Read Ntcham Juges 9 Bible Online

Juges 9 - Ntcham bible

Juges 9

¹Yeerubaal, an dàkà Geedeeyɔn jipɔɔn Abimeeleeki nìn cūtì Siikeem tiŋkin ki ká u-na niijab nì u-maaliŋun yab kɔkɔ ki bí-bi yii:

²«Ní tùkùmaan Siikeem tindambi kɔkɔ yii: <Ni là Yeerubaal jipɔmbi binib imuŋku ita nì saalaayee ní ń nīn kpòotī-naaa, ni là unibaanti ní ń nīn kpòotī-ni? Ní téetímaan yii man nì ni sá fatikubaanti ní!>»

³Abimeeleeki na niijab nìn dū tibɔtee ki lī Siikeem tindambi kɔkɔ cee, ní bíǹ páaǹ Abimeeleeki boon, di sá bi nìn lī yii: «Ti-nabiki dee.»

⁴Bi nìn lēē Baal-Beeriiti diiku poon animbil jitɔmbi imuŋku ita nì saalaa ki tīī Abimeeleeki ní u dūu fōō tinifan nì naayeekub ki páaǹ u-boon.

⁵Abimeeleeki nìn cūtì u-baa dumpu, Oofiraa tiŋkin ki cúú u-nabiyaamu Yeerubaal jipɔmbi binib imuŋku ita nì saalaayee ki kūū ditaŋkpabaantiil pu. Asee Yeerubaal jipɔnjoolkaau Yootam di nìn kíǹ, kun puee úǹ nìn sáǹ ki bál̀.

⁶Niinee ní Siikeem tindambi kɔkɔ nì Beeti-Miiloo yab kɔkɔ kpáfì ní ki cūtìi kāaǹ Abimeeleeki dibeel seeni subu bun nìn yú ditaŋkpal din bi nìn cóoǹ Siikeem tiŋkinee caŋin.

⁷Yootam nín gbìl̄ tin jítèe ní u jɔ́m̀ ki tɔ́kɔǹ Geerisiim jool pu ki téeń mpɔn ki tùkū-bi yii: «Siikeem tindambi, ní pīlifìmaan-mi ní Unimbɔti ń pīlifì ni mun[12].

⁸«Isufi di nìn yíkì yii i làá kàan̄ i-bɔtiu. I nìn bí ɔliifi subu yii: <Sii nín̄ sá ti-bɔtiu!>

⁹Ní ɔliifi subu kíí isufi in kíǹee yii: <Mimmee m yàntī ŋkpam min awaa nì binib néeńee kí cùú jī dibeel isufi pu deeyaa!>

¹⁰Ní isufi in kíǹee bí fiigi subu yii: <Sii dāan̄ kí nīn sá ti-bɔtiu!>

¹¹Ní fiigi subu kíí in kíǹee yii: <Mimmee m yàntī m-subiliŋ ŋin ŋān̄ ki mɔ̄ cɔ́ncɔŋ nee kí cùú jī dibeel isufi pu deeyaa!>

¹²Ní isufi in kíǹee bí fiinyi subu yii: <Sii dāan̄ kí nīn sá ti-bɔtiu!>

¹³Ní fiinyi subu kíí in kíǹee yii: <Mimmee m yàntī m-damam min awaa nì binib nyù an nyàatī-bee kí cùú jī dibeel isufi pu deeyaa!>

¹⁴Niin ní isufi kɔkɔ bí kikuŋkumbɔŋ yii: <Sii dāan̄ kí nīn sá ti-bɔtiu!>

¹⁵Ní kikuŋkumbɔŋ bí isufi yii: <Tiŋman ní ni yaa lafun là kí kàan̄-mi dibeel ḿ nīn sá ni-bɔtiuee, ní sāǹnímaan kí dāá báĺ m-booŋŋu taapu. Ama an yaa kaa sá míǹ, ŋŋmi làá nyā man kikuŋkumbɔŋ poon kí wà kí kpáaǹ Leebanɔn sufii in bi yíì yii seediree!>

¹⁶«Too, kɔŋkɔnnee nimbi ni-ba ń kpèè yii ni nín kāaǹ Abimeeleeki dibeel nee, ni lafun ŋá míǹ nì dipɔbil diba nì tibulcinaaa? Min ni ŋá Yeerubaal nì u-dicaŋku nee, míǹ ní ni bàà máaǹ kí ŋá-baaa? Tiŋan tin kɔkɔ u ŋá ki tīī-nee, min ni làá dūú jāam̀-uee deeee?

