Read Ntcham Jude 1 Bible Online

Jude 1 - Ntcham bible

Jude 1

¹Man Juudi, Yakubu[1] naal un sá Yeesu Kriisitoo tɔntɔnliuee di ŋmàn̄ kugbɔŋu nee. M ŋmàn̄-ku ki tīī nimbi bin ti-Baa Unimbɔti yíiń ki néeń-ni ki dū-ni ki kpáafì ki yóoǹ Yeesu Kriisitooyee ní.

²Unimbɔti ń nīn sūǹ ni-saai baabadal, kí nīn tìì-ni ŋgbansɔŋfi tiŋan, kí nīn néeń-ni tikpil.

³M-nabineeŋkaamu, m nìn baasii mɔ̀ kí ŋmàń-ni difiil din ti-kɔkɔ ká nee bɔti. M dāa lafun kpēēyee, an pée sá yii ḿ ŋmàń-ni kí tīiń-ni kunyannyaau ní ŋmā kí nīn jáà ibaamɔn in Unimbɔti dūu tīī u-yab iaa bí kí kpántée pu.

⁴Di sá yii binib biba bin kaa tɔ́ Unimbɔtee ŋá soooo ki kóoń ni-kansikin ki kpántì tiŋan tin Unimbɔti ŋá-tee bɔti, ki ŋáań min kaa kítèe, ki yíì, kaa là Yeesu Kriisitoo un baba sá ti-kpiliu ki sá ti-Dindaanee. Ama dooooyee ní ditafadaaldi din dɔ̄ ki cí bidambee pée ŋmàn̄ Unimbɔti gbɔŋkun.

⁵M nyí yii ni pée nyí tibɔti nee ki yóoǹ dooooyee, ama m là kí gíti téetí-ni ti-pu. Kéè ni nyí ti-Dindaan nín nìn fīī Isirayeel yab ki nyántì Eejipitee, boonee u dāa fātìi kúntì bin kaa nìn là kí fōō kí kííyeeyaa[2]!

⁶Téetímaan tin nìn jítì ituun iba puee: iaa nìn là kí nīn bí mpaan ŋun pu Unimbɔti yóoǹ-iee, ama ní ki dūu fá ki póotì i-laŋki. Unimbɔti nìn bóob́-i nì ikusaka kí nīn cá jaanjaan, ní ki dū-i ki tɔ́ dibɔmbɔŋkpaandin í nīn kā niin ki cí ibɔsooŋkpaan dal.

⁷Ní téetímaan ntimu mun bi yíì Soodoom nì Goomoora nì ntimbilimu mun nìn bí ki pìlīǹ-muee bɔti. Bi mun nìn tí ŋáaǹ kii ituunee nín nìn ŋá puee ní, ki mun nìn dū bi-ba ki tīī dijɔkɔntundi nì atuŋkpiti ŋin unil kaa máaǹ kí ŋée. An puee ní Unimbɔti nìn yāntì ŋŋmi ŋun kaa kúùyee dɔ́miń ki wùn̄-bi, ki dáaĺ bi-tafal, án nīn sá kudaaŋŋu kí dūú dàkà báà ŋma.

⁸Binib bin kóoń ni-kansikinee, míǹ ní bi mun tí ŋáań ki bí yii bi wāĺ, ní an càntī bi cáá bi-ba ki kɔ̄ntí tijɔkɔndin, ní ki kpèé Unimbɔti pɔŋŋu fám, ki sìí Tinyooldambi bin bí yilpuee.

⁹Ama, ŋyunti ŋun ituun kpiliu un bi yíì Mikayeelee nì Sitaan nìn bíi jáà ki kpákà Mooyiisi wunti puee, ntuunee kaa nìn kpáàa dākafì kí sìì Sitaan gba, see ŋu nín pée tùkū-u yii: «Ti-Dindaan di làá dáaĺ a-tafal[3].»

¹⁰Ama ní bíǹ sìí tin baa nyée, ní tin bi nyí kii kumooun peelii nyítamee di kúntí-bi.

¹¹Mbusu dɔ̄ ki cí-bi, kun puee bi táá Kayeen saŋŋu, ní ki dū bi-ba ki tīī isaŋkpiti ki kāntí animbil kii Balaam nín nìn ŋá puee, ki kúù kii Kooree yab nín nìn yíì kaa tɔ́ Unimbɔti ki kpíì puee[4].

