Read Ntcham 1 Jean 1 Bible Online

1 Jean 1 - Ntcham bible

1 Jean 1

¹Ti ŋmàn̄ kugbɔŋu nee kí tùkù-ni dimaŋfal bɔti. Dimaŋfal gbantee nìn pée bí doooo ŋkilkaamin[1] ní. Ti gbìl̄ dì nín nìn sòon̄ puee, ki wál̀-dì nì ti-nimbiliŋ, ki máań-dì nì ti-ŋalii mun.

²Dimaŋfal gbanti nyáń mpaampiin pu, ní ti ká-dì. An pu ní ti sòoǹ ki tùkù-ni dimaŋfal din kaa cáá dikúntilee bɔti. Dì nìn bí ti-Baa Unimbɔti cee ní u nyántì-dì ki dàkā-ti[2].

³Míǹ puee tin tin ti kée nì tin ti gbìl̄ee ní ti cáa bíi tùkù ni mun, án nín làá ŋá pu ti nì ni kɔkɔ ń kpántí ubaantee. Kun puee timbi nì ti-Baa Unimbɔti nì u-Jipɔɔn Yeesu Kriisitoo ŋá ubaanti.

⁴Ti ŋmà kugbɔŋu nee án nín làá ŋá pu ti-pɔbiliŋ ń mɔ̀tīí pīil̀ee.

⁵Dinyɔɔbundi din ti gbìl̄ Yeesu cee ki cáa tùkù-nee di sá yii Unimbɔti sá ŋwalifi, ní dibɔmbɔndi kpá u-ni báà fiii.

⁶Míǹ puee, ti yaa bí yii ti nì u ŋá ubaanti ní ki gbíntìi còom̄ dibɔmbɔndinee, ti mɔ́ntí, taa dī ibaamɔn.

⁷Ama ti yaa dī ŋwalifi saŋŋu kii Unimbɔti u-ba nín sá ŋwalifi puee, niinee ní ti nì ti-nabiyaamu ŋáań ubaanti, ní u-Jipɔɔn Yeesu fatikuu fíntí ti-pɔbiliŋ circir ki lèekī ti-kpitii kɔkɔ.

⁸Ti yaa bí yii taa cáá ikpitee, mimmee ti bíi kíiĺ ti-ba ní ibaamɔn kaa bí ti-ni.

⁹Ti yaa bīitì ti-kpitii pu, Unimbɔti sá deedeedaan ki cáá ibaamɔn ki làá dū ti-kpitii kí pɔ̄-ti, kí fíntí tin kɔkɔwoooo bí ti-pɔbiliŋin kaa ŋān̄ee, tí nīn bí circir[3].

¹⁰Ama ti yaa bí yii taa ŋá ikpitee, mimmee ti yíì Unimbɔti unyimɔndaan dee. An dàkà yii u-nyɔɔbundi kaa bí ti-pɔbiliŋin.