Read Ntcham 1 Jean 4 Bible Online

1 Jean 4 - Ntcham bible

1 Jean 4

¹M-nabineeŋkaamu, ní taa nín̄ máká bin kɔkɔ lì yii bi cáá Ŋfamee, ama ní cɔ̄ŋkì kí dáań kí kpèè yii an sá Unimbɔti Famaaa[15], an kaa sá. Di sá yii nnyimɔn bɔnaatiliibi gbóotì duulinyan tikpil.

²Kun di làá yàntī ní béé un Unimbɔti Fam kpòotēe di sá un di yaa lì nì ibaamɔn yii Yeesu Kriisitoo kpántì unil ki dɔ́miń duulinyanee, mimmee Unimbɔti Fam di yāntì udaan sòon̄.

³Un yaa yíì ki bí yii Yeesu kaa kpántì unil ki dɔ́miń duulinyanee, an kaa sá Unimbɔti Fam di yāntì udaan sòon̄, an sá Kriisitoo nannanliu fam. Ni nìn pée gbìl̄ yii unannanli gbanti làá dāan̄, ama u pūtì kpáàa bāań ki bí duulinyan.

⁴M-biyaamu, nimbi sá Unimbɔti yab ní, an pu ní ni jáń ki pɔ́ɔkiǹ bin mɔ́ntí yii bi sá Unimbɔti bɔnaatiliibee. Kun puee Unimbɔti Fam min bí ni-nee pɔ̄ɔ̄ ki jítiǹ Sitaan un bí duulinyanee.

⁵Binyimɔndambi gbantee, bíǹ sá duulinya yab ní. Bi sòoǹ tin duulinya nyée ní, míǹ pu ní an mɔ̄ǹ duulinya yab pílifíǹ-bi.

⁶Ama timbi sá Unimbɔti yab ní. Un yaa nyí Unimbɔtee di pílifíǹ-ti. Un kaa là kí pīlifiǹ-tee kaa sá Unimbɔti yɔu. An di yì-tì ní ti ŋūǹ kí gàntī Unimbɔti Fam min sá ibaamɔnee nì Sitaan yam min mɔ́ntée.

⁷M-nabineeŋkaamu, tí nīn néeń tɔb, kun puee dineendi nyēeń Unimbɔti cee ní. Mimmee, sii un yaa cáá dineendee di sá un Unimbɔti fātìi màl̄ mpɔmee, ki nyí Unimbɔti mun.

⁸Sii un yaa kaa cáá dineendee kaa nyí Unimbɔti, kun puee Unimbɔti di sá dineendi.

⁹Kun yāntì ti ká dineendi din u cáá ti-puee di sá u dū u-Jipɔmbaabil ki túnní duulinyan, tí ŋmā kí ká dimaŋfal u-pu[16].

¹⁰Kaa sá timbi di péé ki néeń Unimbɔti, an sá Unimbɔti di péé ki néeń timbi, ní ki dū u-Jipɔɔn ki túnní ú kpú tí ká ti-kpitii pɔ̄tam, míǹ di dàkà dineendi.

¹¹M-nabineeŋkaamu, Unimbɔti yaa néeń-ti míǹ bulifee, ti mun máaǹ kí nīn néeń tɔb.

¹²Ubɔ kaa pée ká Unimbɔti dalba[17], ama ti yaa néeń tɔbee, Unimbɔti bí ti-ni, ní u-neendee bí ti-ni tiŋman.

¹³Kun di yì-tì ti béè yii ti ŋá ubaanti nì Unimbɔti, ní Unimbɔti bí ti-nee, di sá u-Fam min u tīī-tee pu,

¹⁴ní ti ká ki béè, ki kíǹ ki tùkù binib yii ti-Baa Unimbɔti dū u-Jipɔɔn ki túnní ú dāan̄ kí nīn sá duulinya Fiiliu[18].

¹⁵Sii un di yaa lì nì ibaamɔn yii Yeesu sá Unimbɔti Jipɔɔnee, Unimbɔti bí a-ni ní si nì u ŋá ubaanti.

¹⁶Timbi béè dineendi din Unimbɔti cáá ti-puee ní ki fōō-dì ki kíí. Di sá yii Unimbɔti di sá dineendi, un yaa cáá dineendee, udaan nì Unimbɔti ŋá ubaanti, ní Unimbɔti bí udaanni.

¹⁷Kun di dàkà yii a néeń-u tiŋmanee di sá, daliŋkin Yeesu làá dāá sòoǹ binib bɔtee, sii dāa cáá dimákal u-nimbiin ní, kun puee a-bimbim min a bí duulinya nee nee nì u-yam náań.

¹⁸Sii un cáá dineendee kaa fàŋkí, kun puee dineembaamɔndi jì tifaandi ní. Ditafadaaldi di cāabìń tifaandi, míǹ puee, sii un cáá tifaandi a-nee kaa cáá dineembaamɔndi dee.

¹⁹Kun pu timbi cáá dineendee di sá úǹ di péé ki néeń timbi.

²⁰Ubɔ yaa bí yii: «M néeń Unimbɔti», ní ki yaa ná u-nabikee, udaan sá unyimɔndaan. A yaa kaa néeń a-nabiki kin a wāĺee, a làá ŋá mana ní kí nīn néeń Unimbɔti un saa wāĺee?

²¹Mara un Yeesu tīī-tee sèé yii, sii un yaa néeń Unimbɔtee máaǹ kí nīn néeń a-nabiki mun[19].