbi bin nyí yii ditaŋkpalee sá-ni tiwaŋkpaandi ki jítiǹ tikɔkɔ nì tikɔkɔee. Ama bin kaa fōō ki kííyee pu ní Unimbɔti gbɔŋku sòon̄ ditaŋkpalee pu yii: «Ditaŋkpal din bidimaliibi nìn dūu fée di dāa kpántì ditaŋkpal din ŋúb́ kudii pɔŋŋuee.»

⁸An gíti lī laaba yii: «Ditaŋkpal din binib gbéetée dee, díǹ di yàntī binib lítí[6].» Kun pu bi lítée di sá baa là kí pīlifì Unimbɔti bɔti. An di yì-tì ní Unimbɔti yóoǹ yii an bàń-bi míǹ.

⁹Ama nimbee, ni sá dinibul din Unimbɔti lútì dí nīn sá u-yalee ní. Nimbi di sá u-Beelin saraaŋaliibi ní ki sá Unimbɔti bindi pu timbundi. U yíiń-ni ní nyānní dibɔmbɔndin kí kɔ́ u-walifimɔntiŋun, kí ŋmā kí lēē u-tunnyaaŋŋi pu seera[7].

¹⁰Dooooyee, naa nìn sá Unimbɔti nibul, ama kɔŋkɔnnee ni kpántì u-nibul. Dooooyee, naa nìn nyí yii Unimbɔti sūǹ binib saai, ama kɔŋkɔnnee u súń ni-saai ni béè[8].

¹¹M-nabineeŋkaamu, m mèé-ni kii ni nín sá binicambi duulinya nee poon puee, ní cúúmaan ni-ba nì bikɔdeekpitib, kun puee an di jáaǹ kinaŋ.

¹²Ní nīn cáá mbimbimɔntiim bin kaa nyí Unimbɔtee kansikin. Báà biba yaa bàà bíi kúŋfí ni-boon yii ni sá binikpitibaaa, bi yaa ká ni-tunnyaaŋŋee, Unimbɔti ń yàntī bí béé yii an tunnyaaŋŋi nyánní úǹ cee ní, ní bí pàkà-u ŋyunti ŋun u yaa láa dɔ́mińee.

¹³Ti-Dindaan puee, nín̄ tɔ́maan biyidambi, kí nīn tɔ́ gɔmina un cáá mpɔn ki kpèé kitiŋ kɔkɔee,

¹⁴kí nīn tɔ́ bibɔtiibi bin bi kāaǹ bí nīn dátí digaŋgandambi tafal, kí nīn pàkà bin ŋáań tiŋanee[9].

¹⁵Unimbɔti nín là puee di sá ní nīn ŋáań tiŋan án pìin̄ bigbaambi bin kaa nyí tibee nyɔmmu, bí taa ká tiba kí sòoǹ ni-pu.

¹⁶Ní nīn bímaan kii binib bin Kriisitoo tīī dibatɔlee. Ní taa nín̄ sá binib bin dì dibatɔl pu ki kāntí inaakpal ki ŋáań ikpitee. Ama dūmaan ni-batɔlee kí nīn ŋáań kii Unimbɔti tɔntɔnliibee.

¹⁷Nín̄ tɔ́maan binib kɔkɔ, kí nīn néeń Kriisitoo yab, kí fàŋkìmaan Unimbɔti, kí nīn tɔ́ gɔmina.

¹⁸Nimbi bin kā binib ceeyee, ní sìntīǹ ni-ba taapu kɔkɔ kí tīī ni-kpilib kí nīn tɔ́-bi mmɔntiimin. An kaa sá bidambi yaa sá binib ki mɔ̄ee baba ní ní nīn tɔ́-bi, báà bidambi bɔti yaa pɔ̄ɔ̄yaaa, ní nīn tɔ́-bi.

¹⁹Ni nín ŋáań Unimbɔti lammee puee ní bidambi yaa bíi sàantí-ni fámee, an ŋān̄. Unimbɔti làá bìin̄ ni-boon.

²⁰Bi yaa bíi gbáà-si digaŋgam pu ní a jīǹ kimɔtiiyee, ipaati ilai ní a làá ká poon? Ama a yaa ŋá tin ŋān̄ee ní bi yaa bíi sàantí-si ní a jīǹ kimɔtiiyee, míǹ di ŋān̄ Unimbɔti nimbiin.

²¹Kun pu Unimbɔti là ní nīn bí mimmee di sá Kriisitoo u-ba jíń falaa míǹ ni-pu, ní ki bí yii ni mun ń nóó u-tabɔbiliŋ kí jī falaa gbanti.

²²Waa ŋá ikpiti báà iba, baa gbìl̄ u-nyɔkɔn nnyimɔn ŋubɔ[10].

²³Bi nín bí ki sìí-uee, waa sīī ubɔ ki téeǹ. Bi nín sāaǹ-uee waa tɔ́-bi mbusu, ama u dū ki ŋá Unimbɔti un sòoǹ tibɔti nì deedeeyee ŋaan ní.

²⁴Úǹ Kriisitoo di fōō ti-kpitii ki ŋá u-ba pu ní ki fōō ti-kpitii tafadaaldi ndɔpuntikaa pu, án nín làá ŋá pu tí nyā ikpiti poon kí nīn kíǹ ki bí deedee maŋfal poonee. Bi nín gbáń-u u-wunti léetì puee di cāantí ni-weeŋyi.

²⁵Kun puee dooooyee ni nìn wáŋkì kii ipii in kaa cáá ukpaalee ní. Ama ní kɔŋkɔnnee ni fātìi gítìń un sá upikpaal ki sá un cí ni-nammuee cee.