Read Ntcham 1 Jean 2 Bible Online

1 Jean 2 - Ntcham bible

1 Jean 2

¹M-biyaamu, m ŋmà-ni tin bí nee án nín làá ŋá pu ní taa ŋá ikpitee. Ama ubɔ yaa jéetì ikpitinee, ti cáá un mɔ́tí ti-puee ti-Baa Unimbɔti cee. Úǹ di sá Yeesu Kriisitoo ibaamɔndaan.

²U dū u-ba ki ŋá saraa ti-kpitii pu[4]. Ama an kaa sá timbi kpitii ŋmaniŋma pu, an sá ki kpáaǹ binib kɔkɔwoooo kpitii pu ní.

³Ti yaa kpáafí Unimbɔti marabee, niinee ní ti béetí yii ti nyí-u.

⁴Un yaa bí yii: «M nyí Unimbɔti,» ama ní kaa ŋúb́ u-marabee sá unyimɔndaan, ibaamɔn kaa bí udaanni.

⁵Ama sii un di yaa kpáafí Unimbɔti bɔtee, mimmee sii di néeń Unimbɔti tiŋman. An pu ní a béetí yii a bí Unimbɔtin.

⁶Sii un di yaa lī yii a bí Unimbɔtinee, a máaǹ kí nīn còom̄ kii Yeesu u-ba nín nìn còom̄ puee.

⁷M-nabineeŋkaamu, an kaa sá marapɔɔn ubɔ ní m gíti bíi ŋmà-ni, an sá marakpiki un ni nìn pée nyí doooo ŋkilkaaminee ní[5]. An marakpikiuee di sá Unimbɔti bɔti tin ni nìn pée gbìl̄ee.

⁸Nì míǹ kɔkɔee, u sá marapɔɔn ní m bíi ŋmà-ni. Ibaamɔn in bí mara un nyánní Yeesunee bí ni mun ni, kun puee dibɔmbɔndi bíi jītí ní ŋwalifimɔnti dɔ́miń ki ŋmíntì ti-pu.

⁹Sii un di yaa bí yii a còom̄ ŋwalifin ní ki gbíntìi ná a-nabikee, a dáá gbíntìi bí dibɔmbɔndin.

¹⁰Ama sii un di yaa néeń a-nabikee còom̄ ŋwalifin dee, a kpá kí yàntī ubɔ ń lítí.

¹¹Sii un di yaa ná a-nabikee, mimmee a bí dibɔmbɔndin ki còom̄, kaa nyí laakin pú a cée, kun puee dibɔmbɔndi yāntì a jɔ̀b̄.

¹²M-biyaamu, m ŋmà-ni tin bí nee, kun puee Yeesu yindi pu ní ni ká ni-kpitii pɔ̄tam.

¹³Bibaatiibi, m ŋmà-ni tin bí nee, kun puee ni nyí ti-Dindaan un nìn pée bí doooo ŋkilkaaminee. Binaacimpɔmbi, m ŋmà-ni tin bí nee, kun puee ni jáń ki pɔ́ɔkiǹ Sitaan.

¹⁴Mbiyaamu, m ŋmàn̄-ni tin bí nee, kun puee ni nyí ti-Baa Unimbɔti. Bibaatiibi, m ŋmàn̄-ni tin bí nee, kun puee ni nyí ti-Dindaan un nìn bí doooo ŋkilkaaminee. Binaacimpɔmbi, m ŋmàn̄-ni tin bí nee, kun puee Unimbɔti bɔti bí ni-ni, ni pɔ̄ɔ̄ ki ŋúń ki jáń ki pɔ́ɔkiǹ Sitaan.

¹⁵Ní taa nín̄ néeń duulinya nì tin u cááyee. Sii un di yaa néeń duulinyee, aa ŋūǹ kí nīn néeń Unimbɔti.

¹⁶Kun puee tin kɔkɔ bí duulinyan, an dàkà yii mbimbikpitim kɔdeebi, nì nnimbitaataam, nì unil ń nīn néeń timɔn ki dàkà tigaajatee, tíǹ kɔkɔee kaa nyēeń ti-Baa Unimbɔti cee, an nyēeń duulinyan ní.

¹⁷Ní duulinya nì u-nimbitaataam kɔkɔ jītí, ama un di yaa ŋáań min ní Unimbɔti lèe, udaan làá dāá nīn bí ní jaanjaan.

¹⁸M-biyaamu, ŋyuntijoolkaa sèé. Kii ni nín gbìl̄ yii Kriisitoo nannanliu dòońee, kɔŋkɔnnee Kriisitoo nannanliibi tikpil pūtì kpáàa bāań. Míǹ pu ní ti béè yii ŋyuntijoolkaa sèé nee[6].

¹⁹Ti-kansikin ní binannanliibi gbanti nyáń. Ama baa nìn sá ti-yab, kun puee bi yaa bàà nìn sá ti-yabee, ti-kɔkɔ bàà bímaan mbaantiim ní. An nín ŋá pu nee di dàkà tiŋan yii ti nì bin nìn bée, bi-kɔkɔ kaa nìn sá ti-yab.

²⁰Ama nimbee, ti-Dindaan circirdaan sītì ni-pu Circir Fam, an di yì-tì ní ni-kɔkɔ nyí ibaamɔn.

²¹Míǹ puee, m yaa ŋmàn̄-ni tin bí neeyee, kaa sá yii naa nyí ibaamɔn, ni nyí-i, ki béè yii ibaamɔn poonee, baa kāntí nnyimɔn báà ŋubɔ.

²²Ŋma di sá unyimɔndaan an yaa kaa sá un néè yii Yeesu kaa sá Kriisitooyee? Udaan di sá Kriisitoo nannanliu kaa là Ubaati, kaa là u-Jipɔɔn mun.

²³Un di yaa kaa là Unimbɔti Jipɔɔn Yeesuee, kaa fōō u-Baa mun dee, ama un di yaa lì binib nimbiin yii Yeesu sá Ubaati Jipɔɔnee fōō Ubaati u-ba mun dee[7].

²⁴Míǹ puee, tin tin ní ni nìn pée gbìl̄ doooo ŋkilkaaminee, ní kpāafìmaan-tì ni-pɔbiliŋin. Sii un yaa kpáafì tin ní a pée gbìl̄ doooo ŋkilkaaminee, mimmee sii ŋá ubaanti nì ti-Baa Unimbɔti nì u-Jipɔɔn dee.

²⁵Dipoondi din Yeesu pōoǹ-tee di sá dimaŋfal din kaa cáá dikúntilee.

²⁶M ŋmàn̄ tin bí nee kí sòoǹ nì ni bin là kí ŋmàtiǹ-nee pu.

²⁷Ama nimbee, Yeesu sītì ni-pu u-Fam. An puee, an kaa ti bàlifī ubɔ ń dàkà-ni. Kun puee u-Famee di dàkà-ni tikɔkɔ, ní tin ní u dàkèe sá ibaamɔn, nnyimɔn kpá poon. Míǹ puee, ní kpāafìmaan u-Fam nín dàkà-ni puee, ni nì Yeesu ń nīn sá ubaanti.

²⁸M-biyaamu, ní nīn bí Yeesu cee, án nín làá ŋá pu ŋyunti ŋun u yaa láa páaǹnée, tí dāá nīn cáá kunyannyaau kí yūĺ u-nimbiin kí taa nín̄ cáá icoo daliŋkin u làá bàńee.

²⁹Míǹ puee, ni yaa nyí yii u sá deedeedaanee, béémaan yii un sá kamaa yaa nóó deedeeyee, Unimbɔti di fātìi màl̄ udaan mpɔm.