¹⁷M-baa jáń kujaau nimbi pu ní, ki dū u-maŋfal ki tīī kaa fāŋkì ŋkúm ní ki fīī-ni ki líì Madiyan yab ŋaan.

¹⁸Ama díǹ nee, ni fātìi lábitì m-baa dicaŋku pu, ki cúú u-jipɔmbi binib imuŋku ita nì saalaayee ki kūū ditaŋkpabaantiil pu. Míǹ boonee ní ni dū dibeel ki tīī u-yumbunimpuu jipɔɔn Abimeeleeki ú nīn kíǹ ki sá Siikeem tiŋki nì ki-tindambi bɔtiu, yii u nín sá ni-nabikee pu.

¹⁹An puee ni yaa lafun nyí yii min ni ŋá Yeerubaal nì u-dicaŋkuee, an sá nì dipɔbil diba nì tibulcinee, ní nīn fàal̀maan Abimeeleeki pu ní u mun ń nīn fàal̀ nimbi pu!

²⁰An yaa kaa sá mimmee, ŋŋmi ń nyā Abimeeleeki cee kí wà Siikeem nì Beeti-Miiloo tindambi, ní ŋŋmi ń nyā Siikeem nì Beeti-Miiloo tindambi mun cee kí wà Abimeeleeki!»

²¹Yootam nìn sòon̄ míǹ ki dóòyee ní ki sáǹ ki cūtìi kɔ́ Beeyeer tiŋkin. U nìn gbíntì niin, kun puee u nìn fàŋkí u-maan Abimeeleeki.

²²Abimeeleeki nìn jíń dibeel Isirayeel tiŋki pu abin ata ní.

²³Unimbɔti nìn yāntì Sitaan dɔ́miń ki kɔ́ Abimeeleeki nì Siikeem tindambi kansikin, ní Siikeem tindambi kaa nìn gíti tɔ́ Abimeeleeki.

²⁴Di sá yii an nìn bālifì yii Abimeeleeki nì Siikeem tindambi ń túń bi nín nìn kūū Yeerubaal jipɔmbi binib imuŋku ita nì saalaayee gìńdi. Abimeeleeki làá túń digìńdi gbanti, kun puee u nìn kūū u-nabiyaamu, ní Siikeem tindambi mun ń túń-dì, kun puee bi nìn tútúǹ Abimeeleeki u kūū u-nabiyaamu.

²⁵Siikeem tindambi nìn nyēē Abimeeleeki boon ní ki nìn lèekī binib bi cá ki nākantí ajoon yilpu ki cí. Unil un kamaa yaa nìn jītí bi-caŋin didandi puee, bi nìn gà kí kíntí udaan ní kí fūkul̀ udaan wanti kɔkɔ. Ní bi cáá an bɔtee ki tùkū Abimeeleeki.

²⁶Ŋwiin ŋubɔee, Eebeedi jipɔɔn Gaal nìn dɔ́miń Siikeem tiŋkin, u nì u-nabiyaamu. Siikeem tindambi nìn dū bi-mákal ki ŋá Gaal pu.

²⁷Siikeem tindambi nìn nyáń ki cūtì tisatin ní ki kītì bi-fiinyi sufii biliŋ ki tāā ki lēē ndamam ní ki bɔ́ntì agbiil. Bi nìn kɔ́ bi-nimbɔtiu un bi jáaḿee diikun ní ki jíń ki nyùn̄ ní ki mēē mbusu ki tɔ́ Abimeeleeki pu.

²⁸Eebeedi jipɔɔn Gaal nìn bí ki lì yii: «Abimeeleeki di sá ŋma, ní timbi Siikeem yab ń nīn bí u-taapu ní? Úǹ di kaa sá Yeerubaal jipɔɔn ní Seebuul sá u-kàliŋkpiliuaaa? An puee nín̄ bímaan Siikeem baa Amɔɔr nib taapu. Ba pu ní tí nīn bí Abimeeleeki taapu[13]?

