Read Ntcham Juges 16 Bible Online

Juges 16 - Ntcham bible

Juges 16

¹Dalbee, Samsɔn cūtì Gaasaa tiŋkin. U bàn̄ ki ká kinimpulaakpaai kiba ní ki kɔ́ ki-cee.

²Gaasaa yab nín nìn gbìl̄ yii Samsɔn bí bi-tiŋkinee, bi nìn cōom̀ ki māntì kitiŋ punyɔkɔpu ki cɔ́ŋkì-u kunyeeu gbanti kɔkɔ. Kunyeeu gbantee, baa nìn ŋá kìrikiri ní ki lī bi-neen yii: «Ti làá yàntī kutaa yaa fu wúntèe ní tí fu kpɔ̀-u.»

³Ama Samsɔn úǹ nìn pée dōoǹ ki bàn̄ kunyataasiiu ní. U nìn yíkì kunyataasiiu gbanti ní ki cūtìi cóotì kitiŋ punyɔkɔki punuubi nì idɔ in pu punuubi sàkantée liitil, ki dúkutì ki kpáaǹ idɔkpalikaa kɔkɔ ki dūu páaǹ u-gbigbipati pu ki cáa jɔ́ntiǹ dijool din bí Eebrɔn tiŋki nimbiinee yilpu.

⁴Míǹ boonee, Samsɔn ká unimpu ubɔ ki néeń. U nìn kóòń Sooreeki tantakalin ní bi yíì-u yii Daliila.

⁵Fiiliistii yab bɔtiibi biŋmooyee nín béè mimmee ní ki cūtìi ká Daliila ki tùkū-u yii: «Ŋmàtiǹ Samsɔn kí béé an nín dī pu ní u baasii cáá mpɔŋkpaan ŋun u cáá nee, nì min ní ti máaǹ kí ŋá kí pɔ̄ɔkiǹ-u kí ŋmā kí bóob́-u iŋmii ú taa ti ŋmā kí ŋá báà tibee. A yaa ŋúń ki ŋá mimmee, timbi ŋmootil báà ŋma làá tīī-si animbil kúti jitɔmbi kutuku ubɔ nì dilaataal dilaataal.»

⁶Niinee ní Daliila bí Samsɔn yii: «M gbàam̄-si, tùkù-mi an nín dī pu ní a cáá mpɔŋkpaan ŋun a cáá nee, kí tùkù-mi min unil máaǹ kí ŋá ní kí ŋmā kí bóob́-si iŋmii á taa ti ŋmā kí ŋá báà tibee.»

⁷Ní Samsɔn bí-u yii: «A yaa dū itaŋŋmii in dáá sɔ̀m̀ baa láá díntì-iee iluli ki dūu bóob́-mee, m-pɔŋŋu làá pèefì ní ḿ gítí kii unifantantee.»

⁸Ní Fiiliistii yab bɔtiibi biŋmooyee tīī Daliila itaŋŋmii in dáá sɔ̀m̀ baa láá díntì-iee, ní u cáa cūnnì ki bóob́ Samsɔn.

⁹Ŋyunti ŋun ní Fiiliistii yab kɔ́ ki nákáǹ nákáǹ Samsɔn diikunee, ní Daliila téeń yii: «Samsɔn, Fiiliistii yab dòoń kí cúú-seeee!» Ní Samsɔn dáaĺ ki tīfì itaŋŋmiiyee kii gulfa yaa pìl̄ ŋŋmi u nín tìfī puee. Ama binib kaa nìn béè laakin ní Samsɔn pɔŋkpaaŋŋu gbanti nìn nyánnée.

¹⁰Niinee ní Daliila bí Samsɔn yii: «Kpèè a ŋúb́-mi ki gbíilíǹ ki mɔ́ntí-mi inyimɔn. Kɔŋkɔnnee baasii tùkù-mi min ní unil máaǹ kí ŋá ní kí ŋmā kí bóob́-si iŋmiiyee.»

¹¹Ní Samsɔn bí-u yii: «A yaa dū iŋmipɔmpɔɔn in baa láá dūu ŋá báà tiba nì tibee ki gúĺ-mi mpɔnee, m-pɔŋŋu làá pèefì ní ḿ gítí kii unifantantee.»

