Read Ntcham Juges 14 Bible Online

Juges 14 - Ntcham bible

Juges 14

¹Dalbee Samsɔn sīntì Tiimina tiŋkin ní ki tin dūu ká Fiiliistii yab sapɔmbi kansikin usapɔnnyaan ubɔ.

²U nín nìn fātìi jɔ́m̀ u-tiŋkinee ní ki sòon̄ unimpuee bɔti u-baa nì u-na cee ki bí yii: «M nín cūtì Tiimina tiŋkinee, m ká usapɔɔn ubɔ Fiiliistii yab sapɔmbi kansikin. Kɔŋkɔnnee m là yii ní cáá úǹ ní kí tīī-mi.»

³Ní u-baa nì u-na bí-u yii: «Mimmee usapɔɔn kaa bí a-maaliŋu nì a-nibul kɔkɔ sapɔmbi poon á cááaaa? Ba di ŋá ní a là kí cáá Fiiliistii yab bin kaa gíí akpancan nee sapɔmbi ubɔ ní?» Ní Samsɔn bí u-baa yii: «Usapɔɔn gbanti ní m pée là yii á cáá kí tīī-mi, kun puee úǹ di kɔ́-mi!»

⁴Samsɔn baa nì u-na kaa nìn nyí yii ti-Dindaan di nìn bíi téekí bi-jipɔɔn ú lēē yii u là an nimpuuee. Ti-Dindaan nìn bíi nyàab̀ nsan ŋun ní u làá dī kí táká Fiiliistii yab tibɔtee ní, kun puee ŋyunti gbantee, u-nibul Isirayeel yab nìn bí Fiiliistii yab taapu ní.

⁵Samsɔn nìn nín sìntī Tiimina tiŋkin, u nì u-baa nì u-na. Ŋyunti ŋun bi bàn̄ fiinyi sufii in yú Tiimina tiŋki caŋinee, kpalaayee digbikintipɔmbil diba nyánní kumooun, ki mùuǹ ki túŋkí Samsɔn.

⁶Niin ní ti-Dindaan Fam kɔ́ Samsɔn ní u cúú digbikintipɔmbilee ŋŋancal, ki dáaĺ ki tɔ̄ntì-dì kii bi nín dátí kí tɔ̀ntī kiŋɔbiki puee. Ama waa nìn tùkū u-baa nì u-na tin ní u nìn ŋée.

⁷Míǹ boonee u nìn nín sìntī Tiimina tiŋkin ki cūtìi sòon̄ nì usapɔɔnee. Usapɔɔnee nìn kɔ́-u tikpil.

⁸Iwiŋkaaŋkaa boonee, Samsɔn nìn fātìi yíkì u-dumpu ki nín gítí Tiimina tiŋkin kí cùú cáá unimpuee. U bàn̄ laakin u nìn kūū gbikinti ki bíl̀ee ní ki pāatì kí kpèè digbikintikpilee. U nìn ká dinaŋgbansikitil kā gbikintee wunti poon nì tisiil.

⁹Ní Samsɔn lēē tisiil ki ŋá u-ŋaan ki còom̄ ki ŋmóò ki cá. U cōom̀ ki fātìi cúú u-baa nì u-nee, ní ki lēē tisiil ki tīī-bi ní bi mun ŋmɔ́, ama waa nìn tùkū-bi yii digbikintikpil poon ní u lēeń tisiil.

¹⁰Samsɔn baa nìn sīntì unimpuee dumpu ní Samsɔn cūtìi bɔ́ntì dinimpucaal jiŋaaliu niin, kii binaacimpɔmbi nín nìn pée ŋáań puee.

¹¹Fiiliistii yab nín nìn pée ká-uee, ní bi lēē binaacimpɔmbi mmuŋku nì saalaa bí nīn bí u-cee.

