Read Ntcham Juges 7 Bible Online

Juges 7 - Ntcham bible

Juges 7

¹Kutaa wúntì kutaafaau pɔ̀lpɔlee ní Geedeeyɔn un bi páaǹ diyindi yii Yeerubaalee yíkì u nì samaa kɔkɔ ki cūtìi ŋātì dijanjanaapaal Eeni Aroodi buŋŋu caŋin. Madiyan yab bíǹ naapaal nìn bínní ŋgan pú, Mooree gbantaŋki taapu, ditantakalin.

²Ní ti-Dindaan bí Geedeeyɔn yii: «Binib bin bí a-ceeyee wīikí tikpil ḿ dū Madiyan yab kí ŋá bi-ŋaan, kun puee Isirayeel yab dāa ŋūǹ kí gāā bi-bindi m-nimbiin kí lì yii: <Ti nì ti-pɔŋŋu ní ti jáń ki fīī ti-ba!>

³An puee á bāakì kí tùkù diniwul kɔkɔ yii: <Ni-kansikin un di yaa fàŋkí u-wunti gbáàyee, udaan ń gbèen̄ Galaadi jool pu doo kí fàtīí nīn gítí!>» Ní binib kutukub mmuŋku nì bili bātì samaa poon ki fātìi nín gítí ní an kíǹ binib kutukub saalaa.

⁴Ní ti-Dindaan tùkū Geedeeyɔn yii: «Binib nee dáá gbíntìi wīikí tikpil! Yàntī bí sìntī mbunni ḿ lútí bin làá nóó-see kí tīī-si. Un kamaa ní m yaa bí yii ú nóó-si kí cùee, udaan ń nóó-si. Un ní m yaa tí bí yii ú taa nóó-si kí cùee, udaan ń taa nóó-si.»

⁵Ní Geedeeyɔn yāntì binib nín sìntī mbunni ní ti-Dindaan bí-u yii: «Un kamaa làá dū u-limbil kí nyɔ̀ nnyim kii kibɔkɔ nín nyù puee, á gàntī udaan kí yóoń dijandi diba, ní kí gàntī un kamaa yaa gbāaǹ u-tabiŋyiliŋ pu ki nyùn̄ nnyimee kí yóoń dijandi diba mun.»

⁶Binib bin nìn dū bi-limbiliŋ ki nyùn̄ nnyim kii iboo nín nyù puee nìn kpáfì binib alaataa ata, ama binib bin nìn kíǹee kɔkɔ nìn gbāaǹ bi-tabiŋyiliŋ pu ní ki nyùn̄ nnyim.

⁷Ní ti-Dindaan bí Geedeeyɔn yii: «Binib alaataa ata bin dū bi-limbiliŋ ki nyùn̄ nnyim nee pu ní m làá dī kí fīī-ni ní kí dū Madiyan yab kí ŋá a-ŋaan. Binib bin kíǹee bimbee, báà ŋma ń nīn kùǹ u-dumpu.»

⁸Geedeeyɔn nìn yāntì binib alaataa atee gbíntì u-cee ní ki pú binib bin kíǹee kinyɔkɔ bí nīn gítí bi-tantibin. Binib alaataa atee nìn yōoǹ bin nín kùǹee jinti nì bi-yiŋyi. Madiyan yab naapaal nìn bí Geedeeyɔn yɔŋu taapu ní ditantakalin.

⁹Kunyeeu gbanti ní ti-Dindaan bí Geedeeyɔn yii: «Yīkì kí sìntī Madiyan yab naapaal pu kí jáǹ-bi, di sá yii m dū-bi ki ŋá a-ŋaan.

¹⁰Ama a yaa fàŋkéee, sii nì a-tɔntɔnliu Puura ń dá láá nóó kí sìntī dijanjanaapaal watil pú dibalin.

¹¹A yaa bàn̄ niinee, a làá gbìl̄ tin binib bí ki sòoǹee. Án làá tīī-si kunyannyaau ní á ŋmā kí sìntī Madiyan yab naapaal pu kí cùú jáǹ-bi.» Niinee Geedeeyɔn nì u-tɔntɔnliu cōom̀ ki tin gūū Madiyan yab naapaal.

¹²Madiyan yab nì Amaleeki yab nì ŋwìiń nyalaŋki pú timmu yab kɔkɔ nìn kpátìi gbí ditantakalin ní bɔ̀mmm, ki wīikí kii inaakitoonee. Baa nìn ŋūǹ kí kàaǹ bi-gutaamui gba, kun puee i nìn wīikí ní tikpil tikpil, kii tiŋku gbandi bul nín wīikí puee.

¹³Ŋyunti ŋun Geedeeyɔn bàn̄ee, uninja ubɔ nìn bí ki máafí u-bɔɔ kudamintiiu kun u dámintèe. U nìn bíi lì yii: «Kpèè, m dáá pée dámintì kudamintiiu kubɔ dee. Kudamintiiu gbanti poonee, m ká ɔɔji kpɔnɔu ubɔ bí ki ŋàaǹ ki màntī Madiyan yab naapaal yilpu. Kpɔnɔee ŋàan̄ ki bàn̄ tanti ubɔ ní ki yá-u ki lúkú ní u lábitì ki cìb̄ kitiŋ.»

¹⁴Ní u-bɔɔ kíí-u yii: «Án sɔ̄ kí lā, an máaǹ ki pée sá uisirayeelja Joowaasi jipɔɔn Geedeeyɔn tàataajiki ní a dámintì. Unimbɔti dū Madiyan yab nì bi-janjanaapaal kɔkɔ ki ŋá u-ŋaan dee.»

