Read Ntcham Juges 1 Bible Online

Juges 1 - Ntcham bible

Juges 1

¹Joosuwa kúm boonee ní Isirayeel yab bālifì ti-Dindaan yii: «Ti-kansikin bilab di làá péé kí jɔ̄m̀ kí cùú jáǹ Kanaan yab ní?»

²Ní ti-Dindaan kíí yii: «Juuda naakookun yab di làá jɔ̄m̀. Bíǹ ŋaan ní m dū kitiŋ gbanti ki ŋá.»

³Niinee ní Juuda naakookun yab bí bi-nabiyaamu Simeeyɔn naakookun yab yii: «Ní dāá céem̀maan-ti tí jɔ̄m̀ timbi tinjandi pu kí cùú jáǹ Kanaan yab, ní boonee ti mun ń dāá céeǹ-ni ni-tinjandi pu tí cùú já.» Niinee ní Simeeyɔn naakookun yab kútì Juuda naakookun yab pu ki búntì.

⁴Juuda naakookun yab nìn jɔ́m̀ ki jáń nì Kanaan yab nì Peeriisi yab ní ti-Dindaan dū-bi ki ŋá Juuda naakookun yab ŋaan. Bi nìn kūū binib kutukub saalaa Beeseeki tiŋkin.

⁵Beeseeki tiŋkin niin ní bi ká ubɔti Adoonii-Beeseeki ki jáń ki pɔ́ɔkiǹ-u. Bi nìn jáń ki pɔ́ɔkiǹ Kanaan yab nì Peeriisi yab.

⁶Ubɔti Adoonii-Beeseeki nìn sáǹ ki kátì ní bi jìn̄ ki cúú-u ki gūutì u-ŋambijaliŋ nì u-taŋambijaliŋ.

⁷Niin ní ubɔti Adoonii-Beeseeki bí yii: «Njaminee man yaa nìn kā ki jīǹ tijinee, bibɔtiibi imuŋku ita nì saalaa bin ŋambijaliŋ nì bi-taŋambijaliŋ bi gūutèe nìn dɔ̄ m-teebiliu taapu ní ki tòó igbasigbasi in lítée ki ŋmóò. Ikpiti in m nìn ŋá binibee, íǹ ní Unimbɔti cáa bíi tēentí-mi nee!» Bi nìn cáá-u ki cūnnì Jeerusaleem tiŋkin ní u tin kpíì niin.

⁸Juuda naakookun yab nìn jáń ki pɔ́ɔkiǹ Jeerusaleem yab ki fōō bi-tiŋki, ki dū ntàataajimu ki kūū binib kɔkɔ ní ki sēē Jeerusaleem tiŋki ŋŋmi.

⁹Míǹ boonee ní Juuda naakookun yab nín sìntī ki cūtìi jáń nì Kanaan yab bin nìn kóò ajoon pu timmuee, nì bin nìn kóò Neegeeb[1] timmuee nì bin kóò Seefeelaa[2] paal timmuee.

¹⁰Míǹ boonee ní Juuda naakookun yab nìkī ki cūtìi jáń nì Kanaan yab bin nìn kóò Eebrɔn tiŋkinee. Dooooyee bi nìn yíì Eebrɔn tiŋki yii Kiiriyati-Ariba ní. Niin ní Isirayeel yab jáń ki pɔ́ɔkiǹ Seesayi nì Ayiiman nì Talimayi naantiibi.

¹¹Juuda naakookun yab yíkì niinee ní ki cūtìi jáń nì Deebiir tiŋki yab. Deebiir tiŋki gbanti ní bi nìn yíì dooooyee yii Kiiriyati-Seefeer.

¹²Ní Kaleeb bí yii: «Un di yaa ŋúń ki jáń ki pɔ́ɔkiǹ Kiiriyati-Seefeer yab ki fōō kitiŋ gbantee, m làá dū m-bisal Akisa kí tīī udaan ú cáá.»