¹²Ní Samsɔn bí-bi yii: «M làá pɔ́ɔǹ-ni mpɔ́ɔn ŋubɔ. Ni yaa ŋúń ki béè-ŋu ní ki lēē ŋu-taapu ki tùkū-mi iwiin iluli in ti làá dūú jī jiŋaal nee poonee, m làá tīī-ni abɔkutifɔkɔ mmuŋku nì saalaa, kí tīī-ni abɔkutikpántikaa mun mmuŋku nì saalaa.

¹³Ama ni yaa kaa ŋúń ki lēē ŋu-taapu ki tùkū-mee, nimbi di làá tīī man abɔkutifɔkɔ mmuŋku nì saalaa nì abɔkutikpántikaa mun mmuŋku nì saalaa.» Ní bi bí-u yii: «Pɔ́ɔǹ a-pɔɔŋŋu gbanti tí pīlifì!»

¹⁴Ní Samsɔn bí-bi yii: «Un ŋmóò poon ní tiŋmɔkaal nyánní. Un pɔ̄ɔ̄yee poon ní mmɔn nyánní. An sá ba?» Iwiin ita dāa dūu jítì, binaacimpɔmbee kaa ŋúń ki lēē mpɔɔnee taapu ki tùkū Samsɔn.

¹⁵Ŋwinluluúti dalee ní bi bí Samsɔn nimpuu yii: «Ŋmàtiǹ a-cal ú tùkù-ti mpɔɔnee taapu, an yaa sá fám ti làá wà-si ŋŋmi kí kpáaǹ a-baa dicaŋku kɔkɔ. Ni yíiń-ti kí fūkul̀-ti níii?»

¹⁶Niinee ní Samsɔn nimpuu bíi sūǹ lɔ̀lɔ ní ki bí-u yii: «A pée ná-mi ní, aa néeń-mi. A pɔ́ɔǹ m-dumpu yab mpɔ́ɔn, ama ní kaa lēē ŋu-taapu ki tùkū-mi.» Ní Samsɔn kíí-u yii: «Maa lēē mpɔ́ɔn gbanti taapu ki tùkū m-baa nì m-na gba, ní ki dāa cáa tùkū siii?»

¹⁷Samsɔn nimpuu nìn súń míǹ ní kinyɔmmɔŋ kin bi dūu jíń jiŋaalee kɔkɔ. Ŋwinluluúti dalee, Samsɔn nimpuu nìn páb́-u an gíti lákáǹee, ní Samsɔn lēē mpɔɔnee taapu ki tùkū-u. Ní unimpu yíkìi nín cá ki cūtìi lēē mpɔɔnee taapu ki tùkū u-yab.

¹⁸Ŋwinluluúti gbanti dal kí wàatī ŋwìiń ń jēetée ní kitiŋee nib bí Samsɔn yii: «Ba gíti mɔ̄ ki jítiǹ tisiil? Ba gíti pɔ̄ɔ̄ ki jítiǹ gbikinti?» Ní Samsɔn kíí-bi yii: «Ni yaa kaa bàà dū m-nasaliu ki kùn̄ tikpaal, naa bàà làá ŋmā kí béé man pɔɔŋŋu nee taapu!»

¹⁹Niinee ní ti-Dindaan Fam gbí Samsɔn ní u yíkì ki nín sìntī Asikeelɔn tiŋkin. U bàn̄ ní ki cúú niin yab binib mmuŋku nì saalaa ki kūū, ki fúkúl̀ bi-wanti kɔkɔ ní ki cáań bi-bɔkutiŋ ki tīī binib bin nìn ŋúń ki lēē u-pɔɔŋŋuee taapu ki tùkū-uee. Míǹ boonee ní u fātìi nín kùǹ u-baa dumpu, ki díkí diŋuul an kaa cáá bí lì.

²⁰Bi nìn dū unimpuee úǹ ki tīī Samsɔn bɔɔ u nì un nìn pée nóó u-nimpucaal jiŋaaliu yuntiŋuee ticati.