Read Ntcham Juges 3 Bible Online

Juges 3 - Ntcham bible

Juges 3

¹Atimbun ŋin nib ti-Dindaan nìn yāntì bi gbíntìi bí Kanaan tiŋkin, ú dī bi-pu kí cɔ̄ŋkì Isirayeel yab bin kaa nìn ká bi-baabi nín nìn jáń nì Kanaan yab puee sèé.

²U nìn baasii là yii binipɔmbi bin kaa nìn pée jáń kujaau ki kée ń bīfì bi nín jáà kujaau puee ní.

³An nibee di nìn sá Fiiliistii yab bɔtiibi biŋmooyee, nì Kanaan yab nì Siidɔn yab nì Eefi yab bin kɔkɔ nìn kóò Leebanɔn jool pu, kí yòon̄ Baal-Eermɔn jool kí tin cáá sāā Leeboo-Amaati tiŋkee.

⁴Ti-Dindaan nìn lēē binib gbanti kí dī bi-pu kí cɔ̄ŋkì Isirayeel yab kí kpèè yii bi làá nīn nóó marab bin úǹ ti-Dindaan nìn dī Mooyiisi pu ki tīī bi-baabeeyaaa, baa làá nīn nóó-bi.

⁵Míǹ ní Isirayeel yab nìn kɔ́ Kanaan yab nì Eeti yab nì Amɔɔr yab nì Peeriisi yab nì Eefi yab nì Jeebusi yab kansikin.

⁶Bi nìn cáá binib gbanti bisalib, ki nìn dū bi-bisalib ki tīī binibee jipɔmbi ticati, ní ki nìn bí ki jáaḿ bi-nimbɔtii.

⁷Isirayeel yab nìn ŋá min kaa kítì ti-Dindaan ceeyee, di sá yii bi nìn dū ti-Dindaan bi-Nimbɔtiu saŋŋu ki fá ní ki nìn kíǹ ki bí ki tòotī Baal nì Aseera.

⁸Ti-Dindaan nìn gíí Isirayeel yab pu diŋuul ní ki dū-bi ki ŋá Kusan-Riseeyatayiim, Aram-Naarayiim bɔtiu ŋaan. Isirayeel yab nìn kāl̀ Kusan-Riseeyatayiim taapu abin anii ní.

⁹Isirayeel yab nìn kúuǹ ki yíiń ti-Dindaan, ní ti-Dindaan lēē bi-kansikin Ootiniyeel, Kaleeb naal Keenaasi jipɔɔn ní úǹ fīī-bi.

¹⁰Ti-Dindaan Fam nìn gbí Ootiniyeel ní u kpántì Isirayeel yab bɔsoonliu. U nìn cūtìi jáń nì Kusan-Riseeyatayiim, Aram bɔtiu ní ti-Dindaan dū Kusan-Riseeyatayiim ki ŋá u-ŋaan, ní u jáń ki pɔ́ɔkiǹ-u.

¹¹Niinee ní Isirayeel tiŋki sɔ̄ŋkì ki tin sāā abin imuŋku ili. Míǹ boonee ní Keenaasi jipɔɔn Ootiniyeel kpíì.

¹²Isirayeel yab nìn fātìi kíĺ ki bíi ŋáań min kaa kítì ti-Dindaan ceeyee. Bi nín nìn bíi ŋáań min kaa kítì ti-Dindaan ceeyee puee ní u yāntì Moowaab bɔtiu Eeglɔn pɔ́ɔkiǹ-bi.

¹³Ubɔti Eeglɔn nìn dū Amɔn yab nì Amaleeki yab ki kútì u-ba pu ní bi cūtìi jáń ki pɔ́ɔkiǹ Isirayeel yab, ní ki cúú Jeeriikoo, Ibafi tiŋki ki fōō bi-cee.

¹⁴Isirayeel yab nìn kāl̀ ubɔti Eeglɔn taapu abin saalku nì ata ní.

¹⁵Isirayeel yab nìn kúuǹ ki yíiń ti-Dindaan, ní ti-Dindaan nìn lēē bi-kansikin Geera jipɔɔn Eewuudi ú fīī-bi. U nìn sá Beenjameen naakookun ní, ki nìn sá ugan. Úǹ ní Isirayeel yab nìn lēē ki tú ú cáá lampoo kí cùnnì kí tīī Moowaab bɔtiu Eeglɔn.

¹⁶Eewuudi nìn yāntì bi mɔ́ɔ́-u kitàataajiki kiba, kì jītí ajanliitil pu ní ki-fɔkɔŋŋu sá kii dimeetajandi nyɔkɔm. U nìn dū kitàataajikee ki gbìn̄ tiwan tin u pēēyee poon, ní an pá u-ŋaŋgiitapandi pu.

¹⁷Boonee ní u cáá lampooyee ki cūnnì ki tīī Eeglɔn, Moowaab bɔtiu. Eeglɔn gbanti nìn baasii gbìfì ní.