¹³Kaleeb naal Keenaasi jipɔɔn Ootiniyeel di ŋúń ki jáń ki fōō kitiŋ gbanti, ní Kaleeb dū u-bisal Akisa ki tīī-u u cáá.

¹⁴Akisa bàn̄ u-cal Ootiniyeel ceeyee ní ki sāal̀-u ú bàlifì u-baa Kaleeb ú tīī-u tikpaatan. Akisa u-ba kpákatì kimaŋ puee ní Kaleeb bālifì-u yii: «A là ba ní?»

¹⁵Ní u kíí u-baa yii: «M là kí mèè-si tiba ní. Di sá yii tikpaatan tin a tīī-mee sá kuteeu ní, an puee á tīī-mi inyimbul mun!» Ní Kaleeb dū inyimbul in bí yilpu puee nì in bí taapu puee ki tīī-u.

¹⁶Mooyiisi coo un nìn sá Keeni maaliŋunee naantiibi yíkì Ibafi tiŋki ki nóó Juuda naakookun yab ní bi-kɔ nín jɔ́ḿ Juuda teeku dijandi din bí Araadi tiŋki ŋgiil púee. Bi bàn̄ ní ki kāl̀ dinibul din nìn kóò niinee yab kansikin.

¹⁷Juuda nì u-maan Simeeyɔn naakɔtin yab nìkī ki cūtìi jáń ki pɔ́ɔkiǹ Kanaan yab bin nìn kóò Seefaati tiŋkinee. Bi nìn kúntì kitiŋ gbanti kɔkɔ ní ki pú-kì diyindi yii Ɔrima, taapu di sá yii <adigbun>.

¹⁸Juuda naakookun yab nìkī ki fōō Gaasaa nì Asikeelɔn nì Eekrɔn[3] timmu nì ntimu mun māntìi tú-muee.

¹⁹Ti-Dindaan nìn bí Juuda naakookun yab cee ki tútúǹ-bi ní bi ŋúń ki jáń ki fōō ntimu mun bí ajoon puee kɔkɔ. Ama baa nìn ŋúń ki jìn̄ binib bin nìn kóò laakin tèen̄ee timmuee, kun puee binib gbanti bíǹ nìn cáá janjatɔrɔkub bin bi nìn dū tikúti ki mɔ́ɔ́yee ní.

²⁰Bi nìn dū Eebrɔn tiŋki ki tīī Kaleeb ki nóó nì Mooyiisi nín nìn lī puee, ní Kaleeb jáń ki fōō kitiŋee Anaaki jipɔmbi taatil bin nìn kóò kitiŋ gbantee ŋaan.

²¹Beenjameen naakookun yab kaa nìn ŋúń ki jáń ki fōō Jeerusaleem tiŋki Jeebusi yab ŋaan. An pu ní Jeebusi yab pée gbíntìi kóò Jeerusaleem tiŋkin, bi nì Beenjameen naakookun yab, ki dāa sāā díǹ.

²²Jooseefi jipɔmbi Eefiraayiim nì Manasee naakɔtin yab mun nìn yíkì ki jɔ́m̀ ki cūtìi jáń nì Beeteel tiŋki yab. Ti-Dindaan nìn bí bi-cee ki tútúǹ-bi[4].

²³Bi nìn lēē bi-nib biba ki tú bi cūtìi cɔ́ŋkì ki kpēē Beeteel tiŋki nín bí puee. Bi nìn dá láá yíì Beeteel tiŋki yii Luusi ní.

²⁴Bicɔŋkiliibee nìn tú uninja ubɔ nyánní kitiŋin ní bi bí-u yii: «Dàkà-ti laakin bi dìŋfī kí kɔ́ kitiŋinee, ti làá dāá ŋá-si tiŋan kí téeǹ!»

