Read Ntcham Juges 6 Bible Online

Juges 6 - Ntcham bible

Juges 6

¹Isirayeel yab tí ŋá tin kaa kítì ti-Dindaan ceeyee. An pu ní ti-Dindaan dū-bi ki ŋá Madiyan yab ŋaan abin aluli[11].

²Madiyan yab nìn wɔ́b́ Isirayeel yab tikpil. Madiyan yab puee, Isirayeel yab nìn bɔ́ntì itaŋkpalɔkɔ nì titaŋkpanaakɔti nì ipaan in an pɔ̄ɔ̄ unil ń còom̀ kí bà sɔkɔmiiyee ajoon pu.

³Ama Isirayeel yab yaa nìn búĺ bi-kpaajintee, Madiyan yab nì Amaleeki yab nì ŋwìiń nyalaŋki pú timmu yab nìn jɔ́ḿ ki jáà nì bi.

⁴Bi nìn ŋàtī bi-naapaaŋi Isirayeel yab caŋin, ní ki bíiĺ bi-kpaajinti kí tin cáa sāā Gaasaa tiŋki caŋin. Baa nìn kīntí Isirayeel yab báà tiba bí ká kí jī kí ŋmátí. Baa nìn kīntí-bi upiiyaaa, unaayaaa, kimaŋ.

⁵Di sá yii binibee nìn yíkiń ní kí kpáaǹní bi-waŋkuti nì bi-tantib ní kí dāá bìin̄ Isirayeel yab tiŋki pu bɔ̀mmm kii inaakitoonee, kí bīil̀ tin bí kitiŋee puee kɔkɔ. Bi nì bi-gutaamui nìn wīikí an kaa cáá ŋkaan.

⁶Madiyan yab puee, Isirayeel yab nìn dūu kpántì biwɔfib ní. Niinee ní Isirayeel yab kúuǹ ki yíiń ti-Dindaan ú jòoń-bi.

⁷Ŋyunti ŋun Isirayeel yab nìn kúuǹ ki yíiń ti-Dindaan ú fīī-bi Madiyan yab ŋaanee,

⁸ní ti-Dindaan dū u-bɔnaatiliu ubɔ ki tú bi-cee úǹ tùkū-bi yii: «Ti-Dindaan Isirayeel Nimbɔtiu nín lī puee sèé: <Man di nyántìń-ni Eejipiti tiŋkin, laakin ni nìn bí kuyuŋunee.

⁹Man di fīī-ni Eejipiti yab nì bin kɔkɔ nìn bí ki wɔ́b̀-nee ŋaan, ní ki jìn̄-bi ni-nimbiin ki dū bi-tiŋki ki tīī-ni.

¹⁰M nìn tùkū-ni yii man di sá ni-Dindaan ni-Nimbɔtiu. Ní taa jāam̀ Amɔɔr yab bin tiŋkin ni kóòyee nimbɔtii!> Ama ní naa pílifì m-nyɔkɔ!»

¹¹Ti-Dindaan tuuŋŋu nìn dɔ́miń ki kāl̀ teereebinti subu bubɔ taapu, Oofiraa tiŋkin. Joowaasi un sá Abiyeeseer maaliŋunee di nìn yì busubu gbanti. U-jipɔɔn Geedeeyɔn nìn bí ki gbáà bilee dibɔbil din poon bi tà fiinyi biliŋ ki lèekī ndamamee, Madiyan yab ń taa ká-u.

¹²Ti-Dindaan tuuŋŋu nìn lēē ŋu-ba ki dàkā-u ní ki bí-u yii: «Ti-Dindaan bí a-cee, ubaatandaan!»

¹³Ní Geedeeyɔn bí-u yii: «M gbāam̀-si, m-kpiliu. An yaa sá yii ti-Dindaan lafun bí ti-ceeyee, ba pu ní tin bí nee kɔkɔ bāań-ti? Atuŋkpaan ŋin ti-baabi nìn máafì-ti yii ti-Dindaan nìn ŋáaǹ ki tīī-bi u nín nìn nyántìń-bi Eejipiti tiŋkinee bí la sɔ̀? Too, kɔŋkɔnnee ti-Dindaan fātì u-boon ki tīī-ti, ní ki dū-ti ki ŋá Madiyan yab ŋaan.»

¹⁴Niinee ní ti-Dindaan fātì u-watil pú ní ki bí-u yii: «Nì mpɔn ŋun a cáá nee, cùú já kí fīī Isirayeel yab Madiyan yab ŋaan! Man di kaa tú-saaa?»

