Read Ntcham 2 Jean 1 Bible Online

2 Jean 1 - Ntcham bible

2 Jean 1

¹An sá man Ukpil di jáaḿ sii ti-Na[1] un Unimbɔti lútèe nì a-biyaamu. Ibaamɔn, m néeń ni-kɔkɔ. An kaa sá man baba di néeń-ni, an sá ki kpáaǹ bin kɔkɔ béè ibaamɔnee,

²kun puee ibaamɔn bí ti-ni ki làá nīn pée bí kí nīn cá jaanjaan.

³Ti-Baa Unimbɔti nì Yeesu Kriisitoo, Ubaati Jipɔɔn ń ŋá-ti tiŋan, kí sɔ̄ ti-saai, kí tīī-ti ŋgbansɔŋfi, tí nīn cáá ibaamɔn kí nīn néeń tɔb.

⁴An mɔ́ɔkiǹ-mi tikpil m nín ká a-biyaamu mubɔ nóó ibaamɔnee, kii ti-Baa Unimbɔti nín tīī-ti mara uŋyee.

⁵Kɔŋkɔnnee, ti-Na, m gbàam̄-si, tí nīn néeḿmaan tɔb. Dinyɔɔbundi gbanti kaa sá marapɔɔn, an sá mara un ti nìn pée fōō doooo ŋkilkaaminee ní[2].

⁶Dineendi taapu di sá tí nóó Unimbɔti marab. Kii ni nín gbìl̄ doooo ŋkilkaamin puee, mara gbanti di sá tí nīn cáá dineendi.

⁷Kun puee biŋmatinliibi gbóotì duulinyan ki yíì, kaa fōō ki kíí yii Yeesu Kriisitoo kpántì unil ki dɔ́miń duulinyan. Un néè mimmee di sá uŋmatinli ki sá Kriisitoo nannanliu.

⁸Míǹ puee, ní nīn nyí nì ni-ba, ní taa fá ti-tundi nín cáań ipaati iŋyee, án nín làá ŋá pu ní dāá ŋmā kí fōō ni-paati kɔkɔee.

⁹Un di yaa lákatì, kaa là kí nīn ŋúb́ Kriisitoo bɔtee, kaa nyí Unimbɔti, ama un yaa ŋúb́ tibɔti gbantee, úǹ di nyí ti-Baa Unimbɔti nì u-Jipɔɔn.

¹⁰Míǹ puee, un yaa dɔ́miń kaa cáań-ni tibɔti gbantee, ní taa fōō-u ni-dumpu kí taa jāam̀-u gba,

¹¹kun puee, un yaa jáam̀-uee mun ŋmàl̄ atuŋkpiti ŋin udaan tūǹee ni dee.

¹²Tibɔti tikpil bàà bí ḿ sòoǹ nì ni, ama maa là kí dūú ŋmà kugbɔŋu poon, kun puee m là kí dāan̄ ni-cee niin kí sòoǹ nì ni ní, án mɔ̀tīí mɔ̄ɔkiǹ man nì ni.

¹³A-Naal[3] un Unimbɔti lútèe biyaamu mun jáaḿ-si.