Read Ntcham Juges 11 Bible Online

Juges 11 - Ntcham bible

Juges 11

¹Jeefita un nìn sá Galaadi tiŋkinee nìn sá ubaatandaan un cáá dipɔbilee. U-na nìn sá kinimpulaakpaai ní. U-baa ní bi nìn yíì yii Galaadi.

²Galaadi nimpuu un u nìn cááyee nìn màl̄-u mbininjabiyaamu. Unimpu gbanti jipɔmbi dāa cíkitèe, ní ki jìn̄ Jeefita bi-baa cindin ki lī-u yii: «Saa làá ká báà tiba ti-baa fakal poon, kun puee a sá unimpu ubɔ fám biki ní.»

³Jeefita nìn sáǹ ki wāatì u-nabiyaamu ki cūtìi kóòń Toob tiŋkin. U nìn bí niin mimmee ní ki nyàab̄ naayeekub biba ki kútì u-ba pu ní u nì bi nyēē ki cá ki jáà kujaau.

⁴Too, an kaa nìn súŋkì ní Amɔn yab bíi jáà nì Isirayeel yab.

⁵Ŋyunti ŋun ní Amɔn yab nìn bí ki jáà nì Isirayeel yabee ní Galaadi tindaŋkpilib nìn nín cá Toob tiŋkin kí cùú cáań Jeefita.

⁶Bi nìn bàn̄ee ní ki bí Jeefita yii: «Dāan̄ kí nīn sá ti-janjakpiliu tí ŋmā kí já kí pɔ̄ɔkiǹ Amɔn yab.»

⁷Ní Jeefita bí Galaadi tindaŋkpilib yii: «Kéè ni nìn ná-mi ní ki jìn̄-mi m-baa dicaŋkunaa! Ba gíti ŋá ní ni dòoń m-cee kɔŋkɔnnee, ŋyunti ŋun ní dinimbinaamandi bāań-nee?»

⁸Ní Galaadi tindaŋkpilib kíí Jeefita yii: «Too, kɔŋkɔnnee ti yaa dɔ́miń a-ceeyee, ti là yii á kíí kí nóó-ti kí cùú jáǹ Amɔn yab, kí nīn sá timbi Galaadi yab kɔkɔ kpiliu ní.»

⁹Ní Jeefita bí Galaadi tindaŋkpilib yii: «Ni lafun kíí tiŋman yii m yaa nóó-ni ki gítì ki cūtìi jáń nì Amɔn yab ní ti-Dindaan yaa dū-bi ki ŋá m-ŋaan, man di làá nīn sá ni-kɔkɔ kpiliuaaa?»

¹⁰Ní Galaadi tindaŋkpilib bí Jeefita yii: «Ti-Dindaan sá ti-seeradaaŋwu, ti làá ŋá a nín lī puee.»

¹¹Niinee ní Jeefita kíí ki páaǹ Galaadi tindaŋkpilib boon bi nín cá, ní samaa tin kāaǹ-u ú nīn sá bi-kpiliu nì bi-janjakpiliu. Ní Jeefita fātìi sòon̄ anyɔɔbun ŋin u nìn pée sòon̄ee kɔkɔ ti-Dindaan nimbiin Miisipa tiŋkin.

¹²An ŋá mimmee ní Jeefita lēē binib ki tú Amɔn yab bɔtiu cee bi cūtìi bālifì-u dinyɔɔbundi u-yil pu yii: «Man nì si yii ba ní a dɔ́miń m-tiŋki pu ki bíi jáà nì man nì m-yab?»

¹³Ní Amɔn yab bɔtiu kíí Jeefita tuuŋyi yii: «Kun pu m ŋá mimmee di sá yii, ŋyunti ŋun Isirayeel yab nìn nyánní Eejipiti tiŋkin ki jɔ́mińee, bi nìn fōō m-tiŋki kí yòon̄ Arinɔn buŋŋu kí tin cáá sāā Yaabɔki buŋŋu nì Jɔɔdan buŋŋu. An puee, kɔŋkɔnnee á gíiǹ m-tiŋki gbanti kí tīī-mi soooo.»

¹⁴Ní Jeefita fātìi lēē binib ki tú Amɔn yab bɔtiu cee

¹⁵bí tùkù-u tin Jeefita sòon̄ee yii: «Isirayeel yab kaa fōō Moowaab yab tiŋkaaa, kaa tí fōō Amɔn yab mun tiŋki.