¹⁵Ní Geedeeyɔn bí-u yii: «M gbāam̀-si, m-kpiliu, mana ní m làá ŋmā kí fīī Isirayeel yab? Manasee naakookun ti nín pēē pēē mmaal puee, man maaliŋun yab di pátì. Kí kūtèe, man di pée sá kiwaŋwaai m-baa dicaŋkun.»

¹⁶Ní ti-Dindaan kíí-u yii: «M làá nīn bí a-cee ní á já kí pɔ̄ɔkiǹ Madiyan yab kɔkɔ dicilpu kii bi sá unibambaantee.»

¹⁷Ní Geedeeyɔn bí-u yii: «M yaa lafun ká diyimɔɔl a-ceeyee, á dàkà-mi kudaaŋŋu kubɔ ḿ béé yii tilafuŋman sii di bíi sòoǹ nì mi.

¹⁸M gbāam̀-si, taa búntí. Á cīití-mi doo ḿ cù kí bɔ́ntiń m-saraau kí cáań kí yóoń a-nimbiin.» Ní ti-Dindaan kíí-u yii: «M làá cīití-si á cùú gítiń.»

¹⁹Ní Geedeeyɔn nín kóò u-dumpu ki cūtìi cúú diŋɔbil ki kūū ki tɔ́kɔǹ, ki lēē ŋyim kiiloobi mmuŋku nì saalaa ki púĺ kpɔnɔb bin kaa cáá ŋkpɔnɔnyɔkɔee. U nìn bāaǹ tinan ki tākaǹ kukabikun, ki kpáatì tikun ki sītì dikumboolin ní ki yōoǹ kɔkɔ ki cáa nyántì teereebinti subu taapu ki yóoǹ ti-Dindaan nimbiin.

²⁰Ní ti-Dindaan tuuŋŋu bí Geedeeyɔn yii: «Dū tinan nì kpɔnɔb bin kaa cáá ŋkpɔnɔnyɔkɔee kí páań ditaŋkpal nee pu, kí kpáatí tikun kí pɔ̀l̄ an pu.» Ní Geedeeyɔn ŋá míǹ.

²¹Ní ti-Dindaan tuuŋŋuee tāntì ŋkpandɔ ŋun ŋu ŋúb́ee nyɔkɔpu ki gbēē tinan nì kpɔnɔb bin kaa cáá ŋkpɔnɔnyɔkɔee, ní ŋŋmi nyáń ditaŋkpal din pu an pée ki wùn̄ tinan nì kpɔnɔbee kɔkɔ múb. Niinee ní ti-Dindaan tuuŋŋuee wáŋkì Geedeeyɔn nimbiin.

²²Niin ní Geedeeyɔn béè yii an sá ti-Dindaan tuuŋŋu, ní u téeń yii: «Óo, m-bɔlii na, m-Dindaan Unimbɔti. Ti-Dindaan tuuŋŋu ní m lafun wál̀ nì m-nimbiliŋ kpìrrr naa!»

²³Ní ti-Dindaan bí-u yii: «Ŋgbansɔŋfi ń nīn bí a-cee! Taa fàŋkì báà tiba, aa làá kpú.»

²⁴Ní Geedeeyɔn máń nsaraafan ŋubɔ mpaan gbanti pu ki tīī ti-Dindaan ní ki pú-ŋu diyindi yii <Ti-Dindaan sá ŋgbansɔŋfi>. Nì díǹ pu nee, nsaraafan gbanti dáá gbíntìi yú Oofiraa, Abiyeeseer tiŋki kiba poon.

²⁵Kunyeeu gbanti ní ti-Dindaan tùkū Geedeeyɔn yii: «Cúú a-baa najau dimaaliliitiil yau un cáá abin alulee. Míǹ boonee, á cùú gbá kí wīī a-baa waal Baal saraafaŋŋu, kí gāā ŋwindɔ ŋun bi cóoǹ nsaraafanee caŋinee.

²⁶Boonee á mā man a-Dindaan a-Nimbɔtiu nsaraafan ŋun sá mmɔntee kigbantaŋ nee pu. Á látí ŋwindɔ ŋun a gāāyee kí dūú kpāā ŋŋmi nsaraafan ŋun a máń-mi mpɔminee pu, ní kí dū dimaaliliitiil najauee kí ŋá saraawɔkaa kí tīī-mi.»

²⁷Geedeeyɔn nìn lēē u-tɔntɔnliibi kansikin binib saalaa ní bi cūtìi ŋá ti-Dindaan nín nìn tùkū-u yii ú ŋá puee. Ama u nín nìn fàŋkí u-baa dicaŋkun yab nì binib bin kíǹ kitiŋinee puee, waa nìn ŋá min ní ti-Dindaan bí yii ú ŋée ŋwiimpu, kunyeeu ní u ŋá.

