Read Ntcham 1 Jean 3 Bible Online

1 Jean 3 - Ntcham bible

1 Jean 3

¹Ní kpèèmaan ti-Baa Unimbɔti nín cáá ti-pu dineeŋkpaandi diŋyee! Di sá yii u yíì-ti u-biyaamu[8]. Míǹ ní tiŋman ti lafun sá u-biyaamu. Kun pu duulinya kaa nyí-tee di sá waa béè Unimbɔti.

²M-nabineeŋkaamu, kí yòon̄ díǹ kí nīn cée, ti kpántì Unimbɔti biyaamu. Ti nín làá dāá nīn bí miŋyee kaa láá nyáń mpaampiin pu. Ama ti nyí yii ŋyunti ŋun ti-Dindaan yaa láa páaǹnée, ti làá dāá nīn bí kii u nín bí puee ní, kun puee ti làá dāá ká-u kí béé un ní u baasii sée.

³Sii un di yaa cáá dimákal gbanti Yeesunee bɔ́ntí a-pɔbil circir, kii a-Dindaan u-ba nín bí pu circiree ní.

⁴Un yaa ŋá ikpitee yīntì marab dee, di sá yii marab yìntitam di sá ikpiti.

⁵Ni nyí yii Kriisitoo dɔ́miń kí lēē binib kpitii ní, ní úǹ u-ba kaa cáá ikpiti.

⁶Sii un nì Kriisitoo yaa ŋá ubaantee kaa ti ŋáań ikpiti, ama sii un di yaa ŋáań ikpitee kaa ká-uaaa, kaa nyí-u mun.

⁷M-biyaamu, ní taa yàntī ubɔ ń ŋmàtiǹ-ni. Un yaa ŋáań min bí deedeeyee sá deedeedaan, kii ti-Dindaan u-ba nín bí deedee puee.

⁸Ama un yaa ŋáań ikpitee sá Sitaan yɔu, kun puee Sitaan pée sá ikpitidaan ní doooo ŋkilkaamin. An pu ní Unimbɔti Jipɔɔn dɔ́miń ki kpītì Sitaan tuuŋŋi.

⁹Sii un Unimbɔti yaa fātìi màl̄ mpɔmee kaa ti ŋáań ikpiti, kun puee a náań nì a-Baa un màl̄-see. Aa ti ŋūǹ kí nīn ŋáań ikpiti, kun puee Unimbɔti di fātìi màl̄-si mpɔm.

¹⁰Kun gàntī Unimbɔti biyaamu nì Sitaan yɔmuee di sá, sii un yaa kaa ŋáań tin bí deedeeyee nì sii un yaa kaa néeń a-nabikee kaa sá Unimbɔti yɔu.

¹¹Dinyɔɔbundi din ni nìn gbìl̄ doooo ŋkilkaaminee tùkū-ti yii tí nīn néeń tɔb[9].

¹²Tí taa nín̄ bí kii Kayeen nín nìn bí puee. Úǹ nìn sá Sitaan niliu ní, ní ki kūū u-naal. Ba pu ní u nìn kūū u-naal míǹ? Kun pu u nìn kūū-uee di sá Kayeen tuuŋŋi sá akpiti, ní u-naal tuuŋŋi sá deedee yaŋ[10].

¹³Nnabiyaamu, duulinya yaa ná-nee, an taa bàkatīǹ-ni[11].

¹⁴Ti nyí yii ti nyáń ŋkúmin ki póotì dimaŋfalin[12], kun puee ti néeń ti-nabiyaamu. Un yaa kaa néeń u-nabikee dáá gbíntìi bí ŋkúmin.

¹⁵Un yaa kaa néeń u-nabikee sá unikpɔl ní, ní ni nyí yii unikpɔl báà ubɔ kaa cáá dimaŋfal din kaa cáá dikúntilee u-ni.

¹⁶Kun di yì-tì ti béè dineendi nín sá kuŋyee di sá Yeesu nín dū u-maŋfal ki tīī ti-puee. Míǹ mun mbaantiim ní ti mun máaǹ kí dū ti-maŋfal kí tīī ti-nabiyaamu pu.

¹⁷Ubɔ yaa cáá ŋŋmam duulinya nee poon, ní ki ká u-nabiki bí falaani, ní u ŋmí, kaa tīī-u tibee[13], mimmee ba di dàkà yii Unimbɔti neendi bí udaan ni?

¹⁸M-biyaamu, tí taa nín̄ lì nì ti-nyɔmmun fám yii ti néeń tɔb, ama tí yàntī ti-tuuŋŋi ń dàkà ibaamɔn yii ti lafun cáá dineendi.

¹⁹Míǹ ní ti dùú béé yii ti sá ibaamɔn nib, ní ki kāntí dipɔɔsɔŋkil Unimbɔti nimbiin.

²⁰Báà ti-pɔbiliŋ yaa máfí yii ti sá binikpitibee, Unimbɔti jítiǹ ti-pɔbiliŋ ki nyí tikɔkɔ mun.

²¹M-nabineeŋkaamu, sii un pɔbil yaa kaa tí máfí yii a ŋá tibee, mimmee a cáá dimákal Unimbɔti nimbiin dee.

²²Báà tin sá kamaa ní a yaa mēē-uee u làá tīī-si kudɔŋu, kun puee a kpáafí u-marab ki ŋáań min fáatì-uee.

²³Mara un u tīī-tee di sá tí fōō u-Jipɔɔn Yeesu Kriisitoo kí kíí, kí nīn néeń tɔb, kii Yeesu u-ba nín bí yii tí nīn néeń tɔb puee[14].

²⁴Un di yaa kpáafí u-marab gbantee, udaan ŋá ubaanti nì Unimbɔti, ní Unimbɔti bí udaanni. Kun pu ní ti nyí yii u bí ti-nee di sá u-Fam min u tīī-tee pu.