¹⁶An nín nìn ŋá puee di sá yii, Isirayeel yab nín nìn nyánní Eejipiti tiŋkin ki jɔ́mińee, bi nìn cōom̀ kuteeun míǹ ní ki dāa dūu nyáń Tikati mɔɔl[18] pu, ní ki nìkī ki tin dūu bàn̄ Kadeesi tiŋki.

¹⁷Isirayeel yab nìn kā niin ní ki lēē binib ki tú Eedoom yab bɔtiu cee ki lī yii: <Ti mèé-si á pɔ̄-ti nsan tí jītí a-tiŋki poon!> Ama ní Eedoom yab bɔtiu kaa nìn pílifiǹ-bi. Bi nìn tú Moowaab yab bɔtiu mun cee ní u mun kaa nìn kíí ki pú-bi nsan. Di sá ní Isirayeel yab nìn gbíntì Kadeesi tiŋkin.

¹⁸Boonee, bi nìn cōom̀ kuteeun, ki gɔ́ntì Moowaab tiŋki ki fātìi nyánní ŋwìiń nyalaŋki pú ní ki dāa dūu nyáń Moowaab tiŋki pu. Bi nìn kāl̀ Arinɔn buŋgbandi lapu pu yal ní, kaa nìn kɔ́ Moowaab yab tiŋkin, di sá yii Arinɔn buŋŋu di nìn sá Moowaab tiŋki kpaanyɔkɔ.

¹⁹Isirayeel yab nìn lēē binib ki tú Amɔɔr yab bɔtiu, an dàkà yii Eesbɔn tiŋki bɔtiu Siiwɔn cee bi cūtìi tùkū-u yii: <Ti mèé-si yii á pɔ̄-ti nsan tí jītí a-tiŋki poon kí cù laakin ti cée!>

²⁰Ama ubɔti Siiwɔn kaa nìn cáá Isirayeel yab pu dimákal, di sá ní waa nìn kíí bi jítì u-tiŋkin. U nìn kóoǹ u-janjaliibi ki kpáfì Yakaasi tiŋkin ki kíĺ kujaau nì Isirayeel yab.

²¹Ní ti-Dindaan Isirayeel Nimbɔtiu dū ubɔti Siiwɔn nì u-janjaliibi kɔkɔ ki ŋá Isirayeel yab ŋaan ní bi ŋúń ki jáń ki pɔ́ɔkiǹ-bi. Isirayeel yab nìn fōō Amɔɔr yab tiŋki kin bi nìn kóòyee kɔkɔ.

²²Bi nìn fōō Amɔɔr yab tiŋki kɔkɔ, kí yòon̄ Arinɔn buŋŋu kí cáá sāā Yaabɔki buŋŋu ní kí yòon̄ kuteeu kí cáá sāā Jɔɔdan buŋŋu.

²³An puee ti-Dindaan, Isirayeel Nimbɔtiu di nìn yāntì timbi u-nibul ŋúń ki jáń ki fōō Amɔɔr yab tiŋki bi-cee, ní sii là kí cúú kitiŋ gbanti kí fōō ti-ceeee?

²⁴Man nyí a ŋúb́ tin kɔkɔ ní a-waal Keemoosi tīī-see naa! Kin ba pu ní timbi ń taa nín̄ yì tin ní ti-Dindaan ti-Nimbɔtiu dūu ŋá ti-ŋaanee?

²⁵A dàkafī yii a jítiǹ Moowaab bɔtiu Balaaki, Siipɔɔr jipɔɔn níii? A ká u táká Isirayeel yab ki dāa nín lì yii u làá já nì baaa?

²⁶Isirayeel yab nìn kāl̀ Eesbɔn tiŋki nì ki-timbilimmu, ki kāl̀ Arooweer tiŋki nì ki-timbilimmu, ki kāl̀ ntimu mun kɔkɔ pée bí ki nákáǹ Arinɔn buŋgbaŋŋee abin alaataa ata ní. Ba pu ní naa nìn fātìi fōō an timmuee bi-cee ŋyunti gbanti?

²⁷Mbaamɔn pu, man kaa yīntiǹ-si tiba. Ama a nín bí ki jáà nì mi kujaau min nee, á nīn nyí yii sii di yīntiǹ-mi. Ti-Dindaan baba di sá Ubɔsoonli, úǹ di làá sòoǹ Isirayeel yab nì Amɔn yab bɔti díǹ nee.>»

²⁸Ama Amɔn yab bɔtiu kaa nìn pílifì tibɔti tin Jeefita nìn yāntì bi cáań ki tùkū-uee.