²⁵Uninjee nìn dàkā-bi bi nín làá dī pu kí kɔ́ kitiŋinee, ní bi kɔ́ ki dū ntàataajimu ki kūū binib bin nìn kóò kitiŋ gbantee kɔkɔ. Ama bi nìn yāntì uninjee nì u-nabiyaamu búntì kaa ŋá-bi báà tiba.

²⁶Ní kijapaayee nín cá Eeti yab tiŋkin ki bàn̄ ki náań kitiŋ niin ní ki pú-kì diyindi yii Luusi. Diyindi gbanti ní bi pée gbíntìi yíì an tiŋkee ki dāa sāā díǹ.

²⁷Manasee naakookun yab kaa nìn ŋúń ki jáń ki fōō Beeti-Seeyan nì Taanaki nì Dɔɔr nì Yibileeyam nì Meegiidoo timmu nì mu-timbilimmu nib ŋaan. An pu ní Kanaan yab nìn pée gbíntìi kóò ntimu gbanti.

²⁸Ama boonee, Isirayeel yab nín dāa fōō mpɔnee ní bi dū Kanaan yab ki ŋá bi-taapu, ki yāntì bi kíǹ ki tūǹ atuun ŋin pɔ̄ɔ̄yee ki tìì-bi. Nì míǹ kɔkɔee, Isirayeel yab kaa nìn ŋúń ki jáń ki fōō ntimu gbanti Kanaan yab ŋaan.

²⁹Eefiraayiim naakookun yab kaa nìn ŋúń ki jáń ki fōō Geeseer tiŋki Kanaan yab ŋaan. An pu ní Kanaan yab nìn pée gbíntìi kóò Geeseer tiŋki, Eefiraayiim yab kansikin.

³⁰Sabulɔn naakookun yab kaa nìn ŋúń ki jáń ki fōō Kiitirɔn tiŋki nì Naalɔɔl tiŋki Kanaan yab ŋaan. An pu ní Kanaan yab gbanti nìn pée gbíntìi kóò Sabulɔn yab kansikin. Ama ní Sabulɔn yab dū-bi ki ŋá bi-taapu, ki yāntì bi tūǹ atuun ŋin pɔ̄ɔ̄yee ki tìì-bi.

³¹Aseer naakookun yab kaa nìn ŋúń ki jáń ki fōō Akoo nì Siidɔn nì Alaafi nì Eelba nì Afiiki nì Reewoob timmu Kanaan yab ŋaan.

³²Aseer naakookun yab nìn kóò Kanaan yab bin nìn bí ntimu gbantinee kansikin ní, kun puee baa nìn fōō ntimu gbanti Kanaan yab ŋaan.

³³Neefitalii naakookun yab kaa nìn ŋúń ki jáń ki fōō Beeti-Seemeesi nì Beeti-Anaati timmu Kanaan yab ŋaan. Bi nìn kóò Kanaan yab bin nìn bí ntimu gbantinee kansikin ní. Ama ní ki nìn dū Beeti-Seemeesi yab nì Beeti-Anaati yab ki ŋá bi-taapu, ki yāntì bi tūǹ atuun ŋin pɔ̄ɔ̄yee ki tìì-bi.

³⁴Amɔɔr yab nìn jìn̄ Daani naakookun yab ki tɔ́ ajoon pu ní, kaa pée pú-bi mpaan bi sīntìń mpɔfin.

³⁵Amɔɔr yab gbanti nìn gbíntì ki kóò Aari-Eereesi nì Ayalɔn nì Saalbiim timmu. Ama Eefiraayiim nì Manasee naakɔtin yab dāa fōō mpɔnee ní ki dū-bi ki ŋá bi-taapu, ki yāntì bi kíǹ ki tūǹ atuun ŋin pɔ̄ɔ̄yee ki tìì-bi.

³⁶Amɔɔr yab tiŋki kpaanyɔkɔ nìn kífí Akrabiim gbantandi ní, kí yòon̄ laakin bi yíì yii Seerayee kí nīn cáa jɔ́ḿ yilpu pú.