Read Ntcham Juges 19 Bible Online

Juges 19 - Ntcham bible

Juges 19

¹Ŋyunti gbantee bibɔtiibi kaa nìn dá láá bí Isirayeel tiŋkin. Leefii naakookun niliu ubɔ nìn kóòń Eefiraayiim jooŋŋi timmu mun bínní poon poon púee kiban. U nìn cáá ubɔnti ubɔ sá Beetileem, Juuda tiŋkin.

²U-bɔɔn gbanti nìn nyáń u-boon ní ki nìn yíkì-u ki nín kùǹ u-baa dumpu Beetileem, Juuda tiŋkin. U nìn kāl̀ niin ki bàn̄ kii iŋmal inaa nyɔkɔm.

³U-cal nìn jìn̄ u-boon ki cūtì kí sɔ̀ŋkì u-pɔbil kí fàtīí gíiǹní-u u-cee. U nìn kpáaǹ u-tɔntɔnliu nì mmamu muli. U-bɔɔnee nìn cáá-u ki kɔ́ǹ u-baa dumpu. U-baa nín nìn ká u-cooyee, an nìn mɔ́ɔkiǹ-u tikpil ní u fōō-u nì dipɔɔpindi.

⁴U nìn cúú u-coo ki kāaǹ u-dumpu iwiin ita kɔkɔ. Iwiin ita gbantee, u nì u-tɔntɔnliu nìn jīǹ, ki nyù ní ki dɔ̀ niin.

⁵Ŋwinnanaati dal bi fīntì kutaafaau pɔ̀lpɔlee, uleefiijee bíi bɔ́ntí bí yīkèe, ní unimpu baa bí-u yii: «Kāl̀ kí jī tijin kí tíkiń a-fam kí wàatī ní nín búntáa!»

⁶Ní u kíí ki kāl̀ ní bi-liitil jíń ki nyùn̄. Ní unimpu baa bí-u yii: «Gbíntí kí dòon̄ doo kunyeeu nee kí gíti ŋùŋfì fiiiyaa!»

⁷Uleefiijee nín bàà nìn yíkì kí nīn cée, ní u-coo kā u-pu yii ú gbíntí kí dòon̄, ní u dāa kíí ki lafun gbíntì niin ki dōoǹ kunyeeu gbanti.

⁸Ŋwiŋŋmooŋmooti dal, u tí yíkì malaa ki bɔ́ntì kí bàà nín̄ cée, ní unimpu baa tí bí-u yii: «M gbāam̀-si, kàl̄ kí jī tijin, kí cīití ŋwìiń yaa sɔ̄ŋkèe á nīn cá!» Ní bi-liitil tí kāl̀ ki jíń tijin.

⁹Uninjee nì u-bɔɔn nì u-tɔntɔnliu tí bɔ́ntì kí yīkèe, ní u-coo tí bí-u yii: «Kpèè ŋwìiń jéetì ní nee, kunyeeu bíi móotí! An puee ní pūtìi gbíntí kí dòon̄ á gíti ŋùŋfì fiii. Fool kutaafaauee, ní fu yīkì malaa kí nīn kùǹ a-dumpu.»

¹⁰Ama uninjee nìn yíì kpataaa, kaa ti kíí kí dòon̄ niin kunyeeu gbanti. U nìn yíkì ki cōom̀ ki tin bàn̄ Jeebusi tiŋki kin bi gíti yíì yii Jeerusaleem tiŋkee. U nìn kpáaǹ u-mammu liitil mun u nìn túǹ awaŋgulee nì u-bɔɔn.

¹¹Ŋyunti ŋun bi bàn̄ Jeebusi tiŋki caŋinee, ŋwìiń ŋman nìn pée jéetì ki dóò, ní utɔntɔnlee bí u-kpiliu yii: «Ukpil, yàntī tí pàatī kí kɔ́ Jeebusi yab tiŋki nee poon kí dòon̄ kunyeeu nee!»

¹²Ní u-kpiliu kíí-u yii: «Taa làá yūĺ binicambi tiŋki kin poon Isirayeel niliu báà ubɔ kaa bí nee. Ti làá nìkī kí bà Giibeeya tiŋkin ní.»

¹³U nìn kútì ki lī yii: «Tí pɔ́ɔm̀maan kí nìkī kí bà Giibeeya tiŋkin àá Raama tiŋkin. Ti tin ŋūǹ kí dòon̄ ntimu gbanti liitil kiban.»

¹⁴Bi nìn lafun nìkī ki tin bàn̄ Giibeeya, Beenjameen tiŋkinee ŋwìiń nìn bíi jēetí.

¹⁵Bi nìn pāatì Giibeeya tiŋkin niin kí dòon̄ kunyeeu gbanti. Bi nìn kɔ́ kitiŋin ní ki cūtìi kāl̀ kitiŋ punyɔkɔpu[24], ama báà unil kaa nìn fōō-bi bí kɔ́ kí dòon̄ u-dumpu.

¹⁶Bi dāa kpēēyee ujaŋkpil ubɔ di nyánní kusaau ki kùnnée. Ujaŋkpil gbanti nìn sá Eefiraayiim jooŋŋi timmu kiban ní, ama ní ki nìn kóò Giibeeya tiŋkin, Beenjameen naakookun yab kansikin.