²⁹Ti-Dindaan Fam nìn gbí Jeefita. U nìn yíkì ki dī Galaadi nì Manasee timmu pú, ki pɔ́ĺ ki dī Miisipa, Galaadi timbiliiki pú, ní ki dī niin ki kɔ́ Amɔn yab tiŋkin.

³⁰Jeefita nìn pūtì ki pōoǹ ti-Dindaan yii: «A yaa lafun dū Amɔn yab ki ŋá m-ŋaan ki yāntì m jáń ki pɔ́ɔkiǹ-bee,

³¹unil un di yaa láa péé ki nyáń m-cindin ki túŋkì-mi nsanni ŋyunti ŋun ní m yaa láa nyánní Amɔn yab tiŋkin ki fātìi bāań nì alaafiyee, m làá dāá dū udaan kí ŋá saraawɔkaa kí tīī sii ti-Dindaan.»

³²Jeefita nìn lafun kɔ́ Amɔn yab tiŋki pu ki jáń nì bi ní ti-Dindaan dū-bi ki ŋá u-ŋaan.

³³U nìn jáń ki fōō ntimu mmuŋku ní, ki yōoǹ Arooweer tiŋki ki tin cáa sāā Miiniiti tiŋki kpaanyɔkɔ, ní ki fātìi yōoǹ ki tin cáa sāā Abeel-Keeramiim tiŋkin. An nìn baasii sá dijajikpaandi ní ki tīī Isirayeel yab, di sá ní Isirayeel yab nìn nyīī Amɔn yab ki gùl̄ bi-taapu.

³⁴Ŋyunti ŋun Jeefita nìn fātìi bàn̄ Miisipa tiŋkin ki làá kɔ́ u-cindinee, ní u-bisal nyánní ki ŋúb́ kigaŋgaŋ ki bɔ̀ɔ́ ki ŋōoń ki túŋkí-u nsanni. Jeefita bisal gbanti di nìn pée sá u-bibaabil. Waa nìn gíti màl̄ kibininjabikaaa, kaa nìn màl̄ kibinimpubiki ki kútì u-bisal gbanti pu.

³⁵Jeefita nín nìn pée wál̀ u-bisal túŋkiń-uee, ní u dáaĺ ki cátì u-wanti tin u nìn pēēyee ní ki bí yii: «Óò, m-bisal, a kɔ́ǹ-mi kunimbaaun. Sii di yì nnaabu ŋun dòoń-mi nee. Di sá yii m gíti dáá pōoǹ ti-Dindaan ipoon ní kaa ti ŋūǹ kí yíí yii maa làá ŋá tin ní m pōoǹ-uee.»

³⁶Ama ní u-bisal kíí-u yii: «M-baa, a nín gíti dáá pōoǹ ti-Dindaan ipoonee, ŋá tin ní a pōoǹ-u yii a làá ŋée. Di sá yii ti-Dindaan di yāntì a ŋúń ki tɔ̀n̄ a-nannanliibi Amɔn yab ipɔntoon.»

³⁷Ní u nìkī ki lī u-baa yii: «Ama kuwambaantiiu kun m làá mèè-see di sá yii, á pɔ̄-mi nsan ḿ nīn bí dimaŋfalin kí gíti bà iŋmal ili man nì m-bɔɔbi ń nóó kí cù ajoonni kí sɔ̄ m nín làá kpú m-sapɔnti poon kaa béè uninjee pu.»

³⁸Ní Jeefita pú u-bisal nsan ki yāntì u búntì ki cūtìi ŋá iŋmal ili ajoonni u nì u-bɔɔbi, ki súń u nín làá kpú u-sapɔnti poon kaa béè uninjee pu.

³⁹Iŋmal ilee jítèe, ní Jeefita bisal fātìi gítìń u-baa cee ní u-baa dū-u ki ŋá u nín pōoǹ yii u làá ŋá puee. Too, u nín kaa nìn béè uninja ní ki kpíìyee pu ní an dūu kpántì dikoobil Isirayeel tiŋkin.

⁴⁰Dikoobil gbanti di sá yii dibindi kamaayee, Isirayeel sapɔmbi kɔkɔ ń cù kí kpāfì kí sɔ̄ ugalaadija Jeefita bisal pu iwiin inaa dibindi poon.