²⁸Kutaa wúntì kutaafaau pɔ̀lpɔl kitiŋin nib yíkèe ní ki dáań ki ká yii bi gbáń ki wīī diwaal Baal saraafaŋŋu, ki gāā ŋwindɔ ŋun nìn cɔ́ ŋu-caŋinee ní ki dū dimaaliliitiil najauee ki ŋá saraawɔkaa nsaraafan ŋun bi máń mpɔminee pu.

²⁹Ní bi kíǹ ki bí ki bàlifī tɔb yii: «Ŋma di kalin nín ŋá mimmee?» Bi bālifì bālifì, ki nyàab̄ nyàab̄ee ní an dāa nyáń yii Joowaasi jipɔɔn Geedeeyɔn di ŋá míǹ.

³⁰Ní kitiŋin nib bí Joowaasi yii: «Nyāntiń a-jipɔɔn doo tí kpɔ̀-u, kun puee u gbáń ki wīī diwaal Baal saraafaŋŋu ní ki gāā ŋwindɔ ŋun bi cóoǹ ŋu-caŋinee.»

³¹Ní Joowaasi kíí bin nìn yú u-cee niinee kɔkɔ yii: «Nimbi di làá sòoǹ diwaal Baal bɔti kí tīī-daaa? Nimbi di máaǹ kí jòoń-dàaa? Un kamaa di yaa mɔ́tì diwaal Baal puee máaǹ bí kpɔ̀-u ní kutaa ń nín wúntí. Diwaal Baal yaa lafun nyí yii di sá unimbɔtee, bi nín gbáń ki wīī di-saraafaŋŋuee, dí mɔ̄tì di-ba pu.»

³²Ŋwiin gbanti ní bi nìn páaǹ Geedeeyɔn diyimpaaŋkaal yii <Yeerubaal> ki lī yii: «Diwaal Baal ń mɔ̄tì di-ba pu», kun puee u gbáń ki wīī di-saraafaŋŋu.

³³Madiyan yab nì Amaleeki yab nì ŋwìiń nyalaŋki pú timmu yab sòon̄ ki ŋá kinyɔɔbaantii, ki kóoǹní ki kpáfì, ki dūtì Jɔɔdan buŋŋu ní ki dɔ́miń ki ŋātì dijanjanaapaal Jisirayeel tantakalin ki kāl̀.

³⁴Ti-Dindaan Fam nìn gbí Geedeeyɔn ní u búń ŋyin ki yíiń Abiyeeseer maaliŋun yab ní bi-kɔkɔ yíkì ki páaǹ u-boon.

³⁵U nìn lēē binib ki tú bi yíiń Manasee naakookun yab kɔkɔ ní bi mun yíkìń ki páaǹ u-boon. Boonee ní u tú ituun Aseer nì Sabulɔn nì Neefitalii naakɔtin yab cee ní bi mun jɔ́m̀ ki túŋkì-bi nsanni.

³⁶Ní Geedeeyɔn bí Unimbɔti yii: «An yaa lafun sá man pu ní a là kí dī kí fīī Isirayeel yab kii a nín lī puee,

³⁷m làá kpátí ipii kuti ŋaabuŋu ki bíĺ mmɔŋki dijanjanaapaal pu. Kutaa yaa wúntì ní dimalindi yaa sɔ̄ŋkì ipii kuti ŋaabuŋu ama ní kaa sɔ̄ŋkì dijanjanaapaal laakin kíǹeeyee, mimmee m béè yii a lafun là kí dī man pu kí fīī Isirayeel yab, kii a nín lī puee dee.»

³⁸Ní an ŋá min Geedeeyɔn lēe. Di sá kutaa wúntì u fīntì kutaafaau ki yōoǹ ipii kuti ŋaabuŋuee ki ŋmáaḿee ní nnyim nyáń ki gbí kisambinyɔkaai kimɔŋ.

³⁹Ní Geedeeyɔn bí Unimbɔti yii: «Á taa fōō m-pu diŋuul, m láa gíti sòoǹ nì si diba. Pɔ̄-mi nsan ḿ gíti màkan̄ ipii kuti ŋaabuŋu makandee kí kpèè. Yàntī ipii kuti ŋaabuŋu ń nīn kūń ama ní dimalindi ń tɔ̄ kí sɔ̀ŋkì kitiŋ kɔkɔ dijanjanaapaal pu.»

⁴⁰Kunyeeu gbantee Unimbɔti tí ŋá Geedeeyɔn nín lī puee. U nìn yāntì ipii kuti ŋaabuŋuee kūń ama ní dimalindi tɔ́ ki sɔ̄ŋkì kitiŋ kɔkɔ dijanjanaapaal pu.