Read Ntcham 3 Jean 1 Bible Online

3 Jean 1 - Ntcham bible

3 Jean 1

¹An sá man Ukpil di ŋmàn̄ kugbɔŋu nee kí jāam̀ m-nabineeŋkaaki Gaayusi[1], un m néeń nì ibaamɔnee.

²M-nabineeŋkaaki, m mèé yii tikɔkɔ ń còom̀-si tiŋan á nīn cáá ŋgbampɔn kii a-naŋki nín cáá ŋgbampɔn puee.

³An mɔ́ɔkiǹ-mi tikpil nnabiyaamu nín bāań ki tùkū-mi a nín ŋúb́ ibaamɔn an píkí puee, kii a nín pée còom̄ ibaamɔn poon puee.

⁴Tiba kaa ti bí ki mɔ̄ǹ-mi ki bàn̄ ḿ gbìl̄ yii m-biyaamu bí ki còom̄ ibaamɔn saŋŋu poon, án mɔ́ɔkíǹ-mi tikpil ní.

⁵Kinabineeŋkaai, a nín tūǹ atummɔnti ŋin ki tìì nnabiyaamu ki kpáaǹ bin sá-si binicambee gbee, a lafun dàkā yii a fōō ki kíí tiŋman pu.

⁶Bi bāańee, bi máafì a-neendi gbanti pu Kriisitoo nikitil kɔkɔ nimbiin. Mimmee, m mèé-si, á tūtuǹ-bi bi-saŋŋu gbanti poon min làá fáatíǹ Unimbɔtee.

⁷Di sá yii Yeesu tundi pu ní bi còom̄ nsan, kaa fōō tiba bin kaa nyí Unimbɔtee cee.

⁸An puee, bi yaa bāań ti-ceeyee, ti máaǹ kí tūtuǹ binib gbanti. Mimmee, ti mun kútì bi-pu ki cáá ibaamɔn tundi ki cáǹ nyɔkɔpu dee.

⁹M nìn ŋmàn̄ kugbɔŋu ki tīī Kriisitoo nikitil ki sòon̄ nì bi kibɔgiŋ, ama Diyootreefi là kí nīn sá bi-kpiliu ní kaa là kí pīlifì tin man sòoǹee.

¹⁰U gífí inyimɔn nì tibɔkpitil ki tūntí ti-pu. Míǹ kɔkɔ kaa yá ki kɔ́-u, kun puee u yíití kaa fòol̄ nnabiyaamu mun jītí u-ceeyee mun, ní bin yaa bàà là kí fōō-bee, u pìintí-bi nsan ki là kí nyāntí-bi Kriisitoo nikitil kansikin. Míǹ puee, m yaa láa bāańee, m làá dāá kàaǹ tin kɔkɔwoooo u ŋáańee binib nimbiin.

¹¹M-nabineeŋkaaki, á taa nóó binib bin ŋáań tikpitilee tabɔbiliŋ, ama nín̄ nóó bin ŋáań tiŋanee tabɔbiliŋ. Un ŋáań tiŋanee di sá Unimbɔti niliu, un ŋáań tikpitilee kaa nyí Unimbɔti.

¹²Ama Deemeetriyusi ní báà ŋma pàkà, ní ibaamɔn bɔti tin tin u bí ki sòoǹee mun pàkà-u, ní ti mun pàkà-u. Sii a-ba nyí yii tin ti yaa lēe sá ibaamɔn ní.

¹³M bàà cáá tibɔti tikpil kí sòoǹ nì si, ama maa là kí dū ŋgbaŋŋmamɔɔn kí ŋmà.

¹⁴Kun puee m là kí dāan̄ a-cee iwiin ili nee poon, niin ní ti dāa ŋūǹ kí kàl̄ kí sòoǹ tikɔkɔ.

¹⁵Unimbɔti ń tīī-si ŋgbansɔŋfi. A-bɔɔbi jáaḿ-si. Á jāam̀ ti-bɔɔbi kɔkɔ kí tīī-mi.