Read Ntcham Juges 10 Bible Online

Juges 10 - Ntcham bible

Juges 10

¹Abimeeleeki kúm boonee, Puuwa jipɔɔn Toola, Doodoo naantiiu un nìn sá Isakaar naakookunee di nìn līntì Isirayeel yab nyɔkɔpu ki nìn fīī-bi bi-nannanliibi ŋaan. U nìn kóò Samiir tiŋki kin bí Eefiraayiim jooŋŋi puee ní.

²U nìn kpōotì Isirayeel yab abin mmuŋku nì ata ní ki dāa nín kpíì ní bi síb́-u Samiir tiŋkin.

³Toola kúm boonee, Yayiir un nìn sá Galaadi tiŋkinee di nìn fōō-u. U nìn kpōotì Isirayeel yab abin mmuŋku nì ali ní.

⁴Yayiir nìn cáá jipɔmbi mmuŋku nì saalaa, bi-kɔkɔ nìn kàal̀ mmanjamu mmuŋku nì saalaa ní ki nìn cáá ntimbilimu mmuŋku nì saalaa. Díǹ pu nee bi-timmu gbanti ní bi dáá gbíntìi yíì yii Yayiir timbilimmu Galaadi tiŋkinee.

⁵Yayiir nìn kpíì ní bi síb́-u Kamɔn tiŋkin.

⁶Isirayeel yab nìn fātìi kíĺ ki bíi ŋáań tin kaa kítì ti-Dindaan nimbiinee. Di sá yii bi nìn fātìi kíĺ ki bíi tòotī Baal nì Asitaartee, ní ki tòotī Aram yab nì Siidɔn yab nì Moowaab yab nì Amɔn yab nì Fiiliistii yab waaŋi. Bi nìn dū ti-Dindaan ki fá, kaa nìn gíti jáaḿ-u.

⁷Ti-Dindaan nìn gíí diŋuul Isirayeel yab pu ní ki nìn dū-bi ki ŋá Fiiliistii yab nì Amɔn yab ŋaan.

⁸Kí yòon̄ dibindi gbanti kí cáá sāā abin saalku nì atee, an nibee nìn nāaǹ Isirayeel yab bin nìn kóò Galaadi tiŋkee, an dàkà yii Amɔɔr yab tiŋki kin nìn bí Jɔɔdan buŋŋu lapu pu gbandi jaaŋŋu púee, ki nìn sāaǹ-bi tiŋan.

⁹Amɔn yab nìn dūtìń Jɔɔdan buŋŋu ki dɔ́miń ki jáń nì Juuda naakookun yab nì Beenjameen naakookun yab nì Eefiraayiim naakookun yab. Isirayeel yab nimbaaku kun poon bi nìn kíǹ ki bée nìn gíti nyāŋkì tikpil.

¹⁰Niinee ní Isirayeel yab kúuǹ ki yíiń ti-Dindaan ki lī yii: «Tilafuŋman ní ti yīntiǹ-si, kun puee ti dū sii un sá ti-Nimbɔtiuee ki fá ní ki bí ki tòotī Baal.»

¹¹Ti-Dindaan nìn bí Isirayeel yab yii: «Ŋyunti ŋun ní Eejipiti nì Amɔɔr nì Amɔn nì Fiiliistii yab,

¹²nì Siidɔn nì Amaleeki nì Maawɔn yab nìn wɔ́b́-ni ni kúuǹ ki yíiń-mee, maa nìn fīī-ni bi-ŋaanaaa?

¹³Ama ní nimbi dū man ki fá ki bíi jáaḿ inimbɔticaan. An puee maa làá ti fīī-ni.

¹⁴Ní cùmaan kí nīn kūuntí ki yíì awaa ŋin ni lēē yii ni là kí nīn tòotēe, ŋí fīī-ni ni-nimbaakun!»

¹⁵Ní Isirayeel yab fātìi bí ti-Dindaan yii: «Ti-Dindaan, ti yīntì ní. Ŋá-ti min di yaa pée ŋān̄ a-ceeyee, ama ti gbàam̄-si ní, fīī-ti díǹ wiiŋŋu nee!»

¹⁶Isirayeel yab nìn lī mimmee ní ki dū awaa ŋin nìn bí bi-ceeyee ki fá ní ki fātìi bíi jáaḿ ti-Dindaan. Niinee falaau un bi nìn bí ki jīǹee nìn kɔ́ ti-Dindaan tikpil.

¹⁷Amɔn yab nìn yíiń tɔb ki kpáfì ní ki ŋātì bi-janjanaapaal Galaadi tiŋkin, ní Isirayeel yab kóoǹ ki kpáfì ki ŋātì bi-janjanaapaal Miisipa tiŋkin[17].

¹⁸Niin ní Isirayeel yab nì Galaadi tindaŋkpilib nìn bíi bàlifī tɔb yii: «Ŋma di làá nín kíĺ kujaau nì Amɔn yab dee? Udaan di bàà làá kpántí Galaadi tiŋki nib kɔkɔ kpiliu!»