Read Ntcham Juges 15 Bible Online

Juges 15 - Ntcham bible

Juges 15

¹Iwiŋkaaŋkaa boonee, an nìn ŋmāntì ŋyunti ŋun bi cēē bilee jintee, ní Samsɔn nìn nín gítí kí cùú màntì u-nimpuu pu. U nìn ŋúb́ diŋɔbil diba ní ki bí yii: «M là kí kɔ́ m-nimpuu didooŋkaaku poon.» Ama u-nimpuu baa nìn yíì kaa pú-u nsan u kɔ́.

²U nìn bí Samsɔn yii: «Man dākafì yii aa ti pée là-u ní, an puee man dū-u ki tīī a-bɔɔ un nìn pée nóó-si a-nimpucaal jiŋaaliunee ticati. Ama u-naal bí, ki gíti ŋān̄ ki jítiǹ-u gba. A ŋūǹ kí yòon̄ úǹ kí téeǹ u-maan yil!»

³Ní Samsɔn bí-bi yii: «Min bí nee m yaa ŋá Fiiliistii yab inikpiti, ubɔ kaa làá kɔ̄kɔl̀-mi.»

⁴Niinee ní Samsɔn cūtìi cúú ŋŋɔkɔmu alaataa ata ní ki bɔ́ntì iŋminaapool mun míǹ. U ŋée ní ki kpáfì ŋŋɔkɔmu muli muli, mu-juuŋi túĺ tɔb. Ní u cúú ajuuyee ki gbìn̄ gbìn̄ tɔb, ní ki dū ŋŋminaapool ŋubɔ ki nēeǹ ajuu ali gbindi kamaa kansikin.

⁵U ŋá mimmee ní ki dū ŋŋmi ki sēē iŋminaapool, ki gíiǹ ŋŋɔkɔmu ki líì ní mu nín kóò Fiiliistii yab satin. Ŋŋmi nìn wùn̄ bilee un bi nìn cáń ki bíl̀ee nì un dáá gbíntìi yú baa láá cáńee, ki wùn̄ ki kpáaǹ fiinyi sufii nì ɔliifi sufii.

⁶Fiiliistii yab bālifì yii: «Ŋma ŋá mimmee?» Ní binib kíí-bi yii: «An sá utiiminaja coo Samsɔn di ŋá míǹ, kun puee u-coo gbanti fōō u-nimpuu ní ki dūu tīī u-bɔɔ un nìn nóó-u u-nimpucaal jiŋaaliunee ticati.» Ní Fiiliistii yab nín jɔ́ḿ Tiimina tiŋkin ki cūtìi wùn̄ unimpu gbanti ŋŋmi, ki kpáaǹ u-baa.

⁷Samsɔn tùkū-bi yii: «Too, ní béé yii ni nín ŋá min nee puee, m yaa kaa tɔ̀n̄-ni ipɔntoon maa làá dūú cà.»

⁸U nìn cūtìi jáń nì Fiiliistii yab ki pɔ́ɔkiǹ-bi. Míǹ boon ní u nín sìntī Eetaam tiŋkin ki cūtìi kɔ́ ntaŋkpalɔkɔ ŋubɔn.

⁹Fiiliistii yab nìn jɔ́m̀ Juuda tiŋkin ki ŋātì dijanjanaapaal, ki kāaǹ bi-janjaliibi ki tin sāā mpaan ŋun bi yíì yii Leeyiiyee.

¹⁰Ní Juuda naakookun yab bālifì-bi yii: «Ba pu ní ni jɔ́mìń kí jáǹ-ti ní?» Ní Fiiliistii yab kíí Juuda naakookun yab yii: «Ti jɔ́mìń kí cúú Samsɔn kí ŋá-u kii u nín ŋá-ti puee kí téeǹ ní.»

¹¹Niinee ní Juuda naakookun yab bininjab kutukub bita yíkì ki nín sìntī Eetaam tiŋkin, ntaŋkpalɔkɔ ŋun poon Samsɔn nìn bée ki bí-u yii: «Saa nyí ti nín bí Fiiliistii yab taapueeee? Ba bɔti ní a ŋá-ti mimmee?» Ní Samsɔn kíí-bi yii: «Bi nín ŋá-mi puee, míǹ ní ma mun ŋá-bi ki téeǹ!»

¹²Ní bi bí-u yii: «Too, timbi sīntìń kí bóob́-si iŋmii kí cáá-si kí ŋúbiǹ Fiiliistii yab ní!» Ní Samsɔn bí-bi yii: «Ní pùtīmaan yii nimbi ni-ba kaa làá kpɔ̀-mi.»

¹³Ní bi kíí-u yii: «Aayee, ti pée là kí bóob́-si iŋmii kí cáá-si ki cùnnì kí tīī-bi ní, taa làá kpɔ̀-si.» Ní u kíí bi dū iŋmipɔɔn ili ki bóob́-u ki cáá-u ki nyántì ntaŋkpalɔkɔn.

¹⁴Ŋyunti ŋun u tóob́ kí bà mpaan ŋun bi yíì Leeyiiyee ní Fiiliistii yab túŋkì-u nsanni ki kūuntí mpɔn. Ama ti-Dindaan Fam nìn kɔ́-u ní iŋmii in nìn bóob́ u-ŋaliiyee dūu kpántì kii gulfa ní ŋŋmi wùn̄ee, ní ki gbátì u-ŋaliiyin ki lítì.

¹⁵Samsɔn kpēēyee kimaŋ kin bi kūū an kaa láá yúntèe nyɔɔkpaweeŋŋu di dɔ̄ee. Ní u yōoǹ-ŋu ki dūu fátì ki kūū binib kutuku ubɔ.

¹⁶Ní Samsɔn bí yii: «Kimaŋ nyɔɔkpaweeŋŋu ní m dūu pɔ̄fì-bi. M dū kimaŋ nyɔɔkpaweeŋŋu ki kūū binib kutuku ubɔ.»

¹⁷U lī míǹ ki ŋmíl̀ee, ní ki dū nnyɔɔkpaweenee ki tɔ́ ki fá ndan, ní bi yíiń laakin ŋu tin lítèe yii Ramati Leeyii, taapu di sá yii <nnyɔɔkpaween gbantaŋki>.

¹⁸Ŋyunti gbantee nnyinnyoo nìn bàn̄-u tikpil, ní u tíminsì ki yíiń ti-Dindaan ki lī yii: «Sii di yāntì ní man a-tɔntɔnliu ká dijajikpaandi din bí nee. Mimmee kɔŋkɔnnee nnyinnyoo làá kpɔ̀-mi, ḿ kɔ́ bin kaa gífí nee ŋaanaaa?»

¹⁹Unimbɔti nìn yāntì ditaŋkpakpaandi din nìn bí Leeyii paaŋŋu pu ki cáá mbùńee cúu látì, ní nnyim nyánní. Samsɔn nìn nyùn̄ u-nimbiliŋ cúu ŋāatì ní u fātìi ká mpɔn. An pu ní bi nìn pú nnyimbul gbantee diyindi yii Eeni-Kooree, taapu di sá yii <un yíińee nyimbuliŋu>. Nnyimbul gbanti dáá gbíntìi bí Leeyii paaŋŋu pu ki dāa sāā díǹ.

²⁰Fiiliistii yab yuntiŋu gbantee, Samsɔn nìn kpōotì Isirayeel yab abin mmuŋku ní.