Read Ntcham 2 Pierre 3 Bible Online

2 Pierre 3 - Ntcham bible

2 Pierre 3

¹M-nabineeŋkaamu, kugbɔnliliitiiu ní m ŋmà-ni nee. Bi-liitil gbanti poonee m là kí téetí-ni tibɔti tin bi nìn dàkā-nee ní ŋmā kí dàkafì ti-pu mmɔntiim.

²M là ní béé tibɔti tin Unimbɔti circir bɔnaatiliibi nìn lī dooooyee, nì tin ti-Dindaan un sá ti-Fiiliuee dūu ŋúbiǹ u-kpambaliŋ dàkā-nee.

³Ama ní nīn nyí iwinjoolkaa poonee, binib biba làá nyā kí nīn ŋáań min fáatiǹ-bee, ki làá dāá nīn bèel̄-ni,

⁴ní ki dāa lì-ni yii: «Kéè, Yeesu Kriisitoo pōoǹ-ni yii u gítińaaa? Kin, doooo nee, u bí la ní kaa bàń? Doooo bitiŋkpikib áli nì díǹ, waa gítìń. Doooo duulinya nín náańee, tin pée bée di gbíntìi bí nee.»

⁵Binib bin sòoǹ mimmee, bi nyí, ama ní ki yíì kaa fōō min Unimbɔti lēe. Unimbɔti nìn sòon̄ u-nyɔkɔn ní kutagbɔŋu nì kitiŋ nyáń. Nì nnyim ní u dūu náań kitiŋ, ní ki gāntì kitiŋ nì nnyim.

⁶Nì nnyim mbaantiimee ní u yāntì nnyiŋgbeen dɔ́miń ki kúntì dooooyee duulinyau[7].

⁷Unimbɔti di tí lī yii yilpu nì taapu un bí nee dɔ̄ ki cí ŋŋmi ń dāá wà daliŋkin u làá dāá sòoǹ binikpitib bɔti kí kúntí-bee.

⁸Ama, m-nabineeŋkaamu, tibɔti tiba di bí tin pu naa máaǹ kí súntée. Tíǹ di sá yii: Ti-Dindaan ceeyee, ŋwiin ŋubɔ sá kii abin kutukuee ní, ní abin kutuku sá u-cee kii ŋwiin ŋubɔee[8].

⁹An kaa sá yii ti-Dindaan sɔ̀m̀ kaa là kí ŋá kii u nín nìn pōoǹ puee, kii biba nín dàkafī puee. Ama u bíi jīǹ ni-pu kimɔtii ki là yii báà ŋma ń kpántí u-bimbim, báà ubɔ ń taa wāŋkì ní.

¹⁰Ama nì míǹ kɔkɔee, ti-Dindaan dāantam làá dāá túuǹ-ti ní kii unaayuu[9] nín tūuntí binib puee. Kutagbɔŋu dāa gà kuwookpaaŋŋu kubɔ ní kí wāŋkì fílamm, ní tiwan tin bí yilpu kutagbɔŋu puee ń wà búkú buku, ní taapu doo wanti kɔkɔ ń wāŋkì.

¹¹Kii tiwan kɔkɔ nín làá dāá kúntí miŋyee puee, ni máaǹ kí béé ni nín làá bɔ́ntí ni-ba pu kí nīn cáá mbimbimɔntiim kí mɔ̀tīí nīn tɔ́ Unimbɔti mmɔntiimee.

¹²Kí nīn cí ŋwiin ŋun Unimbɔti làá dāá dāan̄ee, ŋwiin gbanti ní ŋŋmi làá dāá wà kutagbɔŋu lìblib ní tin kɔkɔ bí yilpuee ń dùntī. An puee pɔ́ɔm̀maan ni-ba án nín làá ŋá pu ŋwiinee ń bàń malaayee.

¹³Kun puee Unimbɔti pōoǹ yii u làá fàtīí náań-ti kutagbɔmpɔŋu nì kitimpɔŋ[10]. Duulinya gbantinee, bin baba ŋáań Unimbɔti lammee di dāa kíǹ ki bí. Duulinya un ti kā ki cée dee.

¹⁴Míǹ puee m-nabineeŋkaamu, ŋyunti ŋun ni dáá kā ki cí duulinya gbanti ń bàńee, ní pɔ́ɔm̀maan nì ni-pɔŋŋu nyɔkɔm kí nīn bímaan circir, Unimbɔti ń taa ká ni-pu tiba. Nimbi nì u kansikinee, ŋgbansɔŋfi ń nīn bí.

¹⁵Ní nīn nyí yii ní ŋmā kí ká difiilee pu ní ti-Dindaan bíi jīǹ kimɔtii kaa láá bāań nìn díǹ. Míǹ ní Unimbɔti tīī ti-nabiki Pɔɔl iciin u mun ŋmàn̄-ni an bɔti gbanti.

¹⁶U-gbɔnti tin kɔkɔ u ŋmàn̄ee, míǹ ní u sòon̄ an bɔti pu. U nín ŋmàn̄ tiŋyee, ajan aba pɔ̄ɔ̄ bí gbìl̄ taapu malaa, ní binib bin nyil kaa náaǹee nì bin kaa béè Unimbɔti bɔti ki kɔ́ poonee kpántí tibɔti gbanti taapu mbamin, kii bi nín pée tí kpántí Unimbɔti gbɔŋku poon ajan aba puee. An nibee bí ki nyàab̀ mbusu ní ki tòó bi-ba pu.

¹⁷Ama nimbee, m-nabineeŋkaamu, kɔŋkɔnnee ti kpáafì-ni, ní nīn nyím̀maan ni-ba, án nín làá ŋá pu ní taa gáatí kí nóó binikpitib bin bí diyìntil poonee kí fá difiil paaŋŋu ŋun poon ni yúee.

¹⁸Ama ní nīn gbíntì ki nìkì ki béetí ti-Dindaan Yeesu Kriisitoo un sá ti-Fiiliuee ki cá, nì u-ŋanti tin u ŋáań-tee poon. Tí tīīmaan-u tinyool kɔŋkɔnnee kí nīn cáa cá jaanjaan! Ameeni.