Read Ntcham 1 Jean 5 Bible Online

1 Jean 5 - Ntcham bible

1 Jean 5

¹Un sá kamaa yaa fōō ki kíí yii Yeesu sá Kriisitooyee, Unimbɔti di fātìi màl̄ udaan mpɔm. Un di yaa tí néeń Ubaatee néeń u-biyaamu mun ní.

²Min ní ti béetí yii ti néeń Unimbɔti biyaamuee di sá ti yaa néeń Unimbɔti ki kpáafí u-marabee.

³Tí nīn néeń Unimbɔtee taapu di sá yii tí nīn kpáafí u-marab[20]. U-marab gbanti mun kaa pɔ̄ɔ̄,

⁴kun puee un sá kamaa ní Unimbɔti fātìi màl̄ mpɔmee ŋūǹ kí já kí pɔ̄ɔkiǹ duulinya. Kun pu ní a ŋūǹ kí já kí pɔ̄ɔkiǹ duulinyee di sá fookii un a cáá Yeesu puee.

⁵Ŋma di ŋūǹ kí já kí pɔ̄ɔkiǹ duulinya an yaa kaa sá sii un yaa fōō ki kíí yii Yeesu sá Unimbɔti Jipɔɔnee?

⁶An sá úǹ Yeesu Kriisitoo di dɔ́miń duulinyan nì nnyim nì fatiku. An kaa sá nì nnyim ŋmaniŋma, ama an sá nì nnyim nì fatiku ní. Ní Unimbɔti Fam mun lèekī seera yii an sá míǹ, kun puee mì sá mbaamɔn ní.

⁷Biseeraleeliibi sá bita ní[21]:

⁸Ŋfam nì nnyim nì fatiku, ní bi-taatilee kpáfì ki lèekī seerabaanti.

⁹Ti yaa fòol̄ binib seerau ki kíikée, an máaǹ tí fōō Unimbɔti seerau kí kíí, kun puee Unimbɔti seerau pɔ̄ɔ̄ ki jítiǹ unil yɔu.

¹⁰Un yaa fōō Unimbɔti Jipɔɔn ki kííyee cáá seera gbanti u-pɔbilin. Un yaa kaa fōō seera un Unimbɔti lēē u-Jipɔɔn puee ki kííyee, udaan kaa fōō Unimbɔti ki kíí ki yíì-u unyimɔndaan.

¹¹Unimbɔti nín lī puee sèé yii, u tīī-ti dimaŋfal din kaa cáá dikúntilee. Dimaŋfal gbanti bí u-Jipɔɔn cee ní.

¹²Un yaa fōō u-Jipɔɔnee cáá dimaŋfal, un yaa kaa fōō u-Jipɔɔnee kaa cáá dimaŋfal[22].

¹³Nimbi bin fōō Unimbɔti Jipɔɔn ki kííyee, m ŋmàn̄-ni tin bí nee ní béé yii ni cáá dimaŋfal din kaa cáá dikúntilee.

¹⁴Ti cáá dipɔbil kí cù u-cee, di sá yii ti yaa mēē-u tiba ní an yaa sá min ní u lèe, u làá pīlifiǹ-ti.

¹⁵Míǹ puee, ti yaa nyí yii u pílifíǹ-tee, tin kɔkɔwoooo ti yaa mēē-uee, tí béé yii ti fōō kudɔŋu.

¹⁶Ubɔ yaa ká u-nabiki bíi ŋáań ikpiti in kaa cáǹ-u ŋkúminee, udaan ń mèè, Unimbɔti làá tīī u-nabiki gbanti dimaŋfal. Bin pu m sòoǹee di sá bin ŋáań ikpiti in kaa cáǹ-bi ŋkúminee, kun puee ikpiti iba cáǹ unil ŋkúmin. Kaa sá un ŋá ikpiti gbantee pu ní m bí yii ní mèè.

¹⁷Tin kɔkɔ kaa bí deedeeyee sá ikpiti ní, ama ní ikpiti iba bí kaa cāabìń ŋkúm.

¹⁸Ti nyí yii un sá kamaa Unimbɔti fātìi màl̄ mpɔmee kaa ŋáań ikpiti, kun puee Unimbɔti Jipɔɔn mɔ́tí u-pu, Sitaan Ukpiti kaa ŋūǹ kí ŋá-u tiba.

¹⁹Ti nyí yii ti sá Unimbɔti yab, ní Ukpiti tɔ́kɔ́ duulinya kɔkɔ pu.

²⁰Ti tí nyí mun yii Unimbɔti Jipɔɔn dɔ́miń ki tīī-ti iciin tí ŋmā kí béé ibaamɔn Nimbɔtiu, ní timbi nì Unimbɔti ibaamɔndaanee nì Yeesu Kriisitoo u-Jipɔɔn mun ŋá ubaanti. Úǹ di sá Unimbɔti ibaamɔn, ki sá dimaŋfal din kaa cáá dikúntilee.

²¹M-biyaamu, ní nīn nyí nì ni-ba kí taa nóó duulinya nimbɔtii.