¹²Ní Daliila nyàab̄ iŋmipɔmpɔɔn ki gúĺ Samsɔn ní ki téeń yii: «Samsɔn, Fiiliistii yab dòoń kí cúú-seeee!» Nì mimmee Fiiliistii yab nìn pée náká náká Samsɔn diikun niin dee. Ama Samsɔn nìn dáaĺ ki tīfì iŋmipɔmpɔɔn in nìn bóob́ u-ŋaliiyee, a lì kii gulfatɔkaayee.

¹³Ní Daliila bí Samsɔn yii: «Kí yòon̄ kí dāá sāā nee, a pée ŋúb́-mi ki gbíilíǹ ní ki mɔ́ntí-mi inyimɔn. Pée tùkù-mi min ní unil máaǹ kí ŋá ní kí ŋmā kí bóob́-see!» Ní Samsɔn bí-u yii: «A yaa dū bi nín lùn̄ m-yikpiti tifɔkɔl miluli puee ki lùn̄ ki nákáǹ kun bi cáa lù satabee pu ní ki dū mpiin ki cúúyee, m-pɔŋŋu làá pèefì ní ḿ gítí kii unifantantee.»

¹⁴Ní Daliila ŋmáliŋkì ŋmáliŋkì Samsɔn ní u gèen̄. Samsɔn gèen̄ee ní Daliila cúú bi nín lùn̄ u-yikpiti tifɔkɔl miluli puee ki lùn̄ ki nákáǹ kun bi cáa lù satabee pu ní ki dū mpiin ki cúú. U dóòyee ní ki téeń yii: «Samsɔn, Fiiliistii yab dòoń kí cúú-seeee!» Ní Samsɔn fīntì ŋgeem pu ki cúú mpiin nì kun bi cáa lù satabee ki dáaĺ ki cóotì ki kpáaǹ gulfa un bi nìn dūu bóob́ u-yikpitee.

¹⁵Ní Daliila bí Samsɔn yii: «Mana ní a ŋūǹ kí lì yii a néeń-mi, ama ní a-naŋki kaa kā m-pu? Kpèè, mita kɔkɔ ní a ŋúb́-mi ki gbíilíǹ kaa tùkū-mi laakin ní a-pɔŋkpaaŋŋuee nyánnée.»

¹⁶Baabadalee Daliila nìn pée páb́ Samsɔn nì tibɔbaantiil gbanti dibalifil kaa gbèentí. Samsɔn nìn ŋmēē ki ŋmēē ki tin gīī,

¹⁷ní ki dāa lēē tin kā u-pɔbilinee ki tùkū Daliila yii: «Bɔlfi kaa láá gbēē m-yikpiti ki ká, kun puee doooo m-na poon ní bi dū-mi ki sú Unimbɔti. Bi yaa pée kōol̀ m-yikpitee, m-pɔŋŋu làá nyā m-ni ní m-wunti ń pèefì, ní ḿ gítí kii unifantantee.»

¹⁸Daliila nín ká yii kɔŋkɔnnee Samsɔn lafun lēē tin kā u-pɔbilinee ki tùkū-uee, ní u tú bí yíiń Fiiliistii yab bɔtiibee ki bí-bi yii: «Nín̄ dòoḿmaan, kun puee min bí nee u baasii lēē u-pɔbil poon bɔti ní ki tùkū-mi.» Niin ní Fiiliistii yab bɔtiibee yíkì ki nín jɔ́ḿ Daliila dumpu, ki ŋúb́ animbil ŋin bi nìn pōoǹ-uee.

¹⁹Daliila nìn dū Samsɔn ki páaǹ u-taaŋi pu ki ŋmáliŋkì ŋmáliŋkì-u ní Samsɔn gèen̄, ní u yíiń uninja ubɔ dɔ́miń ki cúú Samsɔn yikpiti tin bi lùn̄ tifɔkɔl miluli puee ki kōol̀. Niin ní Samsɔn wunti kíĺ ki bíi yɔ̀tī, ní u-pɔŋŋu nyáń u-ni kɔkɔ.

²⁰Niinee ní Daliila téeń yii: «Samsɔn, Fiiliistii yab dòoń kí cúú-seeee!» Ní Samsɔn cúu fīntì ki dākafì u-neen yii: «Min bí nee m làá tí ŋmátí, kí ŋmā kí fōō m-ba kii m nín kpààa fòol̄ m-ba puee!» Waa nìn béè yii ti-Dindaan kaa nìn gíti bí u-cee.

