Read Ntcham 1 Pierre 4 Bible Online

1 Pierre 4 - Ntcham bible

1 Pierre 4

¹Ni nyí yii Kriisitoo kpíì, míǹ puee ni mun ń nīn bímaan kii ni kpíìyee. Kun puee un kpíìyee, úǹ kaa ti ŋáań ikpiti.

²Kí yòon̄ kɔŋkɔnnee kí nīn cée, ní dū ni-yuntii in kíǹ ní dūú kàl̄ duulinyanee kí dūú ŋá min Unimbɔti lèe, kí taa ti ŋá min fáatì ni-wuntee.

³Dooooyee, ni nìn dū ŋyunti tikpil ki ŋá kii bin kaa nyí Unimbɔtee nín ŋáań puee. Ni nìn ŋáań tin kɔkɔ cāabìń ntimbiilee, ní ki ŋáań tijɔkɔndi, ki bí jiŋaalib poon baabadal, ki nyù idafi ki gbéè, ki jīǹ ki lákatí ni-ba pu, ki tòotī awaa, kun mun kaa ŋān̄ kpataaa Unimbɔti nimbiinee dee. Kɔŋkɔnnee an ŋmāntì.

⁴An ŋá bin kaa nyí Unimbɔtee maamaaci ni nì bi nín kaa ti kpáfí ki ŋáań tin cāabìń ntimbiilee, ní bi sìí-ni.

⁵Ama bi làá dāá yūĺ kí sòoǹ bi-tuŋkpitiŋ gbanti pu Unimbɔti un bɔ́ntì ki cí kí sòoǹ binifoobi nì bitaŋkpiibi bɔtee nimbiin.

⁶An pu ní Tibɔmɔntiil bàn̄ bitaŋkpiibi, án nín làá ŋá pu bi yaa sòon̄ bi-bɔti kii binifoobee, bí nīn bí dimaŋfalin ŋfamin Unimbɔti nimbiinee.

⁷Duulinya kúntitam tóobiń, ní ŋúb́ ni-ba mmɔntiim kí fìntīmaan kí ŋmā kí nīn mèé.

⁸Ama kí wàatēe, ní nīn néeḿmaan tɔb tikpil, kun puee un cáá dineendi tikpilee bìintí ikpiti tikpil pu ní[19].

⁹Ní nīn fòol̄ ni-jutiibi ni-dumpui kí taa nín̄ gbùkum̄.

¹⁰Kii Unimbɔti nín pú-ni ŋŋmam mì bí tɔbin puee, nín̄ cáa tútúm̀maan tɔb. Ni yaa bíi ŋáań mimmee, binib làá ká Unimbɔti ŋanti kɔkɔ tin u là kí tīī-bee.

¹¹Un ní Unimbɔti pú ú nīn sòoǹ u-bɔtee, ń sòoǹ-tì. Un ní u yaa tí pú ŋŋmam ú nīn tútúǹ u-jutiibee máaǹ kí dū ŋŋmam min Unimbɔti tīī-uee ní kí dūú tūtuǹ binib, án nín làá ŋá pu tin kɔkɔ ni ŋáań nì Yeesu Kriisitoo tūtuntam puee, án nīn tìì Unimbɔti tinyoolee. Úǹ di pée yì tinyool nì mpɔn kí nīn cá jaanjaan! Ameeni.

¹²Nnabineeŋkaamu, án taa ŋá-ni maamaaci icɔŋkikpaan in poon ni bí nee kii an sá-ni tibɔcanee.

¹³An yaa sá yii ní jī falaa un Kriisitoo jíńee, ní nīn fàal̀maan, án nín làá ŋá pu daliŋkin u làá dāá dàkà u-nyootee, ní dāá ká dipɔɔpiŋkpaandi yaadalee.

¹⁴Ni nín nóó Kriisitooyee pu ní bi yaa sìí-nee, án nīn mɔ̄ǹ-ni, kun puee Unimbɔti Fam min cáá tinyoolee bí ni-pu.

¹⁵Ni-kansikin ubɔ falaau ń taa nín̄ sá yii u kūū unil àá u yùn̄ tiba, àá u sá digaŋgandaan, àá u cáá u-ba ki tɔ́ biba bɔtin.

¹⁶Ama an yaa sá yii a nín nóó Kriisitooyee pu ní a yaa bíi jīǹ falaayee, án taa nín̄ cáá-si icoo, á nīn jáaḿ Unimbɔti yii binib béè yii a sá Kriisitoo yɔu.

¹⁷Ŋyunti ŋun Unimbɔti làá sòoǹ báà ŋma bɔtee bāań ní nee. U làá péé péé kí sòoǹ bin sá u-yabee bɔti ní. Mimmee, u yaa ká timbi bin sá u-yabee pu tiba ki sòon̄ee, mana ní bin yíì kaa fōō Unimbɔti Bɔmɔntiiti ki kííyee cee dāa nín bí dee?

¹⁸Kii Unimbɔti gbɔŋku poon nín lī puee yii: «An yaa pɔ̄ɔ̄ ki tīī bin nóó Unimbɔtee ń tin ŋmátée, mimmee bin kaa nóó Unimbɔtee nì bikpitiŋaliibee, bíǹ cee dāa nín bí mana dee?»

¹⁹Míǹ puee, bin bí ki ŋáań min Unimbɔti là ní ki bíi jīǹ falaayee ń pɔ́ɔǹ bi-ba kí mɔ̀tīí nīn ŋáań tiŋan, kí dū bi-mákal kɔkɔ kí ŋá bi-náanliu un ŋáań tin u pōoǹee ni.