²⁹Ŋma bàà dù binib nee ki ŋúbiǹ-mi, m bàà làá jà Abimeeleeki ní!» Ní ki lī Abimeeleeki yii: «Nyàab̀ bijanjaliibi kí kūtì a-yab pu kí nyānní tí ká tɔb!»

³⁰Seebuul un nìn sá Siikeem tiŋki gɔminauee nìn gbìl̄ tin Eebeedi jipɔɔn Gaal bí ki sòoǹee ní ki fōō mbum.

³¹Ní u lēē binib ki tú dibalin Abimeeleeki cee bi cūtìi tùkū-u yii: «Kpèè, Eebeedi jipɔɔn Gaal dɔ́miń Siikeem tiŋkin, u nì u-nabiyaamu, ní bi bí ki sòoǹ nì Siikeem yab kí bīil̀ sii nì bi kansikin.

³²An puee á yīkì kunyeeu nee kí yòon̄ a-janjaliibi ní dāan̄ kí nákań tisatin.

³³Kutaa yaa fu wúntì ŋwìiń nyáatèe, á fu dāan̄ malaa kí jáǹ kitiŋee. Gaal nì binib bin nóó-uee yaa fu nyáń kí já nì see, á fu ŋá-bi min máaǹee.»

³⁴Abimeeleeki gbìl̄ mimmee ní ki lafun yíkì kunyeeu gbanti, ki cúú u-janjaliibi ki yākatì akiti anaa pu ní bi cūtìi nákáǹ nákáǹ tisatin ki pìlīǹ Siikeem tiŋki.

³⁵Abimeeleeki nín ká yii Eebeedi jipɔɔn Gaal nyánní ki yú kitiŋ punyɔkɔpuee, ní u nì u-yab nyīī ki yíkì laakin bi náká nákée.

³⁶Gaal nín ká dinikitil gbantee ní u bí Seebuul yii: «Kpèè, dinikitil diba di nyánní ajoon yilpu ki sìntīńee.» Ní Seebuul bí-u yii: «An sá ajoon jiliŋku ní a cáa yíì binib.»

³⁷Ní Gaal fātìi gíti bí yii: «Kpèè, dinikitil diba di nyánní dijool din bí kitiŋ kansikin nì kansikin watil pú ki sìntīńee, diba mun di dī seeni subu bun sá Bibɔɔbi subuee saŋŋu ki dòońee.»

³⁸Niinee ní Seebuul bí-u yii: «A-nyɔkɔ kin a bàà bí ki lúǹee bí la? Sii di kaa bíi lì yii: <Ŋma di sá Abimeeleeki ní timbi ń nīn bí u-taapueeee?> U-janjaliibi bin ní a bí ki ŋèeǹee deeyaa! Kɔŋkɔnnee nyā sii nì u ń jáa!»

³⁹Ní Gaal nyáń ki līntì Siikeem tindambi nyɔkɔpu ki bíi jáà nì Abimeeleeki.

⁴⁰Ama Abimeeleeki nìn jìn̄-u ní u sáǹ ki kátì. Binib tikpil nìn kpíì ki dɔ̄ dɔ̄ ki tin sāā kitiŋ punyɔkɔki nyɔkɔpu.

⁴¹Míǹ boonee ní Abimeeleeki cūtì ki kíǹ ki kóò Aruuma tiŋkin, ní Seebuul jìn̄ Gaal nì u-nabiyaamu bí taa ti kàl̄ Siikeem tiŋkin.

⁴²Kutaa wúntèe ní Abimeeleeki gbìl̄ yii Siikeem yab bíi bɔ́ntí kí nyā tisatin.

⁴³Ní u cúú u-janjaliibi ki yākatì akiti ata, ní bi cūtìi nákáǹ nákáǹ tisatin. Ŋyunti ŋun Abimeeleeki ká yii Siikeem yab nyánní kitiŋinee ní u nì u-yab yíkì ki dūu túuǹ-bi ní ki jáń ki pɔ́ɔkiǹ-bi.

⁴⁴Abimeeleeki nì u-yab bin nìn bí u-ceeyee nìn ŋá malaa ki cūtìi yúl̀ kitiŋ punyɔkɔki nyɔkɔpu ki pīiǹ nsan. Ní u-yab akiti ali ŋin kíǹee yíkì ki páatìi jéetì Siikeem yab bin nìn pée bí tisatinee kɔkɔ pu ní ki pɔ̄fì-bi.

