Read Ntcham 1 Pierre 3 Bible Online

1 Pierre 3 - Ntcham bible

1 Pierre 3

¹Nimbi binimpoobi mun, ní sìntīmaan ni-ba taapu kí tīī ni-calib[11]. Niinee ni-calib kansikin biba yaa kaa fōō Unimbɔti bɔti ki kííyee, bi yaa ká ni-bimbimɔntiimee, bí fōō kí kíí án taa nín̄ gíti sá nì kinyɔkɔ ní ní dū kí sòoǹ nì bi.

²Di sá yii bi làá ká yii ni cáá mbimbimɔntiim ní ki tɔ́-bi.

³Unimpu yaa là kí nīn ŋān̄ee, an kaa sá ú nīn dàkafī tiwun nyaaŋku ŋmaniŋma pu, an dàkà yii diyikpiboobil nì sindaariya falfatib nì an léeŋkaati, nì tiwammɔntiil dilòondi[12].

⁴Ama u máaǹ kí dàkafì u-bimbim min u cááyee pu, an dàkà yii u-pɔbil poon ń nīn ŋān̄, ú nīn mɔ̄, ki bí soooo. An nyaaŋkuee di kaa jòontí. Míǹ di ŋān̄ ki jítiǹ tikɔkɔ Unimbɔti nimbiin.

⁵Dooooyee nimpoobi bin nìn bí circir ki máká Unimbɔti puee nín nìn bɔ́ntí bi-ba puee dee, ní ki sìntīǹ bi-ba taapu ki tìì bi-calib.

⁶Ti-naanja Abraam nimpuu Saara nín nìn bí puee dee. U nìn sīntiǹ u-ba ní ki tīī u-cal Abraam, ní ki yíì-u u-dindaan[13]. Ni yaa ŋáań tiŋan, kaa yàntī tiba ń fàaǹ-nee, mimmee, ni kpántì Saara naantiibi dee.

⁷Míǹ mbaantiim ní nimbi bininjabee, ni mun ń nīn ŋúb́ ni-nimpoobi tiŋan, kí nīn nyí yii bi-pɔŋŋu kaa bàn̄ ni-yɔŋu, kí nīn tɔ́-bi[14], kun puee dimaŋfal din kaa kúntée mbaanti ní Unimbɔti làá dāá tīī uninja nì unimpu. Ni yaa bí mimmee, tiba kaa lìkintí ni-wimmeem.

⁸Nimbi bin kíǹee, ni-kɔkɔ ń nīn cáámaan nlandɔkɔbaanti kí nīn sūǹ tɔb saai kí nīn néeń tɔb kii nnabiyaamuee, kí nīn ŋáaḿmaan tɔb tiŋan kí nīn sìntīǹ ni-ba taapu ki tìì tɔb.

⁹A-juti yaa ŋá-si min kaa ŋān̄ee á taa téeǹ-u. U yaa tí sīī-saaa, á taa sìì-u kí téeǹ, ama mèè Unimbɔti ń bìin̄ udaan pu[15]. Di sá Unimbɔti pōoǹ yii u làá bìin̄ ni-pu ní, an pu ní u yíiń-ni.

¹⁰Kii Unimbɔti gbɔŋku poon nín lī puee, yii: «Un yaa là kí kàl̄ kí jī mmɔn u-wiiŋyi poonee, ú cúú u-limbil kí taa nín̄ sòoǹ tibɔkpitil kí taa nín̄ mɔ́ntí.

¹¹Ú fá tikpitil kí nīn ŋáań tin ŋān̄ee, kí nīn nyàab̀ ŋgbansɔŋfi nì dipɔ́ɔǹdi baabadal.

¹²Kun puee ti-Dindaan kpèé bin bí deedeeyee tiŋan ní ki fòol̄ bi-wimmeem, ní ki fàtī u-kpaŋkpamboon ki tìì bikpitiŋaliibi[16].»

¹³Ni yaa cáá difaŋgiil ki ŋáań tiŋanee, ŋma di làá ŋá-ni tikpitil?

¹⁴Báà tiŋan tin ni ŋáańee pu ní ni yaa bíi jīǹ falaayee, ní taa yàntī án nīn wù-ni. Ní taa yàntī binib ń bīil̀ ni-pɔbiliŋ kí kɔ́ǹ-ni tifaandi.

¹⁵Ama, ní nīn tɔ́maan ti-Dindaan Kriisitoo ni-pɔbiliŋin[17], kí bɔ́ntí kí nīn cí baabadal un kamaa di yaa bālifì-ni ni-mákal din ni cáá Kriisitoonee taapuee, ní ŋmā kí kíí-u.

¹⁶Ama ní kíí an nibee soooo kí nīn tɔ́maan-bi, kí taa yàntī bí ká ni-pu ibɔkpiti iba kí sòoǹ. Ní nīn gbíntì ki dàkà ni-bimbimɔntiim min ni ká Kriisitoonee, án nín làá ŋá pu ubɔ yaa bàà làá bīil̀-nee, icoo ń cúú udaanee.

¹⁷An ŋān̄ á jī falaa tiŋan tin a ŋáańee pu, míǹ di yaa sá min Unimbɔti lèe, ki jítiǹ á jī falaa a-kpitii pu.

¹⁸Di sá yii míǹ ní Kriisitoo u-ba mun kpíì binib kpitii pu. U kpíì dibaba ja ní binib kpitii pu, úǹ un bí deedeeyee kpíì bin kaa bí deedeeyee pu. U ŋá míǹ kí ŋmā kí cáań-ti Unimbɔti cee ní. Bi kūū-u ama ní Unimbɔti Fam fātìi gíiǹní-u dimaŋfalin.

¹⁹U kpíìyee ní ki cūtì ditaŋkpiilin ki sòon̄ Unimbɔti bɔti ki tīī bitaŋkpiibi bin bí sarkan niinee,

²⁰an dàkà yii binib bin kɔkɔ nìn bí Noowa yuntiŋuee. Bi-kansikinee, binib binii jantanja di nìn kɔ́ meelan ki dēeǹ nnyim pu ki ŋmátì. Ama bin kíǹee kpíì, kun puee bi kpēē Unimbɔti mɔtiiki fám ŋyunti ŋun Noowa nìn bíi kpáà meelee[18].

²¹Nnyim min nìn fīī binib biniiyee náań nì min ni fùul̀ ki kāntí difiil nan ní. Unimbɔti nyim difaldee kaa sá kí lēē tiwun pu jɔkɔnti, an sá kí mèè Unimbɔti ú fíntí ti-pɔbiliŋ ń nyā circir ní. Yeesu Kriisitoo fìkititam pu ní Unimbɔti nyim difaldi cáá mpɔn kí fīī-ti.

²²U búntì yilpu ki kāl̀ Unimbɔti ŋaŋgiiliŋu pú, kí jī dibeel ituun nì bin kɔkɔ cáá ipɔn ki bí yilpuee pu.