Read Ntcham Juges 5 Bible Online

Juges 5 - Ntcham bible

Juges 5

¹Ŋwiin gbantee, Deeboora nì Abinoowaam jipɔɔn Baraaki nìn gāā nlan nee yii:

²«Isirayeel tiŋkinee, bijanjaliibi nín bɔ́ntì ki cūtì kujaau puee, samaa nín lēē nì dipɔbil diba ki cūtì kujaau puee, Jāam̀maan ti-Dindaan!

³Bibɔtiibi, pīlifìmaan! Biyidambi, kpòom̄maan ni-tafaliŋ! Man làá gāā ilan kí pàkà ti-Dindaan, m làá nyɔ̄ŋkì ti-Dindaan Isirayeel Nimbɔtiu.

⁴Ti-Dindaan, a nín nìn nyánní Seeyiir[9] tiŋkinee, a nín nìn yíkìń Eedoom satin ki dòońee, kitiŋ nìn cīŋkì ní kutagbɔŋu cúu pīitì, ní nnyim nyēeń atagbanni ki sìtīń taapu.

⁵Ajoon nìn wūtì sii Siinaayi jool[10] Dindaaŋwu nimbiin, ŋi nìn wūtì sii ti-Dindaan Isirayeel Nimbɔtiu nimbiin.

⁶Anaati jipɔɔn Samgaar nì Jaayeel yuntiŋuee, binib kaa nìn gíti kàal̀ igutaamu ki còom̄ isanjaa pu, bisaŋkinliibi nìn kíǹ ki pāantí ipampa ní ki jītí.

⁷Binib nìn sáǹ ki nyáń ntimun ní mu kíǹ ki dɔ̄ fám. Binib nìn sáǹ ki fá Isirayeel timmu ki tin cáa sāā ŋyunti ŋun sii Deeboora dāa yíkì yilpuee, ki tin sāā ŋyunti ŋun ní a yíkì kii ubinaati Isirayeel tiŋkinee.

⁸Isirayeel yab nìn lēē inimbɔtipɔɔn ki jáaḿ, an di yì-tì ní kujaau bāań ki gūū bi-timmu punyɔmmu. Ama an nìn pɔ̄ɔ̄ á ká digbampɔɔl àá kikpaŋ kí tīī binib kutukub imuŋku inaa Isirayeel tiŋkin.

⁹M-pɔbil bí Isirayeel kpilib cee, bin dū bi-ba ki sú samaa kansikinee. Jāam̀maan ti-Dindaan!

¹⁰Nimbi bin kàal̀ mmansapimu puee, nimbi bin kàal̀ tisatakampati puee, nimbi bin còom̄ adan puee, dàkafìmaan.

¹¹Laakin bi cáǹ tiwaŋkuti ki nyùntī-tèe, biwaŋkpaaliibi bíi máafí ti-Dindaan deedee tuuŋŋi bɔti, deedee tuuŋŋi ŋin ní u ŋáaǹ Isirayeel tiŋkinee. Niinee ní ti-Dindaan nibul nyáń ki cūtìi kpáfì kitiŋ punyɔkɔpui.

¹²Deeboora, fìntim̄eeee, fìntīmaan! Fìntī malaa kí tóoń njanjalan. Baraaki, yīkìm̄! Kpáaǹ bin a cúú kuyuŋuee, Abinoowaam jipɔɔn.

¹³Isirayeel yab bin kíǹ kaa kpíìyee kpáfì ki kpákatì abɔtibil cee. Ti-Dindaan nibul kpáfì nì bibaatandambi ki kpákatìń m-cee.

¹⁴Eefiraayiim naakookun yab kansikin ní bin jáń ki pɔ́ɔkiǹ Amaleeki yabee nyánní. Beenjameen naakookun yab páaǹ bi-boon ki kpákatì nì bi-janjaliibi. Makiir yab kansikin ní bi lēē bijanjakpilib, ní ki lēē Sabulɔn naakookun yab kansikin bikpootiliibi.

¹⁵Isakaar kpilib bí Deeboora cee. Isakaar naakookun yab bí Baraaki jandi, ki páaǹ u-boon ki cūtì ditantakalin. «Ama Rubeen naakookun yab nín pēē pēē mmaal puee bíǹ kā ki kpákà an kaa kúntí.