⁴⁵Abimeeleeki nìn dū ŋwimmɔn ní ki jáń nì Siikeem tiŋki ní ki dāa nín fōō-kì. U nìn kūū ki céetì ki-nib kɔkɔ, ki nàn̄-kì dúsi dusi ní ki dū ŋyaam ki yāaǹ ki-pu[14].

⁴⁶Miigidaal-Siikeem tindambi nín gbìl̄ mimmee ní bi yíkì ki nín cá Eel-Beeriiti[15] waadiiku taŋkpalɔkɔŋun.

⁴⁷Ní bi cūtìi tùkū Abimeeleeki yii Miigidaal-Siikeem tindambi kɔkɔ kóoǹ ki kpáfì dicilpu ntaŋkpalɔkɔn.

⁴⁸Niinee ní Abimeeleeki nín jɔ́ḿ Saalmɔn jool pu, ki kpáaǹ u-janjaliibi kɔkɔ. Abimeeleeki nìn yōoǹ kicɔkɔ ki gāā disupandi diba ki dūu būkuǹ, ní ki tùkū binib bin nóó-uee yii: «Min ní ni ká m ŋá nee, ni mun ŋámaan míǹ malaa!»

⁴⁹Ní bi kɔkɔ gāā disupandi diba diba ki dūu būkuǹ ki páaǹ Abimeeleeki boon ní bi cáa dūu pīiǹ ntaŋkpalɔkɔee nyɔkɔpu, ki dū ŋŋmi ki sēē ní an wùn̄ binib bin kɔkɔ bí poonee. Míǹ ní Miigidaal-Siikeem tiŋki yab mun kɔkɔ nìn kpíì ki kúntì. Binib bin nìn kpíì mimmee nìn sá kii bininjab nì binimpoobi kutuku ubɔ nyɔkɔm ní.

⁵⁰Míǹ boonee ní Abimeeleeki dūu túĺ Teebeesi tiŋki watil pú, ki cūtìi jáń ki fōō kitiŋ gbanti.

⁵¹Kitiŋ gbanti kansikinee, kudifɔkɔu kun bi nìn máń agun ki māntìi túee kubɔ nìn yú. Kudifɔkɔu gbanti poon ní kitiŋee nib bininjab nì binimpoobi nì bitindambi kɔkɔ nìn sáǹ ki kɔ́ ki bál̀. Bi nìn dū kipunyɔkɔ ki pīiǹ ki kpàl̄ bi-ba pu, ní ki nín jɔ́ḿ kudii yilpu laakin bi bɔ̀b̄ee.

⁵²Abimeeleeki nìn bàn̄ kudifɔkɔuee cee kí jáǹ binib bin sáǹ ki bál̀ ku-poonee, ki sútì ki pìl̄ kudii punyɔkɔki kí bàà sēē-kì ŋŋmi.

⁵³Niinee ní unimpu ubɔ dū kunaau ki lúkuń ní an dɔ́miń ki tàb̄ ki wīī Abimeeleeki yil.

⁵⁴Ní Abimeeleeki yíiń u-tɔntɔnliu unaacimpɔɔn un pá u-boon ki ŋúb́-u tijanjawanee malaa ní ki bí-u yii: «Fúutí a-tàataajiki kí sāā kí kpɔ̀-mi. Maa là bi dāa máafí m-bɔti yii: <Unimpu di nìn kūū-u!>» Niinee ní u-naacimpɔɔŋwuee dū kitàataajiki ki sāā-u ní u kpíì.

⁵⁵Isirayeel yab nín ká yii Abimeeleeki kpíìyee ní báà ŋma fātìi nín kùǹ u-dumpu.

⁵⁶Míǹ ní Unimbɔti nìn téeǹ Abimeeleeki ikpiti in u nìn ŋá u-baa, ki nìn kūū u-nabiyaamu binib imuŋku ita nì saalaayee.

⁵⁷Unimbɔti nìn téeǹ Siikeem yab mun ikpiti in bi mun nìn ŋée, ki nìn yāntì mbusu un ní Yeerubaal jipɔɔn Yootam nìn sòon̄ ki tɔ́ Siikeem yab puee nìn lafun bāań-bi míǹ[16].