Read Ntcham 1 Pierre 5 Bible Online

1 Pierre 5 - Ntcham bible

1 Pierre 5

¹Kɔŋkɔnnee m bíi sòoǹ nì Kriisitoo nikitil kpilib bin bí ni-kansikinee ní nee. Ma mun sá Kriisitoo nikitil kpiliu ní m-ba. M ká Kriisitoo falaabi nì m-nimbiliŋ, ní ki làá dāá fōō m-jandi tinyool tin làá dāá nyēe poon.

²M bàlifī yii ní kpàà Unimbɔti nikitil din u dūu ŋúbiǹ-nee[20]. Ní dū nlammɔntiim min fáatì Unimbɔtee kí kpàà-dì, án taa nín̄ sá nì kugaau, kí taa nín̄ tí sá yii ni tūǹ ki nyàab̀ animbil. Ama nín̄ tūm̀maan nì ni-pɔbiliŋ kɔkɔ.

³Ní taa nín̄ wɔ́b́ binib bin bi dū ki ŋúbiǹ-ni ní kpààyee, ama nín̄ sámaan binib bin bimbim sá mmɔntiim bí nīn kpèé ki tááyee.

⁴Ni yaa ŋúb́-bi míǹ, áli ki tin sāā daliŋkin ní Kriisitoo upikpaakpil làá bàńee, u làá dāá tīī-ni tinyool beefuuliiki kin làá nīn bí jaanjaanee.

⁵Nimbi binaacimpɔmbi mun, ní sìntīǹ ni-ba taapu kí tīī bikpilib. Ni-kɔkɔ ń sìntīǹ ni-ba kí tīīmaan tɔb kí nīn tūǹ atuun ki tìì tɔb, kun puee Unimbɔti gbɔŋku poon lī yii: «Unimbɔti kaa gèetíǹ bilambidambi, ama ní ki ŋáań tiŋan ki tìì bin sìntīǹ bi-ba taapuee[21].»

⁶Míǹ puee, sìntīm̀maan ni-ba Unimbɔti Mpɔŋkɔdaan taapu, án nín làá ŋá pu ŋyunti ŋun Unimbɔti yóoǹee yaa láa bāańee, ú dāá yòon̄-ni yilpuee[22].

⁷Túutímaan ni-gìŋ́ŋi kɔkɔ kí páań u-pu, di sá yii úǹ di pée kpèé-ni[23].

⁸Ní nīn wálifì, kí nīn nyíǹ ni-ba, kun puee ni-nannanliu Sitaan bí ki yìiǹ kii gbikinti nimbiliŋ nín máǹ pu u nyàab̀ kun u yaa pée kée ú cúú kí ŋmɔ́ee ní.

⁹Míǹ puee, ní ŋúb́ ni-ba ni-fookiiu poon, kí yíí Sitaan. Kun puee ni nyí yii ni-nabiyaamu mun yàl̄ duulinya jaŋŋi kɔkɔnee bí ki jīǹ falaa gbanti ubaanti míǹ ní.

¹⁰Ni làá jī falaa ŋyunti ŋubɔ fiii ní. Ama Unimbɔti un néeń-ni tikpilee yíiń-ni ni mun ń dāan̄ kí ká u-nyooti tin bí kaa kúntée ni nì Kriisitoo nín ŋá ubaantee pu. U làá yàntī ní kpántí deedee nib kí nīn bá ki pɔ̄ɔ̄, ní ubɔ kaa dāa gíti bí ki ŋūǹ kí téé-ni kí lúkú.

¹¹Úǹ di yì mpɔn kí nīn pée cáa cá jaanjaan! Ameeni.

¹²Siilasi[24] ní m kàan̄ anyɔɔbuŋkaaŋkaa nee ki tùkū, ki yāntì u ŋmàn̄-ni kugbɔŋu nee, kun puee m nyí yii u sá kinabiki kin yú deedee nnimbɔtisan poonee. M là kí tīī-ni kunyannyaau kí mɔ̀tīí tùkù-ni nì ibaamɔn yii Unimbɔti ŋanti tin ni fōōyee, tì lafun sá míǹ ní, ní nīn ŋúb́-tì án nīn pɔ̄ɔ̄.

¹³Babiloon nikitil din Unimbɔti lútì kii u nín lútì ni mun puee, jáaḿ-ni. Maarki un kpántì kii m-jipɔɔnee mun jáaḿ-ni.

¹⁴Ní jāam̀maan tɔb nnabiyaamin. Unimbɔti ń tīī nimbi bin kɔkɔ sá Kriisitoo yabee ŋgbansɔŋfi.