Read Ntcham 2 Pierre 1 Bible Online

2 Pierre 1 - Ntcham bible

2 Pierre 1

¹Man Siimɔn Peetroo un sá Yeesu Kriisitoo kpambal ki sá u-tɔntɔnliu muee di ŋmàn̄ kugbɔŋu nee. M ŋmàn̄-ku kí tīī nimbi bin fōō Unimbɔti bɔti ki kíí mbaantiim kii timbee. Yeesu Kriisitoo un sá Unimbɔti ki sá ti-Fiiliuee di ŋá míǹ ki tīī-ti, kun puee u sá deedeedaan.

²Kii ni nín nyí Unimbɔti nì ti-Dindaan Yeesu Kriisitoo puee, ú ŋá-ni tiŋan kí tīī-ni ŋgbansɔŋfi tikpil.

³Yeesu Kriisitoo pɔŋŋu tīī-ti ŋŋmam min ti ŋūǹ kí nīn bí ki nákáǹ Unimbɔtee, ki yāntì ti béè un yíiń-ti tí dāan̄ kí fōō u-nyooti nì u-ŋantee.

⁴Míǹ mbaantiim ní u tí pōoǹ-ti apooŋkpaan ŋin jítiǹ tikɔkɔee, án nín làá ŋá pu ni yaa fōō ipoon gbantee, ní taa nín̄ cáá nnimbitaataam tikpitil pu kí wāŋkì, ama ní fōō mbimbim min náań nì Unimbɔti yamee.

⁵An puee, kii ni nín fōō ki kííyee puee, ní pɔ́ɔm̀maan ni-ba kí nyàab̀ mbimbimɔntiim kí kūtì fookii pu. Ni yaa ká mbimbimɔntiimee, ní nyàab̀ dinyil kí kūtì,

⁶kí pɔ́ɔm̀maan kí ŋúb́ ni-ba kí kūtì dinyil pu. Ni yaa ŋúń ki ŋúb́ ni-bee, ní nyàab̀ kimɔtii. Kimɔtii boonee ní nyàab̀ kí nīn tɔ́ Unimbɔti mmɔntiim.

⁷Ni yaa tɔ́ Unimbɔti mmɔntiiminee, ní nīn néeń ni-nabiyaamu mun nóó Kriisitooyee kɔkɔ, boonee ní kí nīn néeń báà ŋma.

⁸Mbimbimɔntiim min ni máaǹ kí nīn cááyee dee. Ni yaa cáá-mì ní mì wīikí ni-ni tikpilee, án di làá yàntī ní nīn béetí ti-Dindaan Yeesu Kriisitoo mmɔntiim kí nīn cá, ní kí nīn bí kii isufi in lòoǹ asubimɔntee.

⁹Ama un kaa cáá an bimbimɔntiimee kaa ŋūǹ kí wāl̀ kí bà ndan Unimbɔti saŋŋu poon, ní ki pūtì kpáàa súntì yii Unimbɔti nìn fíntì u-pɔbilin kpitii kɔkɔ.

¹⁰Kɔŋkɔnnee nnabiyaamu, ni nyí yii Unimbɔti lútì-ni ki yíiń-ni ní nīn sá u-yab ní. Ni yaa pɔ̄ɔntí ki gbíntìi nóó nsan gbantee, ni kpá kí jēetí tikpitilin.

¹¹Ní Unimbɔti ń dāá pɔ̄-ni nsan ní kɔ́ ti-Dindaan Yeesu Kriisitoo un sá ti-Fiiliuee Beel din kaa cáá dikúntilee ni sɔkɔmii.

¹²M nín là yii ní ká tin m sòon̄ee pu ní m gbíntì ki téetí-ni múlmul, nì min kɔkɔ ni nìn pée nyí-tì ki yú ibaamɔn bɔti tin ni fōō ki kííyee poon ki ŋúb́ an píkée.

¹³Ama m là yii m nín dáá bí nee, ḿ nīn pée cɔ́ an bɔti pu ki téetí-ni múlmul.

¹⁴Kun puee ti-Dindaan Yeesu Kriisitoo tùkū-mi yii an kaa làá ti yúntí m làá kpú.

¹⁵An puee m làá pɔ́ɔǹ nì m-pɔŋŋu kɔkɔ kí dàkà-ni nsàmbiyaamu mun ní ni làá dī kí nīn téetí an bɔti pu baabadal m-kúm boonee.

¹⁶Di sá yii ti-Dindaan Yeesu Kriisitoo dāantam nì u-pɔŋŋu bɔti tin ti sòon̄ ki tùkū-nee kaa sá mmaam min binib nyí bi-landɔkɔyin ki sòon̄ee. Timbi ti-ba di baasii ká-u nì ti-nimbiliŋ u nín sá ukpaan miŋyee.

¹⁷Timbi nimbilin ní u-Baa Unimbɔti tīī-u jilma nì tinyool. Unimbɔti un sá ukpaan tinyooldaanee bí yii: «Un bí nee di sá m-Jipɔɔn un m néeńee, m-pɔbil sɔ̀m̀ u-pu.»

¹⁸Timbi nì u di nìn bí circir jool pu ní Unimbɔti sòon̄ní míǹ yilpu[1].

¹⁹An puee, ti baasii mɔ̄tìi fōō ki kíí Unimbɔti bɔnaatiliibi nín sòon̄ tiŋyee ní. Ní gíiǹ ni-landɔkɔi tibɔti gbanti pu, kun puee tì bí kii fitila nín yú dibɔmbɔndin ki wāĺ pu áli ŋwìiń ń dāá nyānní puee ní, ní Kriisitoo un sá kii utaafaaŋmalbijee ń dāá ŋmíntí ni-pɔbiliŋ.

²⁰Kí wàatēe, tin m là ní bééyee sèé: Ubɔ kaa ŋūǹ kí dū úǹ u-ba ciiŋŋu kí béé tibɔti tin Unimbɔti bɔnaatiliibi ŋmàn̄ ki ŋá kugbɔŋunee.

²¹Kun puee tin kɔkɔ Unimbɔti bɔnaatiliibi lēe, tiba nì tiba kaa nyánní bi-làtamin, ama an sá Unimbɔti Fam di kpōotì-bi, ní bi fōō Unimbɔti paaŋŋu ki sòon̄ u-bɔti.