Read Ntcham Juges 13 Bible Online

Juges 13 - Ntcham bible

Juges 13

¹Isirayeel yab nìn fātìi kíĺ ki bíi ŋáań tin kaa kítì ti-Dindaan ceeyee ní ti-Dindaan dū-bi ki ŋá Fiiliistii yab ŋaan abin imuŋku ili.

²Uninja ubɔ nìn bí ki nìn sá Sooreeya tiŋkin, Daani naakookun maaliŋu ŋubɔ poon, ní bi nìn yíì-u yii Manoowa. U-nimpuu nìn sá uŋmaŋŋmanti ní, waa nìn cáá kibiki.

³Ti-Dindaan tuuŋŋu nìn lēē ŋu-ba ki dàkā unimpu gbanti ki bí-u yii: «M nyí a nín sá uŋmaŋŋmanti kaa cáá kibikee, ama a làá cáá dipool kí màal̀ kibininjabiki.

⁴Kí yòon̄ díǹ kí nīn cée, á taa ti nyɔ̀ ndamam àá ndaam min kamaa pɔ̄ɔ̄yee, kí taa jī tijin tin kamaa kaa bí circiree,

⁵kibininjabiki kin a làá cáá dipool kí màal̀ee pu. Bɔlfi ń taa pée gbēē kibikee yil, di sá kí yòon̄ ŋwiin ŋun ní a làá díkí u-poolee, u làá nīn sá un bi dūu sú Unimbɔtee ní. Úǹ di làá kíĺ kí fīī Isirayeel yab Fiiliistii yab ŋaan.»

⁶Ní unimpuee nín kùǹ ki cūtìi máafì u-cal yii: «Unimbɔti niliu ubɔ dɔ́miń m-cee. U náań nì Unimbɔti tuuŋŋu ní a yaa kpēē-uee, an cáá tifaandi. Maa bālifì laakin ní u sée, ní u mun kaa tùkū-mi u-yindi.

⁷U bí-mi yii: <Á nīn nyí yii a làá cáá dipool kí màal̀ kibininjabiki. Kí yòon̄ díǹ kí nīn cée, á taa ti nyɔ̀ ndamamaaa, kí taa ti nyɔ̀ ndaam min pɔ̄ɔ̄yee. Á taa jī tijin tin kaa bí circiree mun, kun puee kibininjabiki kin a làá màal̀ee, bi làá dū-kì kí sú Unimbɔti ní kí dāá sāā ki-kúm dal.>»

⁸Niinee ní Manoowa mēē ti-Dindaan ki lī yii: «M-Dindaan, m gbāam̀-si, yàntī Unimbɔti niliu un a túnní ti-ceeyee ń fàtīí gítiń kí dàkà-ti min ti máaǹ kí ŋá kí tīī kibikee bi yaa láa màl̄-kèe.»

⁹Unimbɔti nìn fōō Manoowa wimmeem ní ki nìn yāntì u-tuuŋŋuee fātìi gítìń unimpuee cee. U nìn kā bukpaan ní, ama u-cal Manoowa kaa nìn bí u-cee.

¹⁰Niin niin ní unimpuee yíkìi sáǹ ki cūtìi tùkū u-cal yii: «Kpèè, kijapaai kin nìn dɔ́miń m-cee yaadalee fātìi tí lēē u-ba ki dàkā-mi!»

¹¹Ní Manoowa yíkì ki páaǹ u-nimpuu boon ki nín cá kijapaayee cee ki bàn̄ ki bālifì-u yii: «Sii di sá kijapaai kin nìn sòon̄ nì unimpu neeyeeee?» Ní kijapaayee kíí yii: «Iiin, an sá man!»

¹²Ní Manoowa bālifì-u yii: «Kɔŋkɔnnee, a nín lī puee yaa láa ŋá mimmee, akoobil ŋilaŋ ní tí kòò kibikee maŋfal wiiŋyi nì ditundi din kì làá tɔ̄ee pu?»

¹³Ní ti-Dindaan tuuŋŋuee kíí Manoowa yii: «Tin kɔkɔ ní m kōoǹ a-nimpuuee, ú kòò-tì.

¹⁴Ú taa pée dáká tin kamaa ní bi yaa dū fiinyi subil ki ŋée. Ú taa nyɔ̀ ndamam àá ndaam min pɔ̄ɔ̄yee. Ú taa jī tijin tin kamaa kaa bí circiree, ní kí ŋá tin kɔkɔ ní m tùkū-u yii ú ŋée.»

¹⁵Niinee ní Manoowa bí ti-Dindaan tuuŋŋuee yii: «Yàntī tí tàan̄-si fiii. Ti làá kpɔ̀ diŋɔbil kí tɔ́kɔń kí cáań-si.»

¹⁶Ní ti-Dindaan tuuŋŋuee kíí-u yii: «Báà a yaa tāaǹ-maaa, maa làá jī tijin tin a làá ŋá kí tīī-mee. Ama a yaa là kí ŋá saraawɔkaa, a ŋūǹ kí ŋá kí tīī ti-Dindaan.» Di sá yii Manoowa kaa nìn nyí yii u nì ti-Dindaan tuuŋŋu di nìn bíi sòoǹ.

¹⁷Ní Manoowa bí ti-Dindaan tuuŋŋuee yii: «Bi yíì-si yii ba? Tùkù-ti án nín làá ŋá pu ní tibɔti tin a sòon̄ee yaa láa ŋée tí dāá nyɔ̄ŋkì-see.»

¹⁸Ní ti-Dindaan tuuŋŋuee bí-u yii: «Ba pu ní a baasii là kí béé m-yindi ní? Dì sá maamaaci yindi ní.»

¹⁹Manoowa nìn bɔ́ntì diŋɔbil nì saraa wanti ki dūu páaǹ ditaŋkpal pu ki ŋá saraa ki tīī ti-Dindaan un ŋáań maamaaci tuuŋŋee. Manoowa nì u-nimpuu nìn kíǹ ki yú ki kpèé.

²⁰Bi dāa kpēēyee, ti-Dindaan tuuŋŋuee bí aŋmilimbil ŋin nìn nyēē nsaraafan pu ki jɔ́ḿee poon ki nín jɔ́ḿ yilpu. Manoowa nì u-nimpuu nín ká mimmee ní bi tātìi dōoǹ dicincibil.

²¹Ti-Dindaan tuuŋŋuee kaa nìn gíti lēē ŋu-ba ki dàkā Manoowa nì u-nimpuu. Niin ní Manoowa nìn dūu béè yii kijapaayee nìn lafun sá ti-Dindaan tuuŋŋu.

²²Ní Manoowa bí u-nimpuu yii: «Ti nín pée ká Unimbɔti nì ti-nimbiliŋ nee, ti làá pée kpú ní[20].»

²³Ama ní u-nimpuu kíí-u yii: «Ti-Dindaan yaa bàà là kí kpɔ̀-tee, waa bàà fòol̄ ti-saraawɔkaau nì ti-saraau. Waa bàà làá dàkà-ti tin kɔkɔ ti ká nee, kaa bàà làá tùkù-ti tibɔti tin u tùkū-ti kɔŋkɔnnee.»

²⁴Unimpuee nìn màl̄ kibininjabiki ní ki pú-kì diyindi yii Samsɔn. Kibiki gbanti nìn wíiǹ, ní ti-Dindaan nìn bīiǹ ki-boon.

²⁵Maanee-Daani tiŋki kin bí Sooreeya nì Eesitawool timmu kansikinee poon ní ti-Dindaan Fam nìn yāntì Samsɔn péé péé ki nyántì u-pɔŋŋu ki dàkā.