¹⁵Geedeeyɔn nín gbìl̄ bi máafì kudamintiiuee pu nì bi nín lēē ku-taapu mun puee, ní u gbāaǹ u-tabiŋyiliŋ pu ki jáam̀ Unimbɔti. Boonee ní u yíkì ki nín gítí Isirayeel yab naapaal pu ki bàn̄ee ki bí-bi yii: «Ní yīkìmaan, kun puee ti-Dindaan dū Madiyan yab nì bi-naapaal ki ŋá ni-ŋaan!»

¹⁶Geedeeyɔn nìn cúú binib alaataa atee ki yākatì akiti ata. U nìn dū ŋyin ŋun bi búǹ kujaaunee ŋubɔ nì kibàŋ́kuliŋŋi kiba ki ŋúbiǹ báà ŋma, ní ŋŋminaapool kā kibaŋŋi kamaa poon.

¹⁷U bɔ́ntì-bi míǹ ki dóòyee ní ki bí-bi yii: «Ní nīn pée kpèé-mi, m yaa ŋá puee ní ŋá míǹ. M yaa bàn̄ Madiyan yab janjanaapaal caŋin ní ki yaa pée ŋá puee, ni mun ń ŋá míǹ mbaantiim.

¹⁸M làá búń ŋyin, man nì bin làá nīn bí m-ceeyee kɔkɔ. Ni mun ń búń iyin míǹ mbaantiim, kí nīn còom̄ ki màntīi gɔ́ǹ dijanjanaapaal ki tátí ki lì yii: <Ti-Dindaan yindi pu nì Geedeeyɔn yindi pu!>»

¹⁹Geedeeyɔn nì u-yab binib dilaataal bin nìn nóó-uee nìn bàn̄ Madiyan yab naapaal caŋin kunyataasiiu búmbum ní. Ŋyunti gbantee bi nìn kpántì bijanjaliibi bin fōō bikpikib bin nìn dáá kpákatì sintil pu kpalaayee dee. Di sá ní Geedeeyɔn nì u-yab nìn kíĺ ki bíi búǹ iyin, ki fátí ki wìil̄ mbamu mun bi nìn ŋúb́ee.

²⁰Niinee ní akiti atee kíĺ ki bíi búǹ iyin ki fátí ki wìil̄ mbamu. Bi nìn ŋúb́ iŋminaapool ŋŋaŋgan ní ki ŋúb́ iyin ŋŋaŋgiil ki búǹ, ní ki nìn tátí mpɔn ki lì yii: «Tí jámaan ti-Dindaan yindi pu nì Geedeeyɔn yindi pu!»

²¹Isirayeel yab māntìi gɔ́ń Madiyan yab naapaal míǹ, báà ŋma gbíntìi yú u-paaŋŋu. Dijanjanaapaal puee, báà ŋma nìn kíĺ ki bíi sáń ki tátí an kɔkɔ pu ki nyàab̀ kí ŋmátí.

²²Ŋyunti ŋun Isirayeel yab binib alaataa atee bí ki búǹ iyinee, ní ti-Dindaan yāntì dijanjanaapaal kɔkɔ puee báà ŋma kíǹ ki fàtī u-tàataajiki ki sàatī u-juti. Ní binib kɔkɔ sáǹ ki kátì ki tin bàn̄ Beeti-Siita tiŋki, ki gítí Seereera tiŋki watil pú, ní ki yōoǹ ki tin cáa gūū Abeel-Meewoola tiŋki, Tabaati tiŋki caŋin.

²³Niinee ní bi yíiń Isirayeel yab bininjab bin sá Neefitalii nì Aseer nì Manasee naakɔtinee, ní bi kùl̄ ki páaǹ Madiyan yab boon.

²⁴Geedeeyɔn nìn lēē binib ki tú Eefiraayiim jooŋŋi pu bí cùú bāakì kí tùkù bin kóò niinee yii: «Ní sìntīmaan kí tūŋkì Madiyan yab, kí péeǹ-bi kí jī mpaan anyimbɔbil nì inyimbul kɔkɔn, kí yòon̄ kí tin cáá sāā Beeti-Baara tiŋki nì Jɔɔdan buŋŋu.» Míǹ ní bi yíiń Eefiraayiim yab bininjab kɔkɔ ki kpáfì ní bi cūtìi jíń mpaan anyimbɔbil nì inyimbul kɔkɔn, ki yōoǹ ki tin cáa sāā Beeti-Baara tiŋki nì Jɔɔdan buŋŋu.

²⁵Bi nìn cúú Madiyan kpilib bili. Bi nìn yíì ubɔ Ooreeb ní ki yíì un kíǹee Seeyeeb. Bi nìn kūū Ooreeb laakin bi yíì yii Ooreeb Taŋkpalee ní ki kūū Seeyeeb laakin bi yíì yii Seeyeeb Bɔbil din poon bi tà fiinyi biliŋ ki lèekī ndamamee. Bi kūū bikpilib gbanti liitil míǹ ki dóòyee ní ki nìkī ki jìn̄ Madiyan yab ki dūtì Jɔɔdan buŋŋu. Bi nìn ŋúbiń Ooreeb nì Seeyeeb yiliŋ ki nyánní lapu pu buŋgbandi ki cáań ki tīī Geedeeyɔn.