¹⁶Ba ŋá ní sii gbíntì awaŋgul ali kansikin ki pílifí bi nín búǹ awul ki yíì tiwaŋkuti puee? Rubeen naakookun yab nín pēē pēē mmaal puee bíǹ lafun kā ki kpákà an kaa kúntí.

¹⁷Galaadi tiŋki bí Jɔɔdan buŋgbandi ŋwìiń nyalaŋki pú ní. Ba di ŋá ní Daani naakookun yab kóò meelabin ní? Aseer naakookun yab kāl̀ tiŋku caŋin, ki kóò ki pìlīǹ laakin meelab yūlifée.

¹⁸Sabulɔn naakookun yab nì Neefitalii naakookun yab di sá binib bin kaa fāŋkì ŋkúm, ki jɔ́m̀ dikɔmbool pu ki jáń kujaauee.

¹⁹Bibɔtiibi dɔ́miń ki jáń kujaau, Kanaan bɔtiibi jáń kujaau Taanaki tiŋkin, Meegiidoo nyiŋfii caŋin. Ama baa ká animbil kúti ki yōoǹ.

²⁰Iŋmalbijaa kālìń yilpu ki jáń kujaau, i kālìń i-laŋki kutagbɔŋu pu ki jáń nì Siiseela.

²¹Kiisɔn buŋŋu yōoǹ bi-kɔkɔ ki cáa búntì, cannaaku buŋŋu, Kiisɔn buŋŋu dee! M-naŋki, còom̀ nì tininjati!

²²Niinee ní itaamu kíĺ ditaatandi i-taaŋi gbáà kitiŋ. i tòó ki tòó kii kpaŋkpakantiku taamuuyee.»

²³Ti-Dindaan tuuŋŋu bí yii: «Ní tɔ̄ Meeroosi tiŋki mbusu, ní tɔ̄ kitiŋ gbanti nib mbusu ŋkpitim pu, kun puee baa nyáń ki tútúǹ ti-Dindaan, baa tútúǹ ti-Dindaan nì bibaatandambi.

²⁴Binimpoobi kansikinee, bí nyɔ̄ŋkì Jaayeel, Eebeer un sá Keeni maaliŋunee nimpuu! Bí nyɔ̄ŋkì-u binimpoobi bin pée kóò tantibinee kɔkɔwoooo kansikin!

²⁵Siiseela mēē-u nnyim, ama ní úǹ tīī-u nnaabiim. U bātì nnaabiim min kìl̄ee ki sītì-u bibɔtiibi sambinyɔkaakin.

²⁶Jaayeel tāntì u-ŋal ki cúú dikpakpaal, ki tāntì u-ŋaŋgiil ki dúkutì bitɔntɔnliibi kújal. U gbáń ki mátì Siiseela yil, u sāā u-taŋkpanjil ki cíl̀.

²⁷Ní Siiseela nyáń ki lítì u-taaŋi taapu ki dōoǹ, u-taaŋi taapu ní Siiseela nyáń ki lítì. Laakin u nyáń ki lítèe, niin ní u dōoǹ ki kpíì!

²⁸«Siiseela na gbóoń tɔkɔla ki kpēē, tɔkɔla boon ní u bí yii: <Ba pu ní u-janjatɔrɔkuu kaa bíi bàń malaa ní? Ba pu ní u-janjatɔrɔkub còomìń soooo míǹ?>

²⁹Binimpoobi bin bí u-ceeyee kansikin un cáá iciinee kíí-u, ní úǹ u-ba bí ki lì ki kùbitī yii:

³⁰<An yaa yíì bi tin jáń ki ká tiwan ki bíi yàkatī: ujanjal kamaa tin ká usapɔɔn ubɔ kii bili, Siiseela tin ká satab bin nyim bí miba mibee, ujajil tin ká ŋŋaabu ŋun bi gbáń mili puee kí dūú fìn̄ u-sil.>

³¹Ti-Dindaan, yàntī a-nannanliibi kɔkɔ ń kpú míǹ mbaantiim, ama bin sá a-bɔɔbee ń nīn bí kii ŋwìiń nín nyēeń nì ŋu-pɔŋŋu puee!» Ní Isirayeel tiŋki ká ŋgbansɔŋfi ki tin sāā abin imuŋku ili.