¹²Ni nì bi yaa kpáfì ki jīǹ kunabitiiu jikaatee, bi-bimbim bíiĺ-ni ní. Bi jīǹ tikpil, an kaa cáá-bi icoo, ki sūǹ bi-ba pu ŋma. Bi bí kii atagban ŋin kubuŋu cáa yìiǹ, ntaanyim kpá poonee, ní ki bí kii isufi in kaa pée lòoǹ kpataaayee, ki kpíì an kɔkɔ pu, ki kpīkitì.

¹³Bi bí kii tiŋku nín wòoǹ pu tinyiŋgban yíkí ki pùkufī puee ní, bi nyāntiń bi-tuuŋŋi ŋin cáá icooyee. Bi tí bí kii iŋmalbijaa in nyēē ki pùntēe ní. Unimbɔti yóoǹ-bi mpaan ŋun sá dibɔmbɔŋkpaŋkpaandee, niin ní bi làá nīn bí baabadal.

¹⁴Bíǹ pu ní Eenɔki un sá Adam naantitɔntɔkɔl ululuútee nìn sòon̄ dooooyee ki yóoǹ yii: «Ní pīlifì, ti-Dindaan dòoń nì u-circir tuuŋyi kutukub kutukub.

¹⁵U làá sòoǹ báà ŋma bɔti, ní kí kpɔ̀ bin kɔkɔ kaa tɔ́-uee bɔti, bi-tuŋkpitiŋ ŋin bi ŋáańee kɔkɔ nì bi nín yíì Unimbɔti kaa fōō-uee, nì bi nín kaa tɔ́-u ki sòoǹ-u tibɔfan tiŋyee kɔkɔ pu[5].»

¹⁶Binib gbantee, baabadalee, an kaa pée mɔ̄ǹ bíǹ ŋma ní, ní bi yáliŋkí ní ki ŋáań tikpitil tin fáatì-bee, ní ki sòoǹ tilambibɔti, ki cáá nyɔɔmálmal ki ŋmàtíǹ binib ki jīǹ bi-pu.

¹⁷Ama m-nabineeŋkaamu, nimbi ń téetí ti-Dindaan Yeesu Kriisitoo kpambaliŋ nín nìn sòon̄ nì ni tibɔti tin ki síiǹ dooooyee pu.

¹⁸Bi nìn tùkū-ni yii, iwinjoolkaa poonee, binib làá dāá nīn bèel̄-ni, ní ki ŋáań tikpitil tin fáatì-bee[6].

¹⁹Bíǹ di cāabìń digàntil binib kansikin. Bi nín là miŋyee di kpòotī-bi, an kaa sá Unimbɔti Fam.

²⁰Ama nimbee, m-nabineeŋkaamu, nín̄ mɔ̀tīi cámaan nyɔkɔpu ni-fookiiu un bí circiree poon, ni-wimmeem ń nīn cáá Unimbɔti Fam pɔŋŋu.

²¹Ní nīn pée gbíntì ki bí Unimbɔti un néeń-nee ŋaan, kí nīn cí ti-Dindaan Yeesu Kriisitoo usaasɔlee ń dāá tīī-ti dimaŋfal din kaa cáá dikúntilee.

²²Sɔ̄maan bin dàkafī ki gùkufēe saai,

²³kí dáaliń-bi kí nyāntiń ŋŋmi poon kí fīī-bi. Ní sɔ̄ bin kíǹee mun saai, kí nīn nyíǹ ni-ba bí taa dū bi-kpitii kí tìntī-ni. An puee, ni-ŋalii ń taa gbēē bi-bɔkutiŋ ŋin bi pēē ki ŋáań bi-jɔkɔntuuŋŋee kpaŋkpam.

²⁴Tí nyɔ̄ŋkì Unimbɔti un di ŋūǹ kí ŋúb́-ni ní taa lítée. Úǹ di ŋūǹ kí cáá-ni kí cùnnì u-cee tinyoolin nì dipɔɔpindi, bí taa ká ni-pu tiba.

²⁵Tí nyɔ̄ŋkì Unimbɔtibaanti un dī ti-Dindaan Yeesu Kriisitoo pu ki fīī-tee. Úǹ di yì tinyool nì tikpaandi nì mpɔn, nì ŋŋmam doooo ŋkilkaamin nì kɔŋkɔnnee kí nīn pée cáa cá jaanjaan! Ameeni.