¹⁸Eewuudi nín dū lampoo ki tīī ubɔtee ní u fātìi nín gítí ki cūtìi céeǹ binib bin nìn túǹ lampoo gbantee ki nyántì nsanni.

¹⁹Ama úǹ u-ba nín bàn̄ laakin bi yíì yii Awaa Paaŋŋu, Giilgaal tiŋki caŋinee ní ki fātìi nín gítí ki cūtìi tùkū ubɔti Eeglɔn yii: «Ti-baa ubɔti, m cáá tibɔti tiba kí tùkù-si ubɔ ń taa gbìl̄!» Ní ubɔti bí bin kɔkɔ nìn yú ki kɔ́ĺ-uee yii bí nyā kí wàatī-u ní bi nyáń[7].

²⁰Ubɔti nìn kā u-diiku kun nìn tɔ́kɔ́ yilpu ki sɔ̀m̀ fílfil bi bɔ́ntì ki yóoǹ úǹ babee poon ní Eewuudi sútìi pìl̄-u ki bí-u yii: «Tibɔti tin m cáá kí tùkù-see sá Unimbɔti bɔti ní.» Ní ubɔti yíkì u-beejal pu ki yáatìi yúl̀.

²¹Niinee ní Eewuudi tāntì u-ŋaŋgan ki cúú kitàataajiki kin nìn pá u-ŋaŋgiitapandi puee ki dáaĺ ki nēetì ní ki dūu sāā ki cóoǹ ubɔti pool pu.

²²Kitàataajiki nìn múĺ ubɔti poolin ki kpáaǹ dijigbandi ní ŋkpam nìn dūu bīiǹ dijigbandi pu, kun puee Eewuudi kaa nìn dáaĺ kitàataajiki ki fɔ́fìń ubɔti pool poon.

²³U nìn làá nyēe ní ki dáaĺ kudii kun tɔ́kɔ́ yilpuee punyɔmmu ki pīiǹ ki kpàl̄ ubɔti pu ní ki dī boon pú ki nyáń.

²⁴Eewuudi nìn nín nyēē ubɔti tɔntɔnliibi dāa dɔ́mińee ní ki ká yii kudii kun tɔ́kɔ́ yilpuee punyɔmmu pīī ki kpàl̄. Niinee ní bi lī yii: «An yaa yíì u máaǹ ki kɔ́ ataa pu u-diiku kun sɔ̀m̀ee poon ní.»

²⁵Bi nìn cíitì ki tin gīī, waa bíi pìitī kudii kun tɔ́kɔ́ yilpuee punyɔmmu. Bi dāa yōoǹ saafii ki cúú kudii ki pīitì ki kpēēyee, bi-kpiliu di dɔ̄ kitiŋ ki kpíìyee.

²⁶Ŋyunti ŋun ní bi nìn kā ki tàantí mimmee, Eewuudi úǹ nìn sáǹ ki kɔ́ ndan. U nìn jítì laakin bi yíì yii Awaa Paaŋŋuee pu, ki nìn bí ki sáń ki cá Seeyira tiŋki watil pú kí ŋmátí.

²⁷U nìn sáǹ ki bàn̄ Eefiraayiim jooŋŋi puee ní ki búń ŋyin ní Isirayeel ninjab kɔkɔ nyánní ki kpáfì. U nìn līntì bi-nyɔkɔpu ní bi-kɔkɔ páaǹ u-boon ki nín sìntī dijool taapu.

²⁸U nìn bí-bi yii: «Páaḿmaan m-boon, kun puee ti-Dindaan dū ni-nannanliibi Moowaab yab ki ŋá ni-ŋaan!» Bi nìn lafun páaǹ u-boon ki sīntì ki cūtìi gāā ki kíntì Jɔɔdan buŋŋu laakin ní binib còom̄ ki dùtī Moowaab tiŋki jaaŋŋu púee, kaa nìn yāntì báà uniseen dūtì.

²⁹Ŋyunti gbantee, Isirayeel yab nìn kūū Moowaab yab bininjab bin nìn sá tijawɔkɔl ki sá bibaatandambee kii binib kutukub saalaa nyɔkɔm. Bi-kansikin báà uniseen kaa nìn sáǹ ki ŋmátì.

³⁰Kí yòon̄ ŋwiin gbanti ní Isirayeel yab nyīī Moowaab yab ki gùl̄ bi-taapu, ní Isirayeel tiŋki sɔ̄ŋkì ki tin sāā abin imuŋku inaa.

³¹Eewuudi boonee, Anaati jipɔɔn Samgaar di nìn páaǹ. U nìn dū ndɔ ŋun nyɔkɔpu cáá mpiin bi cáa sàatī inaa kiŋkinti i tūǹ atuunee ki kūū Fiiliistii yab binib alaataa aluu ní. Min ní Samgaar nìn ŋá ki fīī Isirayeel yabee dee.