¹⁷Ujaŋkpil yáatì u-yil ki ká usaŋkinlee kā kitiŋ punyɔkɔpuee, ní u bālifì-u yii: «A nyánní la ní ki cá la?»

¹⁸Ní u kíí ujaŋkpilee yii: «Ti nyánní Beetileem, Juuda tiŋkin ní ki cá Eefiraayiim jooŋŋi timmu mun bínní poon poon púee kiban. Niin ní m sá ní ki cūtì Beetileem, Juuda tiŋkin ki bàà fàtīi kùǹ dee, ní báà ubɔ kaa fōō-mi ḿ dòon̄ u-dumpu.

¹⁹Ama timool nì tifaal bí tí kpíiǹ ti-mammu. Kpɔnɔ nì ndamam mun bí man nì m-nimpuu nì m-tɔntɔnliu un bíi cēentí-tee ń jī. Tiba nì tiba kaa lóò-ti.»

²⁰Ní ujaŋkpilee bí-u yii: «Ŋgbansɔŋfi ń nīn bí a-cee! Man cáá tikɔkɔ ki làá ŋmā kí fōō-ni, ama ní taa pée gbíntí kí dòon̄ kitiŋ punyɔkɔpu doo.»

²¹Ujaŋkpilee nìn cáá-bi ki kɔ́ǹ u-dumpu ki tīī bi-mammu timool mu ŋmɔ́. Bíǹ bi-ba nìn ká nnyim ki fíntì bi-taaŋi ní ki nìn jíń ki nyùn̄.

²²Ŋyunti ŋun bi nìn bí ki jīǹee ní kitiŋ gbanti nib bin kaa bí tibanee biba dɔ́miń ki māntìi tú dicindi, ki gāā kipunyɔkɔ mpɔn mpɔn ní ki téeń ki bí ujaŋkpilee yii: «Nyāntiń uninja un kɔ́ a-dumpuee doo timbi ń dòon̄ nì u[25]!»

²³Ní kudiidaan nyáń ki bí-bi yii: «Aayee, m-nabiyaamu m pée gbāam̀-ni ní, ní taa ŋá tikpitil gbanti. Uninja nee nín gíti dáá kɔ́ man nee, ní taa ŋá-u icoo bɔti gbanti!

²⁴Kpèèmaan, man bisal un kaa nyí uninjee bí ní kí kūtì unicaanee nimpuu. M làá nyāntí-bi kí tīī-ni ní dòon̄ nì bi, ní kí ŋá-bi min ni yaa lèe. Ama ní taa ŋá uninja nee pu icoo bɔti min ni là kí ŋá nee!»

²⁵Ama binibee nìn yíì kaa pílifiǹ-u. Niinee ní uleefiijee nyántì u-bɔɔnee mmɔŋki ki tīī-bi. Bi nìn dōoǹ nì u, ki nìn sāaǹ-u míǹ ní kutaa dāa dūu wúntì. An nìn bíi cá kutaawuntuŋuee ní bi gíiǹ-u ki líì.

²⁶Kutaa nìn tóob́ kí wúntí ní unimpuee fātìi bāań ujaŋkpil un cee u-cal nìn bée dumpu, ní ki lítì dicindi punyɔkɔki nyɔkɔpu. U nìn dōoǹ niin ní kutaa púntìi wúntì.

²⁷Kutaafaau pɔ̀lpɔl u-cal yíkì ki cūtìi pīitì dicindi punyɔkɔki ki nyáń bí bàà nìkī u-saŋŋuee, u kpēēyee u-bɔɔnee di dɔ̄ee, u-ŋalii nyīī kipunyɔkɔ.

²⁸Ní u bí-u yii: «Yīkì tí nīn cá!» Ní an ŋmí kpíii. Niinee ní u bɔ́ ki mɔ̀kɔ̄-u ki dūu páaǹ u-maŋki pu ki cáa nín kùǹ.

²⁹U bàn̄ u-dumpuee ní ki yōoǹ kitàataajiki ki cúú u-bɔɔnee wunti ki càkā anaŋkún saalaa nì ali, ní ki dūu tú bi cáa yākatì Isirayeel naakɔti saalaa nì tilee dinaŋkúndi diba diba.

³⁰Uleefiijee nìn tùkū binib bin u nìn túee yii bi yaa bàn̄ Isirayeel yab ceeyee bí lì yii: «Doooo Isirayeel yab nín nyánní Eejipiti tiŋkin ki dāa sāā díǹ nee, ni gíti dáá ká tibɔti nee juti jítì dalbaaa? Ní dàkafìmaan tibɔti gbanti pu, kí kpāfì kí sòoǹ kí kpèè ni nín làá ŋāŋkì-tì puee!» Unil un kamaa yaa nìn ká mimmee ní ú lì yii: «Kí pée yòon̄ doooo ŋyunti ŋun Isirayeel yab nyánní Eejipiti tiŋkin ki dāa sāā díǹ nee, tibɔti tin bí nee juti kaa láá pée jítì ŋwindal ti-nimbil ká!»