²¹Fiiliistii yab nìn cúú-u ní ki sāā ki cɔ́tì u-nimbiliŋ liitil. Boonee ní bi cáá-u ki sīntì Gaasaa tiŋkin ki tin dū ikusaka in bi dū tasa kúti ki mɔ́ɔ́yee ki pɔ́b́ mili ki dūu gbìn̄-u. Bi nìn yāntì u bí kusarkadiin ki màntī kunaau taŋkpeeŋi ŋin nà ŋyimee.

²²Ama Samsɔn yikpiti tin bi nìn cúu kōol̀ee nìn fātìi kíĺ ki bíi nyēē.

²³Dalbee, Fiiliistii yab bɔtiibee kpáfì ki ŋá saraakpaan ki tīī bi-waal Daagɔn. Bi nìn bí ki fàal̀ ki lì yii: «Ti-waal dū ti-nannanliu Samsɔn ki ŋá ti-ŋaan!»

²⁴Fiiliistii yab nín wál̀ bi-waalee, bi bíi nyɔ́ŋkí-dì ki lì yii: «Ti-waal dū ti-nannanliu Samsɔn un nìn bí ki bíiĺ ti-tiŋki, ki nìn pɔ̄fì ti-yab tikpilee ki ŋá ti-ŋaan!»

²⁵Ŋyunti ŋun ní an bíi nyàatī-bee, ní bi bí yii: «Ní yíiḿmaan Samsɔn ú dāan̄ kí láaǹ-taa!» Ní bi lēē binib ki tú bi cūtìi nyántìń Samsɔn kusarkadiin, ní u dɔ́miń ki láaǹ-bi. Bi láń láń ki dóòyee ní ki cáá-u ki sákaǹ kuwaadii jaantalkub bili kansikin.

²⁶Niin ní Samsɔn bí unaacimpɔɔn un nìn ŋúb́ u-ŋal ki dàtī-uee yii: «Cúú m-ŋal kí dàkà-mi ḿ ŋmā kí gbēē jaantalkub bin ŋúb́ kudiiyee. M là kí nyīī bi-pu ní.»

²⁷Bininjab nì binimpoobi nìn gbí kudii gbanti ní an kaa cáá bí lì. Fiiliistii yab bɔtiibi biŋmooyee nìn bí niin, ní samaa un Samsɔn nìn láaǹee nìn dáá bí kudii yilpu, ki nìn bàn̄ kii binib kutukub bita nyɔkɔm.

²⁸Niinee Samsɔn mēē ti-Dindaan yii: «Ti-Dindaan Unimbɔti, m mèé-si yii á pée téetí m-pu. M-baa Unimbɔti, fàtīí tīī-mi mpɔn, báà min bí nee baba, ḿ ŋmā kí téeǹ Fiiliistii yab bi nín sāā ki cɔ́tì m-nimbiliŋ liitil puee dibaba pu.»

²⁹Samsɔn mēē míǹ ki dóòyee ní ki máań máań jaantalkub bili bin nìn cɔ́ kansikin ní ki ŋúb́ kudiiyee pɔŋŋuee. U nìn dū u-ŋaŋgiil ki nyīī jaantalkubee ubɔ ní ki dū u-ŋaŋgan ki nyīī un kíǹee.

³⁰Samsɔn nyīī nyīī jaantalkub liitil mimmee ní ki téeń mpɔn yii: «Yàntī man nì Fiiliistii yab ń kpāfì kí kpú!» Niinee ní u gúkúǹ u-ba ki nyīī jaantalkubee nì u-pɔŋŋu kɔkɔ, ní kudiiyee lítì ki tābitì ki kūū Fiiliistii yab bɔtiibee nì samaa un nìn pée kpáfì ki bí niinee kɔkɔ. Binib bin ní Samsɔn nìn kūū u-kúm wiiŋŋu gbanti dalee nìn jítiǹ bin kɔkɔ u nìn kūū ŋyunti ŋun u nìn dáá bí dimaŋfalinee.

³¹Samsɔn nabiyaamu nì u-baa dicaŋkun yab kɔkɔ nìn sīntìń ki yōoǹ u-wunti ki cáa nín jɔ́ḿ bi-tiŋkin. Bi nìn síb́-u Sooreeya nì Eesitawool timmu kansikin, u-baa Manoowa kaakul poon. Samsɔn nìn kpōotì Isirayeel yab abin mmuŋku ní.