Read Ntcham 2 Pierre 2 Bible Online

2 Pierre 2 - Ntcham bible

2 Pierre 2

¹Iyunti in jítèe poonee, bin nìn mɔ́ntí yii bi sá Unimbɔti bɔnaatiliibee nìn kɔ́ Unimbɔti nikitil kansikin. Míǹ mbaantiim ní bin dàkà tinyimɔmbɔtee mun làá tí kɔ́ ni mun kansikin. Bíǹ làá cáań tinyimɔmbɔti tin làá nàan̄ binibee ní kí dàkà, ní kí dū bi-kpiliu un fīī-bee kí fá kí yàntī Unimbɔti tafadaaldi ń jēetí bi-pu bí kpú kí céetí dicilpu.

²Binib tikpil làá dāá nóó bi-bimbikpitim gbanti saŋŋu. Bi-yaŋyam puee, binib làá dāá nīn kpākantí mbaamɔn saŋŋu bɔti.

³Bin dàkà tinyimɔmbɔtee là kí kīil̀-ni kí fōō ni-nimbiliŋ ní. Ama dooooyee ní un làá sòoǹ bi-bɔtee bɔ́ntì ki cí kí tɔ̄ u-tundi, un làá céetí-bee kaa dɔ̄ ki gèeǹ.

⁴Di sá yii Unimbɔti kaa nìn tāaǹ ituun in nìn ŋá ikpitee ki cúú-i ki tɔ́ ditafadaaldi paaŋŋun. Bi bóob́-i nì ikusaka i kā dibɔmbɔndin ki cí daliŋkin Unimbɔti làá sòoǹ i-bɔtee.

⁵Unimbɔti kaa nìn tāaǹ duulinyakpiki, ama u nìn cāntì nnyiŋgbeen dɔ́miń ki kúntì binikpitib kɔkɔ, ní ki fīī binib biluli ki kútì Noowa un nìn sòoǹ Unimbɔti bɔti tin bí deedeeyee ki tùkù binibee[2].

⁶Unimbɔti nìn dáaĺ ntimu mun bi yíì Soodoom nì Goomoorayee yab tafal ki yāntì ŋŋmi dɔ́miń ki wùn̄-bi búkú buku. U ŋá míǹ kí dàkà u nín làá dāá dáaĺ binikpitib tafal puee ní[3].

⁷Ŋyunti gbantee, Unimbɔti nìn fīī Looti baba ní, kun puee u nìn bí deedee, ní binikpitibee bimbim nì bi-digaŋgamiu nìn kɔ̄ntí Looti inimɔɔn[4].

⁸Di sá yii Looti nìn kóò bi-kansikin, ki gbìl̀ ní ki kāntí baabadal ikpiti in bi ŋáańee. U nín nìn sá unimɔntee puee, an nìn kɔ̄ntí-u kunimbaau, ki páb́-u tikpil.

⁹Míǹ puee ti-Dindaan nyí u nín dì pu ki nyāntí bin yú nì u deedeeyee dinimbinaamandi poonee, ní ki nyí u nín làá yóoń binikpitib laakin kí dāá dáaĺ bi-tafal ibɔsoon dalee.

¹⁰Bin tafal Unimbɔti làá dāá dáaĺ tikpilee di sá bin dū bi-ba ki tīī bikɔdeekpitib ki kpèé Unimbɔti pɔŋŋu fámee. An dàkà yii bin bɔti m bàà sòon̄ nì ni yii bi dàkà tinyimɔmbɔtee. Baa tɔ́ báà ubɔ nì ubɔ ní bi-pɔbiliŋ nyìm̀. Baa ti tɔ́ Tinyooldambi bin bí yilpuee gba, ama bi sìí-bi ní.

¹¹Ituun in cáá mpɔn ki jítiǹ bin dàkà tinyimɔmbɔti gbantee gba kaa bíi sòoǹ tibɔkpitil bi-pu ti-Dindaan nimbiin.

¹²Binib gbanti ŋáań kii kumooun peelii in pée sá bí nīn cútí-i ki kùee ní. Bi sìí tin baa nyée. Bi làá dāá pée nàan̄ kí céetí-bi ní.

¹³Bi nín yāntì binib jīǹ falaa miŋyee, an falaau ní Unimbɔti làá dāá gíiǹ kí téeǹ-bi. Bíǹ pɔɔsɔŋkil di sá bí nīn ŋáań tin kɔkɔ sá ntimbiilee ŋwiimpu. Naa ká yii binib gbanti yaa dɔ́miń ni nì bi ń jī tijinee, bi kɔ̄ntí-ni tijɔkɔndi nì icoooo? Ní an mɔ̄ǹ-bi bi nín kíiĺ binib puee.

¹⁴Ní bi-nimbiliŋ máǹ bí ŋá tijɔkɔndi. Baa gì nì ikpiti diŋál, ní ki pīil̀ ki sàtī binib bin pɔ̀fì nnimbɔtisan poonee. Bi-landɔkɔŋu di pée sá yii bí ká animbil. Bi sá mbusudambi ní.

¹⁵Bi fá nsammɔnti ní ki gáatì ki nóó Boosɔɔr jipɔɔn Balaam nín nìn là animbil ki dī nsaŋkpiti ŋuŋyee.

¹⁶Ama Unimbɔti nìn wòon̄-u u nín kaa tɔ́-uee pu, di sá u nìn yāntì kimaŋ sòon̄ kii unilee ní ki pīiǹ digbaantundi din Balaam bàà nìn là kí tɔ̄ee saŋŋu[5].

¹⁷Binib gbanti bí kii ibun in kaa cáá nnyimee, ní ki bí kii atagban ŋin kaa cáá ntaanyim kubuŋu cáá-ŋi ki yìiǹee. Mpaan ŋun Unimbɔti bɔ́ntì ki yóoǹ-bee nyóò ní, ki sá dibɔmbɔndi.

¹⁸An nibee dàkà bi-ba ní ki sòoǹ anyɔɔbuŋkpaan ki ŋmàtíǹ binib ní ki sàtī bin pɔ́ɔǹ bi-ba ki nyáń ikpiti saŋŋu poonee ki yàntī bi fàtī ki gítí ikpiti saŋŋu poon.

¹⁹Bi pòontí binib yii bi yaa ŋáań min bíǹ sòoǹee ní bi kāntí dibatɔl, ama ní bíǹ bi-ba sá ikpiti yumbui. Bi súntì yii unil sá kun kpòotī-uee yumbuu ní.

²⁰Bin di béè ti-Dindaan Yeesu Kriisitoo ti-Fiiliu, ki nyáń duulinya bimbikpitim poon, ní ki dāa fātìi gíti yāntì bi-bimbikpitimee cúú-bee, tin poon bi làá kɔ́ee dāa jítiǹ tin poon bi nìn bí dooooyee kpataaa.

²¹Bidambi yaa kaa bàà béèmaan mbaamɔn saŋŋu, an bàà sɔ́ nì bí béé-ŋu, ní boonee kí dū-ŋu kí fá kaa ti tɔ́ maramɔntiibi bin Unimbɔti nìn tīī-bi bi ŋúb́ee.

²²Tin bāań-bi nee dàkà yii dilaŋkpandi nee sá mbaamɔn dee, yii: «Kibɔkɔ wūliŋkì ki fātìi gíiǹ ki ŋmɔ́[6]», ní «Ugbeeti un bi fùl̄ee fātìi lítì tikpatin ki dɔ̄ ki bíntí.»